Conferencias

Observando o Universo.

Dom, 17/11/2024 - 19:29

A astrofísica galega Begoña Vila Costas impartiu unha conferencia online este 14 de novembro ás 11:45 horas dende o IES de Valga (onde participou no XXXVII Congreso de ENCIGA), que se transmitiu en directo nuns 16 institutos de Galicia, entre eles para o alumnado de primeiro curso de STEMBach do noso IES.

A enxeñeira de sistemas na NASA, que traballa no centro de voo espacial Goddard do Fine Guidance Sensor (sensor que leva o telescopio espacial James Webb), ilustrou con imaxes e vídeos o seu traballo recente, como a preparación, lanzamento, despregue e impresionantes imaxes acadadas por este telescopio. O obxectivo destes lanzamentos é, entre outros, a busca de planetas con atmósfera como posibles substitutos futuros do noso planeta Terra.

A distinguida viguesa presentou o seu traballo actual no telescopio ROMAN, que é o primeiro con nome de muller. Finalmente, ademais de dar a coñecer o traballo de observación solar da Sonda Solar Parker, falou das misións a Marte e das futuras ARTEMIS á lúa.

Álbum: Sen categoría -> 24 Begoña Vila

Alfabetización climática

Mér, 23/10/2024 - 17:11

Este 23 de outubro a directora do Centro Asociado da UNED de Lugo, Ana Traseira, Paula e Alejandro impartiron unha conferencia sobre alfabetización climática para o alumnado de Stembach de primeiro curso.

Presentaron o centro asociado na reserva da biosfera Terras do Miño dentro dunha das súas liñas de actuación: a divulgación ambiental. Presentaron a axenda 2030 e os 17 ODS ante a actual emerxencia climática, así como as consecuencias: perda de hábitats e ecosistemas, incendios forestais, especies exóticas invasoras, extinción de especies, etc.

Finalmente repasaron os contidos cun kahoot ao alumnado, que recibiu un lápiz feito con xornais reciclados como agasallo.

Álbum: Sen categoría -> 24 alfabetización climática uned

O método científico.

Mér, 16/10/2024 - 17:03

Este 16 de outubro a profesora de ciclos do noso instituto Belén Reija impartiu unha charla sobre o método científico para o alumnado de Stembach de primeiro curso.

A doutora en química física presentou as orixes, características e etapas do método actualmente empregado en ciencia. Posteriormente enumerou exemplos de aplicacións deste método e finalmente presentou nocións de seguridade no laboratorio químico.