O Goberno galego reformará e actualizará o apoio educativo domiciliario co fin de axeitalo ás necesidades actuais dos nenos e nenas que o precisen

A consellería de Cultura, Educación e Ordenación Universitaria, ante a nova casuística aparecida nos últimos anos, considera obrigado reprantexarse o actual sistema de atención e apoio educativo domiciliario a nenos con necesidades desta índole. Os protocolos nesta materia, vixentes dende hai moitos anos e mantidos polos sucesivos gobernos, van ser analizados polas consellerías de Educación e Sanidade para abordar, coa maior das sensibilidades, as reformas que sexan precisas dende o punto de vista racional e de dispoñibilidade de recursos.

Ademais, o conselleiro de Cultura e Educación, Román Rodríguez, comprométese á elaboración dun protocolo de atención educativa domiciliaria para aqueles nenos e nenas que, polas súas circunstancias médicas, non poidan acudir ao seu centro escolar. Así mesmo, xunto co protocolo, vanse deseñar adaptacións curriculares específicas a cada caso, tendo en conta tamén a opinión do departamento de Sanidade.

O conselleiro dará instrucións ás Xefaturas Territoriais de Educación en cada provincia para que as solicitudes de apoio educativo do alumnado que se atope nestas circunstancias se resolvan coa máxima celeridade cada ano antes do inicio do curso escolar.

É dicir, trátase de que a Consellería de Educación dispoña da información suficiente para prever este tipo de situacións (cómpre ter en conta que o número de casos pode variar cada curso e, incluso ao longo dun mesmo curso), para así deseñar unha solución axeitada en función das especificidades de cada caso do xeito máis áxil e rápido posible.

Xa que logo, o departamento de Educación da Xunta garante o apoio educativo domiciliario dos nenos e nenas que así o precisen. Nestes casos, o labor do docente consiste en facer un seguimento das tarefas que se lle encargan ao alumno/a, tendo en conta sempre, a súa situación.

Garantido o apoio ao neno de Malpica

Un apoio que tamén está garantido no caso do alumno de Malpica, posto que este neno xa contou cun docente no seu domicilio o curso pasado, atención que lle foi renovada este curso. Polo tanto, a Consellería atendeu e está atendendo as súas necesidades educativas; e a demora na incorporación do profesor neste curso deriva dun cambio de docente produto dun desaxuste da profesora anterior coa nai do menor.

A atención domiciliaria que está recibindo este neno –e que consiste en facer un seguimento de tarefas que o profesor lle encarga, e non en ter un docente permanente na casa- é a habitual nestes casos.