Blog_tic

Nos ordenadores das aulas de Bacharelato e aulas de informática engadíronse dous iconos para cambiar facilmente o modo de proxección. Hai dúas opcións:

• Clonar: O contido do monitor do profesor/a reprodúcese no encerado dixital ou monitor interactivo, para toda a clase
• Estender: Créase un novo espazo de escritorio ao que podemos arrastrar o que queiramos proxectar para a clase. Deste xeito podemos ter información diferente no monitor do profesor/a e no dispositivo de proxección.

Para escoller o modo de proxección desexado abonda con facer dobre clic sobre o icono correspondente.

O pasado venres 15 de marzo, catro alumnos de 4º ESO impartíronlle ao alumnado de 1º ESO unha charla formativa sobre os riscos que pode ocasionar un uso inapropiado das novas tecnoloxías.

Juan, Lover, Marcos e Manuel prepararon unha sesión sobre algúns dos problemas máis frecuentes asociado aos móbiles: a sextorsión ou chantaxe coa ameaza de divulgar fotos ou vídeos de contido sexual. A través dunha presentación, de material audiovisual e de exemplos coñecidos e publicados na prensa, explicaron en que consiste, cales poden ser as consecuencias, como se podería evitar e remataron dando unha serie de consellos para facer un uso responsable e seguro das novas tecnoloxías.

O alumnado de 1º ESO mostrouse moi interesado e moi participativo, comentando outros casos coñecidos e facendo preguntas ben acaídas.

Cada 30 de novembro celébrase o Día Internacional da Seguridade da Información. Pensamos que é un bo momento para insistir na importancia de coidar os nosos datos e a nosa identidade dixital, e para iso creamos unha páxina con xogos e novas que de seguro vos interesarán, tanto se sodes xente nova como non tanto.

Pincha na imaxe para descubrila!