O alumnado de 4º da ESO (grupos C e D), asistiu o venres 22 á charla – coloquio: “Nós de onte a hoxe. Cen anos de historia”, impartida pola catedrática de Lingua galega e Literatura da Universidade da Coruña, María Pilar García Negro.
Antes de comezar a súa exposición sobre o Grupo Nós e a súa importancia na nosa literatura, Pilar García Negro mostrou a súa querenza pola nosa cidade, xa que naceu aquí, e tamén polo noso instituto, no que cursou os seus estudos preuniversitarios.
Despois dunha breve exposición sobre o Grupo Nós e o seu papel decisivo na sociedade galega de comezos do século XX, iniciouse un coloquio coa conferenciante, no que o noso alumnado se mostrou moi participativo e interesado por este tema.
Para rematar, Pilar García Negro, recitou un poema de Ricardo Carvalho Calero, do seu libro Vieiros, dedicado á cidade de Lugo e titulado “Parque”.
