NOVAS:

Con motivo do Día Internaciondal da Muller e a Nena na Ciencia, que se conmemora o 11 de febreiro, o noso Departamento de Bioloxía e Xeoloxía lanza un reto: propoñer un nome e o deseño dunha imaxe para a súa aula laboratorio. Estas son as bases, abertas a toooodo o alumnado do IES:

• Propón unha científica para dedicarlle a aula e argumenta o por qué.
• Crea un deseño relacionado para decorar a porta do laboratorio. O formato é libre! Pero debe entenderse a quen se honra.
• Envía a túa proposta, antes do 28 de febreiro (último día) ao enderezo electrónico bioxeosanpaio@gmail.com

A proposta gañadora plasmarase nun vinilo que será colocado por fóra na porta do laboratorio, decorando así a aula,  visibilizándoa e facéndoa única e esperamos que espectacular. Ademais, recibirá tamén como agasallo uns modernísimos auriculares inalámbricos.

Queda inaugurado pois o concurso! Sede creativos, esixentes e persoais... e sorte a todas/os!

O vindeiro luns 18 comezamos coa primeira Semana de Froita Fresca, que manteremos ata o venres 29 de xaneiro. Así, cada día, poñeremos a disposición do alumnado, na mesa de Conserxería do centro, mandarinas, mazás e plátanos. Como cada ano, é unha iniciativa posible grazas á axuda do Fondo Galego de Garantía Agraria da Xunta.

Aberto o prazo para efectuar a reserva de praza para o novo alumnado que, procedente de centros adscritos, desexe matricularse neste centro para o vindeiro curso 2021-22.

Toda a información, AQUÍ.

Achégase o Nadal! Este martes 22 é o último día de clase do ano. Tradicionalmente viñamos organizando unhas horas de xogos colectivos no pavillón ou no recinto exterior do edificio, pero este curso debido ao necesario distanciamento, o plan será un pouco diferente. Así, o horario consistirá, tanto para ESO como para BAC en:

• 1ª e 2ª hora: clases habituais.
• 3ª e 4ª hora: reunión co titor/a para unha sesión de xogos tradicionais (e seguros) en grupo e a continuación, sobre as 12 h, entrega dos boletíns.
• 12.20 h: Saída (o transporte está citado para as 12.25 h).

Aproveitamos a ocasión para desexarvos unhas felices festas e o mellor 2021 posible.

Cada Nadal séguense usando mascotas como agasallo. Unha de cada tres acaban sendo abandoadas semanas despois. Este venres 18, o noso alumnado de 4ºESO será destinatario dunha charla (tantas como grupos) de concienciación e defensa dos dereitos dos animais con Sandra , exalumna e voluntaria desde hai anos da Protectora de Animais de Tui Aloia, que vén facendo un traballo espectacular neste ámbito.

Acompañamos estas charlas con 3 oportunidades de colaboración:

1. Recollida solidaria de alimentos para os cans da protectora. Só ata martes 22. Admítense patés, latas, salchichas e aros, que poderanse depositar na caixa habilitada na entrada, ao lado de Conserxería, só ata martes 22.
   
2. Mercado solidario. Estará só este vernes 18 nos intermedios das charlas: en 4º A (1º recreo) e 4º C (2º recreo): calendarios, chaveiros, pulseiras, camisetas... os cartos recadados destínanse integramente para financiar os gastos necesarios para o coidado dos animais refuxiados na protectora.
3. Panel de animais acollidos. Hai máis de sesenta cans agardando en Aloia por unha familia que os queira e os coide, e tedes os seus retratos na entrada do IES. Con foto, nome, idade e esas virtudes que fan único a cada un deles. Que non podedes adoptar? Sempre se pode amadriñar, pasear ou pasar pola protectora a dar uns aloumiños ou botar unha man.
   
   

Como escribiu Lord Byron para a tumba do seu can: “tiña todas as virtudes humanas e ningún dos seus defectos”.