Os gobernos galego, arxentino e español participan en MICAtlántica na sesión ‘Industrias culturais: xeración de riqueza e emprego’
A Consellería de Cultura, Educación e Ordenación Universitaria, a Secretaría de Cultura da Nación Arxentina e a Secretaría de Estado de Cultura participaron esta tarde na mesa redonda ‘Industrias culturais: xeración de riqueza e emprego’, unha das tres sesións que ofreceu esta tarde MICAtlántica. As intervencións enmarcáronse no espazo Fórum, ao abeiro do que se veñen realizando debates, mesas redondas e conferencias sobre temas de actualidade do sector, como modelos de negocio, políticas públicas e cultura dixital.
En representación dos gobernos galego, arxentino e español interviron na sesión, respectivamente, o secretario xeral de Cultura, Anxo Lorenzo; o director nacional de Industrias Culturais de Arxentina, Rodolfo Hamawi; e a subdirectora xeral de Cooperación Cultural coas Comunidades Autónomas da Secretaría de Estado de Cultura, Begoña Cerro.