A Consellería de Cultura e Educación dota o novo IES do Milladoiro co material infomático preciso para comezar a súa andaina
O novo espazo contará con ordenadores, encerados dixitais, portátiles, e proxectores, que se están instalando ao longo desta semana, así como a rede telefónica
O centro, que responde a unha demanda histórica da comunidade educativa de Ames, e supuxo un investimento superior aos oito millóns de euros
A Consellería de Cultura, Educación e Ordenación Universitaria, está a realizar a instalación do equipamento informático do novo IES do Milladoiro, que comezará a súa andaina o vindeiro luns, 16 de setembro.
O novo centro educativo, responde a unha demanda histórica da comunidade educativa de Ames, e supuxo un investimento superior aos oito millóns de euros por parte da Xunta de Galicia. Un orzamento no que se incluía a dotación informática de ordenadores, encerados dixitais, portátiles e proxectores, así como a rede telefónica.
Incremento de prazas
O novo IES do Milladoiro contará con 16 unidades de ESO e 4 de bacharelato, o que implica un total de 612 prazas que darán resposta ás necesidades crecentes de prazas escolares desta poboación coruñesa, e á demanda da propia cidadanía do concello de Ames.
A posta en marcha deste centro supón un investimento de máis de 8 millóns de euros por parte da Consellería, resultado da construción, equipamento, gastos de funcionamento e de persoal no IES. De feito, a posta en marcha do novo centro suporá a incorporación ao mesmo de 47-48 docentes, o que supón un gran esforzo da Consellería nestes momentos de crise.