Vídeo promocional de hábitos saudables realizado polo alumnado de 1ºESO de Proxecto Competencial

Entre as actividades de promoción do respecto ao medio ambiente e posta en valor da nosa contorna natural destaca a xa clásica Saída ao Río Miño polo coñecido roteiro "ecolóxico".

Nesta ocasión, con constante ameaza de chuvia, o alumnado de 1º da ESO A e B puido participar desta camiñata e doutras actividades lúdicas nas instalacións do Club Fluvial a quen agradecemos a súa colaboración.

Porén, a saída prevista para o martes tivo ser cancelada a causa dunha ameaza maior de chuvia e dunha temperatura máis baixa. Esperamos que poda ter lugar noutra ocasión, talvez a principios do curso que vén.

Sen dúbida, a nosa actividade máis fotoxénica segue a ser o apadriña/amadriña un lector/unha lectora, no que un alumno/a de 1º de BAC acolle nos xardíns do noso centro a un pícaro/a de educación infantil do CEIP Casás e complementa as actividades de introdución a lectura nun contexto diferente.

Temos que agradecer ao noso alumnado que asistiran a esta actividade unha vez ter rematado o seu período lectivo e facelo de xeito complemetamente voluntario. Esperemos que estes pequenos lectores dentro dunha década sexan os que apadriñen/amadriñen novos lectores que aínda están por nacer. 

E sobre todo, agradecer ao equipo da nosa Biblioteca e ao profesorado de Infantil do CEIP Casás que sigan comprometidos nunha actividade tan completa como esta.

O alumnado de 2º da ESO pasou un par de días de experiencias naturais e deportivas nunha contorna única nas illas Ons, pertencentes ao Parque Natural das Illas Atlánticas. Nesta imaxe, arrodean o Burato do Inferno, un dos atractivos da illa.

Agradecemos o comportamento exemplar de todo o alumnado e o compromiso do profesorado participante nunhas actividades tan beneficiosas para o convivencia e para unha formación respectuosa co medio ambiente.

O 31 de maio recibimos a visita do alumnado axudante do IES Xograr Afonso Gómez de Sarria para intercambiar experiencias e iniciativas de combate contra o acoso escolar. En total 40 rapaces e rapazas dos dous institutos compartiron unha xornada de traballo e convivencia que deu como resultado un material que está xa colgado no curso Administración Alumnado da nosa Aula Virtual.

Queremos agradecer a visita e esperamos que poda ter continuidade no futuro. Ficou claro que temos moitas cousas en común, a máis importante, un alumnado consciente e formado na resolución pacífica de conflitos convencidos do diálogo como ferramenta insuperable para acadar este obxectivo.