O PROXECTO DE SANDRA S. 

Co motivo desta situación de pandemia que estamos a padecer, moitas persoas fixéronse conscientes do estilo de vida que queren levar, cambiando as présas e o estrés por unha vida máis tranquila e sosegada. Como consecuencia disto, moita xente está apostando de novo polo rural, son máis conscientes á hora de mercar e por elo comezan a apoiar ó comercio local. Ademais de todo isto, a Sandra gústalle o estilo casual e relaxado, decatouse que para mercar a roupa que lle gustaba, era preciso acudir ás grandes cidades, xa que as tendas locais da zona onde reside, ofrecen pouca variedade de produtos e estilos, así como escasa calidade. Por todo isto, Sandra decide por en marcha á marca Shanti, dando a posibilidade de ofrecer prendas de calidade e versátiles nun Concello situado no rural galego para as mozas e mulleres da zona, tendo como guía os seus gustos e estilos, sen a necesidade de ter que desprazarse ata as grandes cidades e vilas para mercar. Prendas únicas, exclusivas, versátiles e funcionais, que permiten a liberdade de movemento e que ben combinadas, poden empregarse tanto para o día como para a noite, conseguindo que as clientes poidan crear un bo fondo de armario con poucas prendas de boa calidade e duradeiras no tempo.. O nome de Shanti, para os amantes do ioga coma Sandra, esta palabra soaralles moito, xa que Shanti significa paz, tranquilidade, benestar ou felicidade. O obxectivo, é que cando alguén entre en Shanti, encontre un lugar tranquilo, con un ambiente cálido, onde a clientela se sinta a gusto e poida observar con calma cada produto. Ademais atoparán un trato único e exclusivo, con prendas que se poden adaptar ás medidas de cada clienta ou prendas feitas á medida, facendo que as clientas síntanse coma na súa casa.

Sandra presenta un vestido asimétrico corto fluído, cun corte na cintura, manga xaponesa e volante no escote rematado con cordoncillo ou rulino. O dianteiro, na parte superior, ten uns traslados de pinza a catro pregos que van tombados cara ós costados e na parte inferior, ten dúas pinzas de talle. Nas costas, na parte superior, tamén ten un traslado de pinza a catro pregos tombados cara ós costados e na parte inferior, leva un prego encontrado no centro das costas. O vestido cerra cun cinto á altura da cintura, o cal vai suxeito nos dous extremos superiores dianteiros (entrando o extremo esquerdo polo interior da prenda do costado dereito, saíndo e pasando polas costas ata atar co extremo do lado dereito). Ademais ten dous petos nas costuras dos costados e dúas mangas xaponesas curtas (a altura dos cóbados). A parte exterior do vestido, o volante e o cinto son dun crepe floral. O interior vai rematado con forro e vistas de 3 cm de ancho, que van entreteadas. O forro e vista inferiores van rematas con rulino ou cordoncillo na parte que vai sen coser, unidas ó vestido cunha puntada invisible. Para evitar que o tecido estire, na zona do escote e na dos costados da parte inferior, leva unha ligueta. 

O PROXECTO DE MELANIE

Tras observar o crecente interese pola confección na casa, en gran parte causado polo emprego das novas tecnoloxías que permiten aproximar o noso oficio dunha forma sinxela e interactiva mediante vídeos explicativos, titoriais en blogs…etc., o afán do consumidor polo único, o exclusivo e ademais creado coas súas propias mans, fixo que a Melanie ocorréselle a idea de crear unha marca “Meru Patterns” para a creación dende cero de todo tipo de patróns (Saias, pantalóns, camisas, abrigos, bolsos e demais complementos) distribuídos de forma online a través da súa páxina web, onde se van subindo patróns xunto cunha guía de montaxe, un vídeo onde se explica dun xeito moi sinxelo toda a confección do deseño e un pequeno anexo onde recoméndanse os tecidos máis axeitados para a confección do modelo.

O principal obxectivo do proxecto de Melanie a través de “Meru Patterns”, é proporcionar todo tipo de patróns e crear unha gran galería online para que calquera persoa poida ter acceso a eles para logo que cada quen poida cortar e confeccionar na súa casa calquera deseño dun xeito sinxelo.

Melanie presenta un vestido liña A de longo ata o chan feito en Piqué Waffle e Tul. Este vestido combina partes en tul coma a peza dianteira superior, as mangas de media lúa cosidas ó corpo con costura francesa e o volante do peito. As outras partes do vestido, en conxunto o piqué e o tul, formando o corpo do vestido. A peza en piqué ten un longo ata o xeonllo namentres que o tul é máis longo e chega ata o chan. No dianteiro o escote é barco, en cambio, nas costas cae en pico, ámbolos dous rematados cun vivo de tul e pespunte. O escote
está rematado polo seu interior cunhas vistas entreteadas e o resto da prenda cun forro de longo ata o xeonllo coma o tecido de piqué exterior. O volante superior vai por todo o dianteiro, polo baixo da manga de media lúa e polas costas, vai fruncido e ten un ancho de 9cm. O baixo do vestido en tul e o volante da parte superior do vestido, van rematados coas ondas que tiña xa o tecido de por si. Petos nas costuras dos costados a 4cm por baixo da cintura. 

O PROXECTO DE ANDREA

Con moita ilusión Andrea presenta “A n d r e a M o d a” un pequeno comercio dedicado á confección de prendas para eventos, con dúas opcións de mercado, a compra e o alugueiro das prendas, así coma un taller multidisciplinar no que os valores como a reciclaxe e a sostibilidade son prioridade. Unha vez ó mes, Andrea realiza un taller DIY (‘’Do It Yourself’’) simplemente porque en AndreaModa son coñecedores que ás persoas contemporáneas gústalles facerse cousas para elas mesmas. Todo isto realizase nun espazo aberto á colaboración, participación e formación colectiva dos empregados. ¿A quen non lle pasou algunha vez ter que repetir vestiario nalgunha primeira comuñón, voda ou bautizo por falla de presuposto? Pois para que isto non ocorra, Andrea propón o alugueiro de prendas, un xeito de non repetir vestiario dunha forma económica.  

Presenta un vestido curto por enriba dos xeonllos, dianteiro con costadillo redondo e escote en pico rematado cunha vista interior entreteada e pespunte de carga, cinturilla con forma e manga xamón 3/4. Nas costas o vestido está aberto e rematado cunha vista interior, saia fruncida e cremalleira invisible no centro traseiro. Petos en ámbolos dous laterais da saia incrustados na costura. Tanto o baixo da saia, e o puño da manga, van rematados co forro de xeito que toda a prenda queda embolsada. Cremalleira de 20cm no centro traseiro.

O PROXECTO DE CRISTINA

Cristina escolleu coma nome para o se proxecto INNA, así é como a pequena sobriña de Cristina comezou a chamala a ela, collendo as derradeiras sílabas de Cristina e engadindo un “N” para darlle un toque máis persoal e para que soe mellor.

En INNA, Cristina pretende crear prendas con actitude, que cando calquera muller vista as súas prendas, síntase empoderada e segura, dándolle ás prendas un valor emocional e non só económico. En INNA lévanse a cabo tódolos procesos, tanto o seu deseño, coma a patronaxe e a confección. A finalidade é que as clientas síntanse especiais levando as prendas de INNA, as prendas adáptanse a elas e ó seu estilo, dando así un servizo de personalización, tanto como para decoralas como para adaptalas o seu corpo. As personalizacións van dende quitar algún aplique que inicialmente leva a prenda, ata poder trocalo tecido, o tipo de puño que leva a prenda, cambiarlle o tipo de escote.... entre outras ideas, calquera cousa que se lles pase pola cachola, en INNA intentarase facela realidade, partindo sempre dos deseños iniciais da marca... así, as clientas, séntense participes do deseño.

Cada prenda contará cunhas unidades limitadas, para darlles unha esencia máis exclusiva. Por outro lado, en INNA iranse facendo pequenos cambios para intentar deixala menor pegada posible no planeta, así os envíos realizaranse en paquetes elaborados con millo, reducindo así o emprego do plástico. Cristina escolleu para o seu proxecto un vestido asimétrico, moi especial, cunhas cores vivas e cheas de enerxía, que representan a marca e que reflicten a ilusión de Cristina.

Vestido curto asimétrico, con manga abullonada no brazo dereito, rematada cun dobladillo dobre. Corpo con costadillo francés no dianteiro e nas costas. O lado esquerdo-dianteiro palabra de honra, axustado, facendo unha forma redondeada na parte superior. O lado esquerdo das costas é recto, e para o cerre ten unha cremalleira na parte central. A parte inferior dianteira leva dúas capas superpostas, a superior con dous pregues inclinados, e a inferior é lisa con dúas pinzas para axustala. Ámbalas partes fan unha forma redondeada dende a cintura ata o baixo do
costado, rematadas cunha vista interior entreteada, facendo así un efecto tulipán. Leva dous petos escondidos nas costuras dos costados á altura da cadeira. Nas costas leva unha costura no centro e unha pinza a cada lado, cunha abertura simple no baixo do centro traseiro. Tanto a parte superior, coma a inferior están forradas e rematadas con vistas entreteadas. A manga vai rematada na sisa cun bies.

O PROXECTO DE AROA 

AV Atelier é a marca de moda creada por Aroa Veiga, centrada na creación de prendas artesás, cunha patronaxe innovadora, onde a calidade, personalización, comodidade e versatilidade son os eixos fundamentais que caracterizan as prendas que se elaboran en AV Atelier, sempre seguindo o bo facer que caracteriza á xastraría.
Aroa sempre estivo vinculada ó mundo da artesanía. Tivo a oportunidade de formar parte de varias empresas do sector, coma o atelier do Plumassier Serkan Cura en París, o cal realiza parte das ás que caracterizan os desfiles de Victoria’s Secret. Tamén traballou coma asistente durante catro anos do gran patronista xaponés Shingo Sato (as técnicas que caracterizan a Shingo Sato son empregadas por Aroa para facer o origami da manga do top e o pantalón presentadas por Aroa no proxecto). Ademais participou en empresas de carácter máis industrial, coma Maria Moreira ou a marca internacional Desigual. A isto hai que sumarlle a súa máis recente experiencia na xastraría Raúl Rodríguez en Béjar, realizando a FCT do noso ciclo superior de Patronaxe e Moda. Ademais imparte cursos de tintes ou tecedura, este último grazas a que posúe a carta de artesá galega, nas modalidades de confección e complementos da moda. Toda esta experiencia profesional, xunto coa formación académica en deseño e no ciclo superior de Patronaxe e Moda, Aroa pretende envorcalo en AV Atelier.

A gran artesanía tradicional téxtil conseguía ofrecer un produto a medida para cada consumidor, converténdoa en única. Co paso do tempo, e a excepción das grandes casas da moda, a artesanía non sufriu unha gran evolución en canto a deseño. Coma consecuencia, actualmente non ofrece un produto acorde cos desexos e necesidades do mercado, no que a personalización e a diferenciación cobran cada vez máis importancia, especialmente no público máis novo e vangardista. Aroa Veiga pretende ofrecer unha resposta a esta necesidade, cun produto versátil, cómodo e con siluetas e patróns que se saen da norma.  
“Recoger el buen hacer de la artesanía clásica, llevándolo a la actualidad”, “La belleza de la artesanía nunca pasa de moda” Este é o Slogan creado por Aroa, no que se reflicte a alma da marca, é a busca por darlle valor á artesanía, aproximándose a un mundo actualizado, ás tendencias do momento, á xuventude, mostrando a súa beleza dun xeito innovador.

Para o seu proxecto Aroa xoga cos tecidos e siluetas clásicas para crear un produto innovador e mostrar que a artesanía segue tendo un oco no mundo dominado polo fast fashion. Nesta primeira colección, as siluetas están inspiradas e construídas coa técnica do gran patronista xaponés Shingo Sato.

Presenta un traballo meticuloso, un conxunto de top con pantalón. O top por enriba do embigo, con cremalleira negra de nylon aberta YKK no centro dianteiro, falsa capucha nas costas e na zona do canesú dende o dianteiro, traslado pinza de peito e talle a ombro prolongando ó canesú das costas facendo o efecto de falsa capucha, o cal leva uns atacados para suxeitala capucha a 4cm dende o ombro e a 2 cm do escote, e un pespunte,
tamén para suxeitala capucha, de +/-7cm no centro das costas na zona do escote. A parte baixa das costas está dividida en tres partes, unha peza central e dúas pezas laterais. A parte interior do top está confeccionada co mesmo tecido exterior. Mangas con pregues intercalados en orde descendente, “origami” e puños lisos sen pregues. Tódolos pregues da manga están reforzados cunha entretea no interior. En canto ó pantalón, é longo e recto, de talle alto con cinturilla recta e botón de presión. Pespunte ó canto na costura da cinturilla co pantalón. Pregues cruzados intercalados no lateral en orde descendente “origami” e peto oculto nun dos primeiros pregues. Con forro interior e baixo do forro cosido ó tecido principal. Cremalleira negra de nylon no centro dianteiro sen pespunte de adorno.  
A simple vista resalta a complexidade da patronaxe, dende a falsa capucha ata o origami da manga do top e do pantalón.

A escalaxe, feita no equipo informático de patronaxe da aula, Lectra PGS Modaris V12, tamén resultou ser moi complexa xa que tanto o pantalón como a manga teñen que ir incrementando de tamaño talla a talla para axustarse á táboa de medidas co incentivo de ter que escalar tódolos pregues do origami. Tamén non resultou menos dificultosa a confección xa que para darlle consistencia ós pregues houbo que entretear soamente os pregues exteriores.

ENLACE  https://www.instagram.com/av.atelier.av/