IES de Barro

O clube de lectura Banda Boom do IES de Barro realiza a primeira das xuntanzas do curso 2024-2025.

O alumnado de 4º de ESO xa se atopa argallando actividades para conmemorar o Samaín. A continuación poden ver os carteis que deseñaron para as primeiras actividades previstas:

O venres 21 de xuño realizouse no Pazo da Crega o acto de graduación do alumnado de 4º de ESO. Desfrutamos dun gran momento de homenaxe e felicitación ao alumnado que remate etapa educativa no noso centro. Agradecemos ó Concello de Barro a súa colaboración cedendonos o espazo e os recursos dispoñibles para levala a cabo así como ó alcalde por acompañarnos neste momento que o noso alumnado non esquecerá.

O IES de Barro cumprirá 25 anos o vindeiro curso. Por este motivo, convocamos un concurso de deseños para a portada da axenda escolar con esta temática como proposta.

A responsable da convocatoria do mesmo foi Maite, profesora de Educación Plástica, e os traballos realizados foron de magnífica calidade, sendo as seguintes 5 as propostas finalistas.

A gañadora final coñecerase o venres 21 de xuño.

O persoal do Cine Avenida de Caldas de Reis desprazouse o luns 3 de xuño ó IES de Barro a reproducir entre o alumnado a película "As Neves", película galega dirixida por Sonia Méndez.

No IES de Barro continuamos involucrados na mellora da xestión dos residuos que producimos, por iso, o alumnado de 2º de ESO participou o 27 de maio nun obradoiro de xestión de residuous levado a cabo por Sogama.

Nesta actividade aprendemos a separar os residuos, que non lixo, para que serven os diferentes contedores (fracción resto, amarelo, verde, azul, marrón e o punto SIGRE) e que se pode botar en cada un deles.

AXUDAS PARA MATERIAL ESCOLAR

PARA

O CURSO 2024/2025

(ORDE do 7 de maio de 2024 publicada no DOGA do 20 de maio de 2024)

A contía da axuda para adquirir material escolar destinado a alumnado

matriculado en ESO será a seguinte:

1º. Renda per cápita familiar igual ou inferior a 6.000 €: 75 €.

2º. Renda per cápita familiar superior a 6.000 € e igual ou inferior a

10.000 €: 60 €.

Prazo de presentación:ata o día 21 de xuño de 2024.

Lugar de presentación: Presencialmente no IES de Barro ou tamén por

vía electrónica na páxina www.edu.xunta.gal/fondolibros.

Documentación para a presentación presencial no centro:

• Solicitude (Anexo I e anexo II)

   

• Copia do libro de familia ou documento equivalente, onde figure o/a alumno/a e os demais membros computables da unidade familiar.

  En caso de separación ou divorcio, ademais deberán achegar a sentenza xudicial e/ou convenio regulador onde conste a atribución da custodia do/da menor.

  Excepcionalmente (cando non sexa posible facelo polos medios anteriores), poderase acreditar o número de membros computables utilizando algún dos seguintes medios:

  1º. Certificado ou volante de convivencia.

  2º. Informe dos servizos sociais ou do órgano equivalente do concello onde resida a familia.

   

• Outros certificados que xustifiquen algunha outra circunstancia (situación de violencia de xénero, acollemento ou tutela da xunta)

   

• Os DNI e as declaracións da renda NON hai que presentalas se se asina autorizando a comprobación de datos telemáticamente.

   

Os documentos deberán ser válidos e eficaces no momento da súa presentación, e reflectir a situación persoal, familiar e económica en 31 de decembro de 2022, agás sentenza de separación posterior pero se atribúa a custodia exclusiva a unha das persoas proxenitoras, e nos casos de violencia de xénero.

Máis información en http://www.edu.xunta.gal/portal/fondolibros ou na oficina do IES

(886159216)

O Equipo de Dinamización da Lingua Galega organizou unha fantástica actividade para conmemorar o Día das Letras Galegas 2024.

Sabela, Nahuel, Luca, Julia e Marta recrearon un telexornal con conexións "en directo" en lugares de gran relevancia para Luísa Villalta, homenaxeada neste ano 2024, como o IES Isaac Díaz Pardo de Sada ou a cidade de A Coruña, facendo un repaso da súa vida e traxectoria laboral.

O 16 de maio, víspera do Día das Letras Galegas, visitou o IES de Barro o escritor e músico Francisco Castro, onde realizou un coloquio co alumnado sobre os seus libros "Xoán, Xoana" e "Cemiterio de barcos" que o alumnado do centro está lendo na materia de Lingua Galega.

Unha gran parte do alumnado de 4º atópase esta semana en Roma de viaxe escolar acompañados/as de Alberte e Nacho, profesores de Xeografía e Historia e Educación Física. Alí xa tiveron a posibilidade de visitar a parte barroca da cidade, entre outros lugares, o Panteón, o Circo Máximo e o Coliseo.

O mércores 17 de abril ás 19h terá lugar no IES de Barro unha formación para familias que será levada a cabo por Óscar Páramos, psicólogo na Asociación Avante, co título ¨Como axudar aos nosos/as fillos/as ante as redes sociais e os móbiles¨, financiada polo Centro de Formación e Recursos de Pontevedra.

Convidamos a todas as familias a participar nesta actividade que de seguro vai ser de gran interese.

Durante todo o mes de abril contaremos no IES de Barro coa maleta ¨Ponte a Zero¨, unha actividade levada a cabo polo CEIDA (Centro de Extensión Universitaria e Divulgación Ambiental de Galicia), que conta con recursos sobre reciclaxe, contaminación e economía circular.