Publicada resolución da Dirección Xeral de Ordenación e Innovación Educativa que dita unhas instrucións para a acreditación das competencias dixitais do alumnado.
Niveis de competencia que se poderán obter na ESO:
O alumnado que obteña o título de graduada ou graduado en ESO recibirá o certificado que acredite o nivel de iniciación.
O alumnado matriculado en 4º de ESO poderá presentarse a unha proba específica co obxectivo de acreditar os coñecementos, habilidades e actitudes propias do nivel intermedio.
Proba específica para obter o nivel intermedio:
A alumna ou o alumno debe responder nun tempo máximo de 90 minutos un total de 60 preguntas, de diferente complexidade e tipoloxía, referidas a cada unha das cinco áreas de dominio (12 preguntas por cada área).
Para superar a proba específica de nivel intermedio deberase responder correctamente a un 70% do total de preguntas, sendo necesario obter un mínimo do 60% de respostas correctas en cada unha das cinco áreas.
Inscrición á proba:
Poderase presentar a solicitude, debidamente asinada por pai/nai ou titor/a, na oficina do IES de Barro ata o 15 de marzo.
A proba realizarase no mes de maio dentro do horario lectivo.
Acreditación para o alumnado que rematou no 2021/22 e 2022/23:
As persoas que obtivesen o título de ESO nos cursos académicos 2021/22 e 2022/23 tendo participado no programa E-Dixgal nun mínimo de tres cursos académicos poderá solicitar a acreditación das competencias dixitais no centro no que rematase cuarto de ESO.
Cada curso académico no programa E-Dixgal debe corresponder cun curso diferente da etapa de ESO (1º, 2º, 3º ou 4º).
As persoas que desexen solicitar a acreditación das competencias dixitais dirixirán unha solicitude entre o 2 e o 15 de maio de 2024.
