Benvidos ao curso 2013 2014, desde hoxe mesmo iremos publicando distintas entradas no blog sobre as actividades que imos  facer no Instituto

Queremos felicitar aos alumnos e alumnas de 4º ESO A polo seu traballo que gañou o Primeiro Premio do I Certame de Audiovisuais de Amnistía Internacional: "Nenos e Nenas Soldados"
Dous días de preparación do guión, outros dous de gravación no instituto e algún máis de montaxe deron lugar a unha peza inspiradora, emotiva e impactante na súa sinxeleza. Como curiosidade diremos que as testemuñas que se escoitan no vídeo son rigorosamente certas, o que incrementa a súa crueza en contraste coa inxenuidade dos xoguetes infantís que se mostran. Felicitamos ós alumnos que realizaron o audiovisual por un traballo profundo e sentido.

Os alumnos de francés de 3º, 4º E.S.O e 1º BAC realizamos do 13 ao 21 de marzo unha viaxe de estudos a Bordeaux, Paris e Poitiers.

Foi unha experiencia inolvidable que permanecerá na nosa memoria ao longo das nosas vidas. Á parte de practicar a lingua francesa, coñecemos a súa cultura, quedamos encantados coas súas comidas como a quiche, a galette, a crêpe de nutella.

 Con este vídeo queremos que vos fagades unha idea da nosa extraordinaria estancia en Francia.

Aquí vos deixamos un pequeno vídeo resumo do concerto da cantante e compositora Sés, que tivo lugar no auditorio da Illa de Arousa o día 30 de Abril. Asistimos os dous IES de Vilanova xunto co da Illa de Arousa, o que fixo que se enchera o local.
No vídeo mestúranse fragmentos das cancións con pasaxes dos ocurrentes comentarios da artista, que fixeron as delicias de todos vós…
Gustaríanos que non só recordases as súas  cancións ou  bromas, senón tamén algúns dos consellos que, sobre todo vós, rapazas,  puidestes escoitar.

Por certo, temos que dicirvos que tivestes un comportamento excelente, que resultou unha experiencia moi agradable e estamos dispostos a levarvos a calquera outra actividade.

Celebrouse o día 19 de abril no Auditorio de Vilagarcía de Arousa o II Encontro de alumnos de música de ensinanza secundaria de Galicia, organizado por ASOMUSICA, no que participaron 15 institutos chegados dende toda Galicia.

O departamento de música do IES  A BASELLA considerou importante participar nel,  polo que de socialización, estímulo académico e artístico ten nos alumnos a participación nestes eventos. Unha nutrida  e cualificada selección de 38 alumnos de todos os cursos onde se dá a materia de música (2º ESO ata 1º BACHARELATO incluídos), participou con gran éxito interpretando O RAPAGALO, un mix dunha creación rapeira con letra das alumnas de cuarto de ESO, Haizea Compañ e Noelia Núñez , que falaba das inquedanzas dos mozos nestes tempos que corren, mixturado cunha adaptación da cantiga tradicional O GALO do mítico grupo de gaitas, OS CAMPANEIROS de Vilagarcía da Arousa, amosando que modernidade e tradición poden darse a man e crear novas linguaxes artísticas (o tema deste ano do encontro era A MÚSICA GALEGA  en todas as súas acepcións, variantes, épocas e estilos). Despois da actuación , varios dos centros participantes desprazámonos ao Parque Natural do Carreirón, na Illa de Arousa, para un xantar de pícnic.

Tanto a actuación artística como o comportamento dos participantes na actividade  foi impecable e xa estamos todos contando as horas para poder volver participar no terceiro encontro o vindeiro curso. Dende o departamento de música, só felicitar e darlle as grazas  aos  alumnos participantes , ao centro por apoiar a iniciativa  e á profe Uxía Nogueira, que xentilmente nos acompañou na xornada.

Se queredes ver a galería de imaxes pulsade no seguinte collage