Orientación

O día 23 de abril, Día Internacional do libro, propuxémosvos a través de Instagram un xogo para que entre todos e todas nos suxerísedes libros para ler.

Moitas grazas por participar nesta proposta e dicirnos que libro non podemos deixar de ler.

Nós xa temos unha lista feita cos libros pendentes que imos ler! E vós? 

Aí vai o listado con todas as suxestións: 

• Blacksad de Juanjo Guarnido. 
• Cien años de soledad de Gabriel García Márquez.
• Con pólvora e magnolias de Méndez Ferrín.
• El ala rota de Antonio Altarriba. 
• El chico que siguió a su padre hasta Auschwitz de Jeremy Dronfield.
• El hombre que susurraba a los caballos de Nick Evans.
• El perfume de Patrick Süskind. 
• El médico de Noah Gordon. 
• El nombre del viento de Patrick Rothfuss.
• El temor de un hombre sabio de de Patrick Rothfuss.
• El nombre de la rosa de Umberto Eco. 
• El fuego de Katherine Neville. 
• El ocho de Katherine Neville.
• El señor de los anillos de J. R. R. Tolkien. 
• El viejo y el mar de Ernest Hemingway.
• Eroski Paraiso.
• La caída de los gigantes de Ken Follet. 
• La conjura de los necios de John Kennedy Toole. 
• La historiadora de Elizabeth Kostova. 
• La sonrisa etrusca de Jose Luis Sampedro.
• La tabla de Flandes de Arturo Pérez Reverte.
• La trilogía: Los hombres que no amaban a las mujeres de Stieg Larsson. 
• Las tres bodas de Manolita de Almudena Grandes.
• Los puentes de Madison County de Robert James Waller.
• Los libros de Matilde Asensi: En busca del origen perdido; El último catón; El salón del ambar; Iacobus.... 
• Los ojos amarillos de los cocodrilos; El vals lento de las tortugas; Las ardillas de central park están tristes los lunes de Katherine Pancol.
• Los pilares de la Tierra de Ken Follet. 
• Malaherba de Manuel Jabois. 
• Momo de Michael Ende. 
• Nada es tan terrible de Rafael Santandreu. 
• O Piloto de Alfonso Eire López.
• O Principiño de Antoine de Saint Exupery.
• Poema del canto jondo de Federico García Lorca.
• Senlleiras de Antía Yañez. 
• You de Caroline Kepnes.  

GRAZAS a todas e todos por participar, así da gusto!!!  

A resolución do 23 de abril de 2020, da Dirección Xeral de Educación, Formación Profesional e Innovación Educativa, pola que se adoptan medidas excepcionais no desenvolvemento das ensinanzas de formación profesional do sistema educativo e nas ensinanzas de réxime especial, ten por obxecto establecer medidas excepcionais en materia de ordenación e organización nas ensinanzas de formación profesional e nas ensinanzas de réxime especial, en desenvolvemento e aplicación das medidas de contención no ámbito educativo e de formación previstas no Real decreto 463/2020, do 14 de marzo, polo que se declara o estado de alarma para a xestión da situación de crise sanitaria ocasionada polo COVID-19, en centros educativos do ámbito de xestión da Comunidade Autónoma de Galicia durante o curso 2019-2020. 

Ante a situación de excepcionalidade e para os efectos de lle facilitar ao alumnado a realización do módulo de Formación en Centros de Traballo (FCT), flexibilízanse as condicións xerais do seu desenvolvemento. 

Así se establece que para realización da FCT no período ordinario, os centros educativos poderán nos ciclos de grao medio e de grao profesional básico, substituír a Formación en centros de traballo por unha proposta de actividades asociadas á contorna laboral, segundo o modelo do anexo I que aparece na resolución do 23 de abril de 2020. 

Actividades asociadas á contorna laboral nos ciclos de grao medio, nos ciclos de FP básica e nos programas formativos 

As actividades asociadas á contorna laboral consistirán na realización dun proxecto, programa ou plan recollido nun documento, que ten por finalidade a integración efectiva dos aspectos máis salientables da competencia xeral, e as competencias profesionais, persoais e sociais integradas no perfil profesional, e desenvolvidas nos restantes módulos do título ou programa formativo, partindo dos resultados de aprendizaxe e dos criterios de avaliación do módulo de FCT. Nos ciclos de FP básica soamente se terán en conta os módulos asociados ás unidades de competencia. 

O documento elaborarase de acordo coas características da contorna profesional do ciclo formativo, tendo en conta a prospectiva do título no sector ou nos sectores produtivos en que que se insire, as funcións propias de cada tipo de persoal técnico, e os elementos tecnolóxicos e organizativos que afectan as ocupacións e os postos de traballo desenvolvidos polos/as diferentes profesionais. No caso dos ciclos de grao medio, poderanse incluír o tratamento dos elementos relacionados coa xestión empresarial, as oportunidades de negocio e o desenvolvemento sustentable e equitativo. En todo caso, consideraranse os elementos esenciais da seguridade e A saúde laboral, a avaliación dos posibles riscos profesionais no desempeño das ocupacións, a planificación da prevención de riscos nos centros de traballo e a aplicación de medidas de prevención e protección nos postos de traballo. 

Para a elaboración do documento, poderanse utilizar como referente os modelos de guións que se detallan a continuación ou optar por outro. En calquera caso, o equipo docente deberá flexibilizar a súa elaboración e adaptar o seu contido ás circunstancias, ás características e ás capacidades do alumnado, e ás particularidades do ciclo ou do programa formativo. 

• MODELOS DE GUIÓN

Modelo A. Destinado a alumnado de ciclos de grao medio ou de FP básica 

Poderanse incluír soamente algúns dos apartados ou subapartados. 

1. Descrición das características dos sectores produtivos integrados no perfil profesional do ciclo ou programa. Poderá incluír: 

a) Características específicas dos sectores económicos vinculados en relación coa súa contorna económica. 

b) Estrutura e dimensión das empresas ou actividades produtivas. 

c) Ocupacións ou postos de traballo máis representativos. 

d) Evolución na formación dos/das traballadores/as en relación aos cambios tecnolóxicos e de planificación no sector. 

e) Influencia da tecnoloxía dixital nas empresas. 

f) Determinación dos puntos fortes e débiles do sector ou dos sectores produtivos.  

2. Identificación das necesidades dos sectores produtivos en relación co proxecto seleccionado. Poderá incluír:

a) Identificación dos produtos ou servizos máis demandados no ámbito dese actividade económica. 

b) Selección de posibles oportunidades para o desenvolvemento futuro das actividades produtivas do sector ou dos sectores. 

c) Indicación de se o proxecto trata de resolver unha necesidade detectada ou se centra nunha actividade propia do sector. 

d) Proposta dalgunha innovación, novos produtos ou servizos, ou forma de ofrecelos. 

e) Planificación dos recursos necesarios para acometer o plan. 

f) Valoración da viabilidade técnica, legal e económica do proxecto formulado (só nos ciclos de grao medio). 

g) Xustificación do proxecto seleccionado. 

3. Desenvolvemento. Dependendo da temática que se trate, poderá incluír: 

a) Definición e elaboración, de ser o caso, da documentación necesaria para o proxecto. 

b) Identificación da necesidade de autorización ou permisos para as actividades planificadas. 

c) Coordinación da execución con outros equipos de traballo. 

d) Planificación e control dos procesos ou dos servizos. 

e) Secuenciación das actividades que se vaian desenvolver. 

f) Identificación dos principais riscos laborais asociados á actividade e da súa solución. 

g) Recoñecemento dos dereitos e das obrigas de empresarios/as e traballadores/as en relación coa seguridade e a saúde laboral. 

h) Plan de igualdade entre homes e mulleres. 

i) Aplicación de medidas en relación ao respecto polo ambiente. 

j) Establecemento dos mecanismos de seguimento e control da execución do proxecto. 

k) Deseño dos mecanismos de corrección de posibles erros e desviacións. 

4. Conclusións e reflexión final. 

Modelo B. Destinado principalmente a alumnado de ciclos de FP básica ou programas formativos 

Poderanse incluír soamente algúns dos apartados ou subapartados. 

1. Descrición das características dos sectores produtivos integrados no perfil profesional do ciclo ou programa. Poderá incluír: 

a) Características específicas dos sectores económicos vinculados en relación coa súa contorna económica. 

b) Estrutura e dimensión das empresas ou actividades produtivas. 

c) Ocupacións ou postos de traballo máis representativos. 

d) Evolución na formación dos/das traballadores/as en relación aos cambios tecnolóxicos e de planificación no sector. 

e) Influencia da tecnoloxía dixital nas empresas. 

f) Determinación dos puntos fortes e débiles do sector ou dos sectores produtivos. 

2. Desenvolvemento de supostos prácticos relacionados cos resultados de aprendizaxe e cos criterios de avaliación, relativos ás actividades que o alumnado debe realizar en situacións reais nos centros de traballo. 

3.Conclusións e reflexión final. 

Orientacións pedagóxicas para as actividades asociadas á contorna laboral 

Atendendo ás circunstancias, ás características e ás capacidades do alumnado, e ás particularidades do ciclo ou programa formativo, fomentarase e valorarase o seguinte: 

1. Creatividade, autonomía e iniciativa persoal, espírito crítico e capacidade de innovación nos procesos realizados. 

2. Inclusión de elementos transversais do currículo dos ciclos ou dos programas formativos: 

a) Respecto polo ambiente. 

b) Igualdade efectiva entre homes e mulleres. 

c) Prevención de riscos profesionais. 

d) Non discriminación por ningunha condición ou circunstancia persoal nin social, nomeadamente en relación cos dereitos das persoas con discapacidade, etc. 

3. Tratamento de: 

a) Responsabilidade social e a súa conciliación cos obxectivos do desenvolvemento sustentable. 

b) Economía circular. 

c) Economía social. 

d) Desenvolvemento de aspectos que incidan na mellora das desigualdades demográficas existentes en Galicia ou que impulsen a Galicia rural. 

4. Uso das TIC. 

5. Utilización de: 

a) Documentación teórica auxiliar: bibliografía, planos, manuais de uso, guías, páxinas web de referencia, apuntamentos breves e lexislación

b) Distintos soportes documentais: vídeos, presentacións, elementos multimedia, etc. 

A avaliación das actividades asociadas á contorna laboral poderase complementar cunha entrevista profesional estruturada. 

Podedes acceder á resolución no seguinte enlace:

• Resolución do 23 de abril do 2020 

Ademais tedes a información colgada na aula virtual no apartado de orientación. 

Na páxina da Consellería de Educación, a fin de facilitar información á comunidade educativa, están dispoñibles 12 videotitoriais, nos que se amosa de xeito sinxelo como usar algúns dos servizos dixitais educativos cos que traballamos actualmente

Así temos os seguintes:

1. Dous videotitoriais sobre a aplicación para as familias abalarMóbil:

• Videotitorial sobre a instalación e rexistro de abalarMóbil
• Videotitorial sobre as funcionalidades de abalarMóbil

2. Un sobre o uso da ferramenta de e-portfolio e comunidades educativas dixitais Agueiro:

• Videotitorial sobre agueiro

3. Tres sobre o uso das videoconferencias eduXunta Webex, por parte do profesorado e do alumnado:

• Videotitorial sobre o servizo de videoconferencias Webex (profesorado organizador)
• Videotitorial sobre o servizo de videoconferencias Webex (alumnado)
• Videotitorial sobre o servizo de videoconferencias Webex: que navegador usar en equipos Linux

4. Un sobre o uso da mensaxería na comunicación coas familias por parte do profesorado a través de espazoAbalar:

• Videotitorial sobre a mensaxería a través do espazoAbalar

5. Cinco sobre as funcionalidades básicas das Aulas Virtuais dos centros educativos:

• Videotitorial sobre Aulas Virtuais:crear cursos
• Videotitorial sobre Aulas Virtuais:crear etiquetas e engadir ficheiros
• Videotitorial sobre Aulas Virtuais:crear tarefas para o alumnado
• Videotitorial sobre Aulas Virtuais:corrixir tarefas do alumnado
• Videotitorial sobre Aulas Virtuais: creación e xestión de foros

Os videotitoriais están dispoñibles na canle Youtube de espazoAbalar e no Espazo de servizos dixitais educativos dentro das seccións App de comunicación abalarMóbil, Ferramenta de portfolio Agueiro, Servizo de videoconferencia Webex, Servizo de comunicación espazoAbalar e Aulas Virtuais.

Estes recursos veñen a reforzar todos os materiais e manuais empregados nos procesos de formación do profesorado e que están publicados no Espazo de servizos dixitais educativos do espazoAbalar e na Aula Abalar Aberta. 

A Universidade da Coruña (UDC) ofrece unhas xornadas de portas abertas virtuais, na que os estudantes e as familias poderán coñecer por dentro esta Universidade e podrán interactuar cos responsables das titulacións, , os vindeiros xoves 23 e venres 24 de abril.

Tamén poderedes coñecer os servizos e unidades que os van a facer máis fácil e atractiva a VIDA UNIVERSITARIA: UDC Internacional, residencias públicas, centro de linguas, cultura, deporte, , cooperación e voluntariado, medioambente, UDC saudable, atención á diversidade, acción titorial, asociacións estudantís, emprego...

Podedes ver toda a información das Xornadas, na que figuran agrupados por ramas de coñecemento os 41 Grados, 7 Programas de Simultaneidade e 2 Graos Abertos que lles ofrecemos para o vindeiro curso 2020-2021.

Tedes toda a información completa e os enlaces para acceder ás xornadas na aula virtual no apartado de orientación. 

A Oficina de Información Universitaria (OIU) da Universidade de Santiago de Compostela (USC) viuse obrigada a suspender a súa actividade presencial pero podedes contactar con esta oficina a través do correo electrónico: oiu@usc.es.

Así mesmo puxo a disposición do alumnado un servizo de chat e videoconferencia os mércores de 10 a 14 e de 16 a 19 horas, podedes ver a nova completa na aula virtual do instituto no apartado de orientación, aí tedes os enlaces para acceder a este servizo. 

Nestes momentos que estamos a vivir, vémonos obrigados a traballar dende a nosa casa e empregar ferramentas dixitais para levar a cabo o noso proceso formativo. 

Moitas das actividades formuladas na aula virtual do instituto veñen nun formato de documento de texto e, ás veces, nos nosos medios informáticos non temos as ferramentas ofimáticas adecuadas para poder visualizalos e traballar neles. 

Para a elaboración de documentos de texto, presentacións, etc. precisamos dun paquete ofimático de aí que vos presentemos dúas opcións gratuítas, entre as opcións existentes, que podedes empregar:  

1. O paquete ofimático "Libre Office" é software libre e gratuíto. Dispón dun  procesador de texto " Writer" e outras aplicacións que resolverían as nosas necesidades.

O enlace de descarga é:

• Libre office

2. O paquete ofimático “Apache Oppen Office”, é software libre e gratuíto. Neste paquete atoparás un procesador de texto, follas de cálculo, presentacións, gráficos, bases de datos e máis. Atópase dispoñible en varios idiomas e funciona en todos os sistemas comúns. Almacena todos os seus datos nun formato que é un estándar internacional e pode tamén ler e escribir arquivos producidos por outros paquetes de oficina. Pode ser descargado e utilizado completamente sen cargo para calquera propósito.

O enlace de descarga é: 

• Apache Oppen Office

Esperamos que vos sexa de utilidade e axuda, calquera dúbida preguntade!   

Queda aprazado o proceso de admisión das probas libres para a obtención dos títulos LOE de técnico e de técnico superior de ciclos formativos de formación profesional.

En función da evolución da pandemia causada por Covid-19 publicarase, con antelación suficiente, o calendario de admisión para as probas libres correspondentes ao curso 2019-2020.

Podese acceder a nova no seguinte enlace:

• Aprazamento probas libres obtención dos titulos LOE (FP)

Hoxe, 14 de abril, comezamos o terceiro trimestre e debemos traballar dende a casa, polo que, imos pasar moitas horas diante do ordenador realizando tarefas, consultando material, realizando videoconferencias  co profesorado, cos nosos compañeiros e compañeiras, etc., por iso é fundamental que coidemos a nosa postura corporal se non queremos sufrir molestias físicas co paso dos días. E para iso, debemos  manter unha postura correcta diante do ordenador.

Deberemos conseguir a mínima carga para a nosa columna vertebral e poderémolo conseguir se intentamos corrixir a nosa postura.

Vamos alá cuns pequenos consellos que nos axudarán a protexer algunhas partes do noso corpo: 

COSTAS: ao sentarnos nunha cadeira preferiblemente alta, debemos apoiar as costas contra o respaldo, para manter a columna recta.

ANTEBRAZOS: deben estar a unha distancia do teclado duns 10 cm e apoiados ao bordo da mesa, cuxa altura preferible pode ser de 75 a 80 cm.

CERVICAIS: se temos que agachar a cabeza para ver a pantalla estaremos ante unha mala postura, na que a cabeza e o pescozo van resentirse. Para que isto non suceda debe manterse o nivel visual da pantalla á altura dos ollos. A distancia que debemos gardar da pantalla son 45 cm aproximadamente.


PEITO E OMBREIROS: deben estar nivelados sen que ao realizar a acción de teclear deban levantarse. Ademais de que as costas estean rectas, o peito e os ombreiros, deben permanecer rectos tamén.

 XEONLLOS: deberán estar á mesma altura que a cadeira formando un ángulo recto. Regularemos a altura do asento para logralo.

PÉS: deberán estar sempre en contacto con chan ou nunha superficie; podemos empregar por exemplo un repousapés.

LEVÁNTATE e fai pausas activas cada pouco tempo: o ideal sería levantarnos da cadeira uns dous ou tres minutos por cada hora de traballo, aínda que é algo difícil. Toma un descanso e levántate sempre que poidas: vai ao baño, á cociña, a reencher a botella de auga, ..... Deste xeito non só eliminamos a rixidez muscular e favorecemos a oxixenación dos tecidos, senón que ademais ao volver sentarte volverás ser máis consciente da túa postura corporal.

Así mesmo para evitar a rixidez dos músculos podemos realizar uns discretos estiramentos e exercicios que nos van ser de axuda: 

MELLORAR A CIRCULACIÓN das túas pernas: ademais de levantarnos e camiñar un pouco, podemos realizar algúns exercicios que nos axuden a mellorar a circulación do noso tren inferior. Mentres estamos sentados na nosa cadeira podemos levantar lixeiramente un pé do chan e debuxar círculos no chan cara a un lado e cara ao outro.

Relaxar os teus ombreiros e reducir a tensión no pescozo: move os teus ombreiros de arriba cara abaixo e debuxando pequenos círculos con eles. Para mobilizar o pescozo, podemos facer xiros ao carón e a outro de forma pausada para non marearnos. Tamén podemos estirar a musculatura inclinando a nosa cabeza cara a un lado e colocando suavemente a man sobre a cabeza para exercer un pouco de presión.

MOBILIZAR A TÚA COLUMNA: sentado na cadeira realiza un par de xiros dinámicos a un lado e a outro, coma se intentases mirar cara a atrás mentres mantés as pernas cara adiante. Tamén podes flexionar a cadeira, inclinar o corpo cara adiante e intentar tocar as puntas dos teus pés: intenta ser consciente de como vas movendo cada un dos segmentos das túas costas cando subas e baixes.

Nestes momentos a adaptación ás circunstancias actuais é obrigatoria para que máis adiante non teñamos algunha lesión física (lumbalxias, protusións, hernias discais...) ou danemos o noso corpo. 

Vamos ver agora algunhas imaxes que nos poden axudar a saber cales son as posicións correctas das que non á hora de traballar: 

Nas nosas mans está que o noso corpo se adapte correctamente á súa nova forma de estudar e traballar. 

Coida a túa postura corporal!

Na situación actual que nos atopamos é importante marcar uns hábitos de exercicio dende a casa que nos permitan mellorar a nosa saúde. Deste xeito conseguiremos activar o noso corpo ante a inactividade prolongada que estamos vivindo. 

Xa sabedes: “mens sana in corpore sano.”

Ademais dos múltiples beneficios a nivel físico, a actividade deportiva proporciónanos vantaxes en saúde mental.  

Propoñémosche dedicar ao redor de 20 minutos durante o día para exercitar no recuncho de casa que che resulte de maior comodidade. A rutina baséase en 4 circuítos para alcanzar 4 obxectivos. Empezamos!

 INICIACIÓN – EQUILIBRIO 

 Se cambias o sedentarismo por realizar estes breves exercicios, o teu corpo notarao. Apoia as mans e os xeonllos no chan (se colocas unha esterilla ou toalla, mellor). Sube e baixa unha perna, co brazo contrario estirado, e mantén as costas rectas mentres o fas. Logo, cambia de perna e de brazo, facendo 20 repeticións con cada variante.

DEFINIR CORPO – SENTADILLA A UNHA PERNA 

Non necesitas pesas para desenvolver a musculatura. Ponte de pé cos brazos en extensión. Levanta un pé, flexiona o xeonllo contrario e baixa tanto como poidas, mantendo as costas rectas, sen que o pé levantado toque o chan. 

Repite 5 veces con cada lado.

GAÑAR FORZA – FLEXIÓNS

Este exercicio axudarache a incrementar a forza nos brazos. Colócate en posición de facer flexións, coas mans apoiadas no chan e á altura dos ombreiros. Flexiona os brazos e baixa o peito ata tocar o chan, lentamente. Volve levantarte. 

Fai 10 repeticións.

QUEIMAR CALORÍAS – SALTOS JUMPING JACKS

Acabamos cun exercicio ideal para queimar calorías. Empeza de pé, cos brazos pegados ao corpo e as mans xuntas. Salta lixeiramente e separa as pernas á vez que abres os brazos. Dá un salto cara atrás para volver á posición inicial. 

Fai 15 repeticións. 

E finalizamos animándote a realizar estes exercicios cando queiras, xa que se poden levar a cabo sen gastar en equipamento, de forma individual ou colectiva. 

ACTIVA O TEU CORPO!!!