Levamos varios anos promocionando o xadrez no noso centro educativo, máis como unha ferramenta de inclusión que polo carácter meramente competitivo. Porén, non podíamos deixar escapar a oportunidade de presentar dous equipos aos clasificatorios para os provinciais Xogade de Xadrez.

O equipo Infantil representado por Olmo Portomeñe e Iago Rodríquez quedou subcampión do torneo detrás da potente Escola Luguesa de Xadrez. O equipo cadete pola súa parte, contou coa participación de Héctor García, Arón Fernández e Nico García. Este último acadou o segundo posto individual ao vencer a un dos participantes que partía con ELO internacional.

Parabéns a todo o equipo que representou tan brillantemente ao IES Leiras Pulpeiro. Esperamos contar coa vosa presenza en vindeiras edicións.

Programa de venres musicais, dedicado desta vez ás versións que melloraron ou non as súas versións orixinais.

Dirección: Xabi
Locutores: Nuria e Xabi
Control: Xabi

O noso centro educativo ten xa unha importante traxectoria implementando estratexias de mediación escolar para a resolución de conflitos. Os equipos de mediación requiren dunha continua formación e de seren renovados cando a súa colaboración xa non é posible. É o que acontece este ano, cun alumnado no bacharelato con moita esixencia no estudo e que precisa dun relevo dende as novas xeracións.

Con este motivo, seleccionamos voluntarios/as para integrar o novo equipo que asistiu, durante tres tardes de primavera, a un curso de iniciación dirixido por toda unha experta no tema e gran coñecedora do noso instituto: Berta López.

Agardamos que desfruten da súa tarefa e que consigan resolver de forma pacífica, co diálogo como único instrumento, unha cantidade importante dos inevitables conflitos que aparecen nun centro educativo como o noso.

O alumnado de 3º da ESO participa esta semana no programa Educar en Xustiza promovido polo TSXG. Esta actividade insírese no Plan de Acción Titorial do centro, e vai encamiñada a promover o desenvolvemento dunha cidadanía consciente por parte do alumnado e fornecer espazos para que se exerza de maneira activa, crítica e responsable.

O programa é o seguinte:

- 3ºA asiste o 2 de maio ao Xulgado do Social  de Lugo

- 3ºB o 3 de maio ao Xulgado de Instrución nº2 de Lugo

- 3ºC o 4 de maio ao Xulgado do Penal nº2 de Lugo

- 3ºD o 5 de maio ao Xulgado do Penal nº2 de Lugo

Participaremos en varios xuízos (en xeral, curtos) que terán lugar nesas salas, e o/a maxistrado/a ao final de cada xuízo dará as indicacións necesarias para seguir o procedemento xudicial e comentará a sentenza a ditar.

Na xornada do día 3 asistimos a 5 xuízos interesantísimos presididos pola xuíza Sandra Piñeiro que nos atendeu cunha amabilidade e unha adicación que queremos destacar. Falounos sobre os detalles de cada caso achegando explicacións históricas sobre o principio de igualdade e a consecución de dereitos. Moi difícil encontrar unha actividade cun aproveitamento e unha calidade educativa como esta que tivemos a oportunidade de desfrutar nos xulgados de Lugo.

Na semana do 2-6 de maio desenvolveranse no noso instituto un conxunto de actividades ao aire libre que quixemos denominar Feira de Primavera.

Esta iniciativa xorde dende os diferentes proxectos educativos que concorren no centro aos que se foron sumando varios departamentos didácticos.

Velaí o programa, que non altera o horario lectivo e se irá actualizando durante a semana. 

Nas correspondentes sesións lectivas dos grupos seleccionados:

•  Continuación do programa Música no Xardín (mércores e xoves - Dpto de Música)
•  Actividades Físicas ao aire libre (Dpto de EF)
•  Busca de Invertebrados (Dpto de Bioloxía)
•  Poesía no Xardín (EDLG, accede ao cuestionario poético premendo aquí)
•  Teatro no Xardín (Dpto Lingua e Literatura Castelá)
•  Lecturas no Xardín (Dpto Lingua e Literatura Galega)
•  Have you got an alibi? (Dpto de Inglés)
•  Probabilidade no Xardín (Dpto de Matemáticas)
•  Trigonometría na Xardín (Dpto de Matemáticas)
•  Sementar Sementarei (Dpto Relixión Católica)
•  Recuperamos e Revitalizamos prantas murchiñas (Dpto Relixión Católica)
•  Paseos Peripatéticos (Dpto Filosofía)
•  En paralelo ao programa Educar en Xustiza - Paseo Botánico no parque Rosalía de Castro (3º da ESO 2-5 de maio, eduSostibilidade)

No período de lecer, nos días correspondentes:

•  Campaña O meu Taco é Saudable. Coa colaboración da ANPA ofrecerase froita de balde os días 3 e 4 de maio (proxecta Aliméntate Ben - eduSaúde)
•  Exposición Fróitate Ben, para a promoción do consumo de froitas entre o alumnado (proxecta Aliméntate Ben)
•  Xadrez no Patio (Dpto de Matemáticas)
•  Papiroflexia (xoves - Dpto de Matemáticas)
•  Piano no Xardín (mércores e xoves - Dpto de Música)
•  Especial Venres Musicais (eduExcelencia)
•  Patios Activos (Dpto de EF - eduSaúde) - Ver detalle na imaxe.

Terá lugar, ademáis, o concurso fotográfico Leiras Saudable e Sostible entre o noso alumnado. Podes ler as bases premendo no ficheiro anexo.