Velaquí estamos un curso máis para emprendermos xuntos un camiño feminista e en galego. A nosa intención é levar a diante un proxecto compartido do que vos iremos falando e que leva como título Adiantadxs. Alén diso, haberá outras actuacións específicas tanto do CI como do EDLG.

Como xa sabedes os que viñestes ás reunións, fixemos dous grupos: o dos xoves (alumnado de 1º e 2º da ESO) e o dos martes (resto). Ollo!!! Estas quendas poden estar suxeitas a cambios para compensar.

Aquí iremos publicando as nosas actividades propostas e realizadas, ademais dos materiais complementarios para levalas a cabo.

O xoves pasado, 9 de xuño, tivemos o pracer de coñecer a Priscila Retamozo quen impartiu un obradoiro de igualdade centrado en como combater o machismo nas novas tecnoloxías.

Priscila Retamozo Ramos é politóloga, está especializada en coeducación, violencia contra as mulleres e políticas públicas con perspectiva de xénero. Ten experiencia como Asistente técnica na ONU Mujeres Ecuador, así como impartindo cursos, obradoiros e ponencias para a sensibilización e prevención da violencia de xénero, o fomento do bo trato e a coeducación.

E, en relación a isto, Priscila é tamén coautora da obra Comando igualdade xunto con Chis Oliveira  denominación dunha marabillosa e inspiradora iniciativa levada a cabo no IES Alexandre Bóveda de Vigo que foi un punto de inflexión no desenvolvemento de estratexias feministas e ruptura de prexuízos. 

Con Priscila, prendemos e desaprendemos porque hai que desbotar para avanzar.

O venres da semana pasada, 27 de maio, militantes e colaboradores do sindicato estudantil galego ERGUER estiveron no noso centro para falarnos de prexuízos lingüísticos tanto en 1ºBACH como en 4º da ESO. Nós aproveitamos o recreo para falarmos con eles sobre outro tipo de prexuízos, os machistas, que tanto entorpecen o noso desenvolvemento como comunidade. De feito, comentáronnos que agora estaban cos obradoiros de sociolingüística pero o curso pasado traballaron o tema da igualade en diferentes institutos de Galicia.

Foi un pracer falar con eles  e ver que o voluntariado comprometido consegue metas.

A través do programa municipal pola diversidade sexual, Pinto e Maragota, o Concello de Pontevedra promove a IV xornada de formación Pinto e Maragota "A diversidade sexual e de xénero nas aulas".

Esta actividade ten os seguintes obxectivos:
1.Facilitar ao profesorado información sobre a situación legal do colectivo LGTBIQ, en relación aos protocolos educativos.
2.Fornecer ao profesorado de recursos literarios, informativos e audiovisuais para tratar a diversidade sexual e de xénero na aula.
3.Dar a coñecer redes de traballo educativo e casos de éxito no tratamento da diversidade sexo-xenérica na aula.

Contidos da actividade:
1.A diversidade nas aulas. Datos e necesidades.
2.Diversidade sexual e de xénero na infancia e na adolescencia.
3.Aspectos legais relativos ao colectivo LGTBIQ.
4.Experiencias positivas de tratamento da realidade LGTBIQ no ámbito educativo.
5.Aspectos históricos e sociais das reivindicacións LGTBIQ.

Código e título: P2102034 A diversidade sexual e de xénero nas aulas
Data: sábado 21 de maio de 2022
Lugar: Salón de Actos do Pazo da Cultura (Pontevedra)
Duración: 8 h (presenciais)
Programa: pódese consultar o programa da actividade no PDF anexo.
 

O oersoal docente en activo pode formalizar a matrícula nesta actividade a través de FPROFE.

Esta actividade está aberta a outros colectivos; neste caso, para realizar a inscrición cómpre dirixir a solicitude ao seguinte enderezo electrónico: info@pintoemaragota.gal

Aquí vos deixamos o programa, animádevos a aisitir!!!

A (des)memoria nas aulas

Este sábado 30 de abril, celebráronse no antigo edificio da Delegación de Educación en Pontevedra, as Xornadas chamadas "A (des)memoria nas aulas" organizadas pola Deputación de Pontevedra, a través do seu departamento de Memoria  Histórica. As profesoras Anxos Rial e Conchi Díaz, acompañadas por 3 alumnos destes centro (Carme Fernández, Gabriel Tomé e María Araújo), foron invitadas polas súas aportacións a este tema a través dun proxecto realizado cos alumnos de 4º ESO.

O obxectivo das Xornadas é facilitar un lugar de encontro para que o profesorado da provincia poida coñecer novos recursos, ideas e proxectos para abordar nos centros de ensino a Guerra civil, a ditadura e a represión.