Cultura e Educación anima a contemplar mañá a choiva de estrelas ou “bágoas de San Lourenzo” desde o alto do Gaiás

A Consellería de Cultura, Educación e Ordenación Universitaria convida a contemplar a choiva de estrelas de mañá, luns á noite, desde o alto do Gaiás a través da actividade Astronomía. Un novo lugar para ollar o ceo, que celebra unha sesión de observación especial para descubrir o fenómeno das Perseidas, tamén chamadas “bágoas de San Lourenzo”.

Ata trinta meteoros por minuto se o tempo acompaña poderán ver a noite deste luns, 12 de agosto, os participantes nesta sesión que arrancará ás 22:30 horas na dársena de autobuses da Cidade da Cultura. As prazas –un total de cen– están esgotadas desde hai días, demostrando o enorme interese que esta actividade que combina lecer e coñecemento esperta entre a cidadanía.

A xa tradicional Noite das Perseidas permitirá contemplar no alto do Gaiás, sempre e cando o tempo acompañe, a choiva de meteoros nun escenario excepcional. As tamén chamadas “bágoas de San Lourenzo” poderán observarse dende a Cidade da Cultura coa axuda de monitores do Observatorio Astronómico Ramón María Aller da USC, de quen ademais recibirán nocións básicas para aprender a mirar o ceo a simple vista.

Como en todas as sesións das Visitas Astronómicas, os participantes aprenderán a identificar as diferentes constelacións coa axuda duns planisferios ao tempo que observarán planetas, cúmulos e estrelas dobres.

Catro novas sesións astronómicas

O programa de Visitas Astronómicas. Un lugar para ver o ceo continuará o vindeiro venres, 16 de agosto, con cen novas prazas para descubrir o firmamento dende outro punto de vista. A última das observacións do mes de agosto terá lugar o venres 30 para continuar o 6 e 13 de setembro. Para participar só é preciso reservar praza en www.cidadedacultura.org e a actividade é totalmente de balde.

Obradoiro de bólidos e meteoritos

Como complemento ás visitas, o 6 de setembro terá lugar o obradoiro de Bólidos e Meteoritos, no que utilizando imaxes obtidas desde o Observatorio Astronómico Ramón María Aller, os participantes coñecerán o efecto bólido: a entrada na atmosfera dunha pedra cósmica e a posible chegada desta ao chan, ou sexa, de meteoritos.

No marco deste obradoiro, que terá lugar no auditorio da Biblioteca e Arquivo de Galicia, amosaranse en vivo algúns meteoritos de diferentes tipos e darase conta de toda a metodoloxía utilizada polos investigadores para tratar de buscalos unha vez que se ten observado un bólido cercano.