Era a fin do verán, nese fugaz momento no que o día se despide e a noite comeza a envolver a paisaxe costeira. Nunha praia de Mañón, as mareas traían dende moi lonxe unha botella de cristal cunha carta no seu interior. O vidro brillaba sutilmente baixo as últimas raiolas de sol que atravesaban as nubes e ao seu carón, unha estrela de mar descansaba estendendo os brazos sobre a area, exhibindo as súas cores vivas e relucentes. 

Sobre as rochas, alzábase o faro, maxestoso e robusto. A súa luz xiratoria irradiaba un resplandor suave e reconfortante, guiando aos navegantes na escuridade.

No horizonte, máis aló da Coelleira, divisábase a silueta dun barco solitario, navegando hacia a inmensidade.

Que segredos gardaba aquela mensaxe selada no cristal?

A carta estaba asinada por unha tal "Ánxeles Alvariño", unha científica dos mares que se atopaba nalgún lugar do océano Atlántico e precisaba da nosa axuda...

Así comezaba esta aventura, un proxecto sobre o mar co que, a través dos retos de investigación que nos propón nas súas cartas a nosa oceanógrafa favorita, estamos a descubrir e aprender moitas cousas interesantes sobre o mar. 

O pasado martes, 31 de outubro, celebramos o Samaín no CEIP Francisco López Estrada.

Pola mañá fixemos obradoiros de cociña, ciencias, artesanías, xogos, bailes.... E pola tarde, o Concello de Mañón tróuxonos un espectáculo da compañía de teatro Tarabela Creativa.

Facendo click nas diferentes ligazóns, poderedes ver fotos, vídeos e outros materiais das actividades levadas a cabo.

Hoxe tivemos unha divertida clase de danza tradicional. Miguel, profe de baile da asociación O Son do Sor, ensinounos a bailar unha muiñeira e, aínda que ao principio a algún/ha se lle enredaron un pouco os pés, ao final conseguimos facer unha coreografía do máis xeitosa que seguiremos practicando ata poder bailala á perfección no Día das Letras Galegas.