Título node Learning object

En que consiste

Ao abeiro do convenio de colaboración para a obtención do Diploma de estudos en lingua francesa na súa versión escolar ( http://www.edu.xunta.gal/portal/node/19401 ) -asinado o 29 de xuño de 2016 entre a Consellería de Cultura, Educación e Ordenación Universitaria e o Servizo de Cooperación e de Acción Cultural da Embaixada de Francia en España- que, na súa cláusula quinta, establece a habilitación do profesorado de francés para examinar e corrixir as probas dos exames do DELF escolar, convócanse dous cursos de formación.

Ambos os dous cursos serán impartidos por formadores acreditados polo CIEP -Ministerio de Educación de Francia a través do Servicio de Cooperación y acción cultural de la Embajada de Francia en España-, homologados pola Consellería de Cultura, Educación e Ordenación Universitaria da Xunta de Galicia e contarán cunha certificación de 10 e 20 horas de formación permanente do profesorado respectivamente.

Modalidades de destinatarios/as

1) Curso:  Avaliar segundo os criterios do MECRL.

Obxectivo: Adquirir, reforzar e compartir ferramentas didácticas e prácticas para avaliar as probas do DELF escolar e preparar ao seu alumnado para as ditas probas.

Duración: 8 horas.

Datas: 19 e 20 de xaneiro ou 26 e 27 de xaneiro.

Horarios: de 16h a 20h

Lugares de realización:

A Coruña: 19 e 20 de xaneiro.

Lugo: 26 e 27 de xaneiro.

Ourense: 26 e 27 de xaneiro.

Santiago de Compostela: 19 e 20 de xaneiro.

Vigo: 19 e 20 de xaneiro.

Perfil do profesorado: 

• Profesores especialistas de lingua francesa.

• Profesorado que imparte unha sección bilingüe en francés que acredite posuír o título C1 no MCERL.

Prazas: máximo de 12 prazas por lugar de realización do curso.

Para poder configurar o grupo requírese un mínimo de 6 persoas participantes.

2) Curso: Habilitación oficial para examinar e corrixir as probas do DELF escolar.

Obxectivo: Avaliar as habilidades das persoas candidatas ao DELF escolar segundo as pautas que rexen o diploma en cada nivel (A2, B1 e B2).

Duración: 20 horas lectivas.

Datas: 16, 17, 18, 23 e 24 de febreiro.

Horarios: 16,17 de febreiro de 16h a 20h.

18 de febreiro de 10h a 14h.

23 e 24 de febreiro de 16h a 20h.

Lugares de realización: A Coruña, Santiago de Compostela e Vigo.

Perfil do profesorado:

• Profesorado de ensinanza secundaria especialista en lingua francesa.

Para acceder ao curso terá preferencia o profesorado que acredite ter preparado o seu alumnado para os exames do DELF en convocatorias anteriores e que teña participado no curso anterior: Avaliar segundo os criterios do MCERL.