Skip to Content

Animación á lectura

TECENDO COMUNIDADES

Mér, 25/10/2023 - 17:04 — admin

Con este lema "Tecendo Comunidades" pretendemos destacar o papel fundamental que ten a biblioteca na construción de lazos coa comunidade do noso centro. A nosa biblioteca non é só un espazo cheo de libros, senón un espazo de encontro, un espazo vivo motor das aprendizaxes e un espazo para a lectura e a creación.

Por iso, o pasado 24 de outubro celebrouse o día das Bibliotecas. Para conmemoralo, inauguramos este curso a Biblio de Toni creando un "MARCAESTANERÍAS" para cada usuario, empregando materiais plásticos. A finalidade e uso deste material e axudar na organización e orde dos nosos fondos, facendo máis autónomos a todos os usuarios, especialmente os máis pequenos, á hora de seleccionar e recolocar os libros que van lendo.

Foi divertido crear todos xuntos os nosos propios marcaestanterías no marco da biblioteca, comezando así a nosa aventura lectora deste curso.

Donas de Si

Mar, 24/10/2023 - 21:12 — admin

O xoves 19 de outubro desenvolveuse no noso centro un contacontos pola igualdade, unha das actividades que nos ofreceu o Programa Donas de Si, enmarcado dentro do Plan Proxecta.

Este, consistiu en desenvolver un proxecto relacionado coa visibilidade e empoderamento das mulleres como pezas fundamentais do desenvolvemento da sociedade galega e como punto de partida para traballar nas nosas aulas a igualdade e os estereotipos de xénero.

Nesta proposta, narrativa e plástica, o escritor Enrique Mauricio e a ilustradora Tania Solla presentaron ao alumnado do noso centro a obra de Rosalía de Castro, ademais de ensinarnos pautas para crear as nosas propias ilustracións de Rosalía. Resultou unha sesión ben interesante!


Outubro: mes do Samaín na biblioteca

Lun, 02/10/2023 - 20:00 — admin

Este mes na biblio teremos unha pequena mostra bibliográfica para os nosos nenos e nenas sobre o Samaín con contos de medo e libros horripilantes!

Habemus meses temáticos

Lun, 02/10/2023 - 19:35 — admin

Como novidade este curso académico teremos meses temáticos na biblioteca. Así, entre os meses de outubro a maio, o alumnado terá unha selección de libros á súa disposición sobre unha temática concreta. A lectura e os libros son un recurso imprescindible para o proceso formativo dos nenos e nenas, permiten imaxinar, descubrir, viaxar e coñecer o mundo que nos rodea.

Asi que... non deixes para mañá o que poidas ler hoxe!

Viaxando polo mundo con Sabela Gago

Xov, 25/05/2023 - 17:55 — admin

Unha vez máis o pasado 24 de maio tivemos a sorte de recibir a estupenda contacontos Sabela Gago que nos deleitou facéndonos viaxar polas cidades e lugares máis famoso e marabillosos do planeta como París, Londres, Roma, Sao Paulo, Nova York, Sevilla...

Rematamos a aventura na gran muralla chinesa xunto a dous ratiños amigo, Sofía e Martín, cos que visitamos o sol nun foguete, as nubes nun avión e o vento nun helicóptero.

Se queredes saber máis sobre esta actividade premede no vídeo:

Trocalibros solidario

Ven, 21/04/2023 - 17:17 — admin

A terceira e derradeira actividade desta semana foi o "Trocalibros Solidario". Un ano máis todo o alumnado do cole intercambiou libros que tiña na casa e que xa non lía para darlle unha segunda vida e que poidan ser usados por outros nenos e nenas novamente. É unha maneira estupenda de reutilización e reciclaxe de libros! 

Semana do libro: Apadriñamento Lector

Mér, 19/04/2023 - 16:47 — admin

Esta semana conmemoramos a Semana do Libro coa realización de varias actividades. A primeira delas foi a realización do "Apadriñamento Lector" no que cada padriño e madriña cos seus afillados e afilladas leron un conto da súa elección. Posteriormente levamos a cabo un coloquio no que reflexionamos sobre porqué se celebra o día do libro e que significa o libro para cada un de nós.

Quedámonos cunha interesante idea dun alumno que dixo que "ler é como viaxar sen moverse do sitio". Para rematar o día, por grupos, fixeron debuxos sobre os seus personaxes ou contos favoritos e sobre o que significa o libro para eles cos que elaboramos un fermoso mural.

 

O xardín de Rosalía

Mar, 28/02/2023 - 19:24 — admin

Rosalía de Castro é unha figura fundamental para a lingua e a cultura galega. Constitúe todo un emblema en Galicia e, por iso, o alumnado do centro conmemorou, este xoves 23 de febreiro, a data de nacemento da escritora galega máis universal elaborando un “Xardín de Rosalía” con anacos dos seus poemas escritos nun xardín de flores.

Dentro vídeo!

Contacontos con Sabela Gago

Dom, 29/01/2023 - 14:08 — admin

O pasado xoves 26 de xaneiro recibimos a visita de Sabela Gago, unha gran actriz e marabillosa contacontos, que nos convidou a soñar coa nosa imaxinación. 

Sabela trouxo consigo contos cargados de aventuras e emocións. Todo o alumnado e profesorado gozamos moitísimo! 

Foi unha divertida viaxe a través da nosa imaxinación. Se podes imaxinalo, podes crealo. A lectura ábrenos as portas do mundo que nos atrevamos a imaxinar. 

Grazas Sabela por contaxiarnos o teu amor polos libros viaxando coa imaxinación. Foi unha xornada fantástica! 

Día da biblioteca escolar

Mér, 26/10/2022 - 13:29 — admin

O 24 de outubro celebramos o Día da Biblioteca Escolar e non atopamos mellor maneira de facelo que inaugurando o Apadriñamento Lector agora que xa podemos estar todos xuntos. O alumnado de 3º, 4º, 5º e 6º de primaria son os padriños e madriñas do alumnado de educación infantil e de 1º de primaria. Para esta actividade os padriños e madriñas escolleron, cos seus afillados e afilladas correspondentes, un libro para ler nos diferentes recunchos da biblioteca e das aulas. Logo da lectura fixeron un debuxo sobre o que máis lles gustou do libro e con todos eles elaboramos un fermoso mural.

Gozamos dunha agradable e divertida sesión pois o apadriñamento lector é unha experiencia fantástica para o fomento da lectura que ademais fai que os nenos e nenas creen uns lazos afectivos que non deixan indiferente a ninguén.

Así de ben o pasamos!


Distribuir contido


by Dr. Radut