Blogues

O  ENL, a Vicedirección e a Bibliotelleiras quixeron aproveitar o tempo do Entroido para mostrar a cara máis lúdica do noso centro expoñendo no vestíbulo os traballos que o alumnado levou a cabo para celebrar estes días de festa e diversión.
Un magnífico xogo de mesa co “entroido telleiras” como protagonista, rodeado de fermosas carautas de animais e personaxes, e a exposición do concurso de carteis realizados polo alumnado de 4º de ESO con materia de TIC , baixo a coordinación da profesora de Tecnoloxía, Eugenia Fernández, encheron de cores a entrada do instituto dando a benvida ao deus Momo.

O venres de Entroido os distintos grupos da ESO vestiron os seus disfraces, seguindo a proposta de “Tribus urbanas” que fixo Vicedirección, e animáronse a facer actuacións con música e coreografía no exterior do centro ante a atenta mirada do xurado que elixiu as dúas comparsas máis orixinais que recibiron como premio uns agasallos.
Desde a Biblioteca aproveitamos para facer unha interesante proposta lectora con suxestións de obras que animaban a coñecer máis a fondo as orixes desta tradición e novelas que teñen como escenario este tempo de máscaras, disfraces e celebración.

A páxina web do noso instituto quixo saudar a toda a comunidade educativa e desexarlle unhas felices vacacións de Entroido cunha imaxe dos carteis participantes entre os que se seleccionaron dous traballos premiados ex aequo; a Vicedirectora, Cristina González, fixo entrega dos agasallos ás alumnas gañadoras.

O IES AS TELLEIRAS, PIONEIRO NA IMPARTICIÓN NA MATERIA MOBILIDADE ESCOLAR SOSTIBLE E SEGURA, É UN REFERENTE PARA OS CENTROS DE PRIMARIA DO CONCELLO DE NARÓN QUE ESTE CURSO 2021-2022 CURSAN POR PRIMEIRA VEZ A MATERIA DE EDUCACIÓN VIAL.
Tres colexios de Narón, concello comprometido desde hai anos na promoción da educación vial e con amplo recoñecemento neste sentido tanto a nivel estatal como europeo, veñen de poñer en marcha este curso escolar a materia de Educación Viaria no nivel de 4º de Primaria; trátase dos CEIP Ponte de Xuvia, A Solaina e Piñeiros que, como experimento piloto, o Concello espera exportar en próximos cursos a outros centros.
A novidade desta materia nos centros de Primaria do concello non o é tanto na Secundaria, onde desde hai tres anos o IES As Telleiras leva impartindo a materia de Mobilidade escolar sostible e segura a todo o alumnado no nivel de 1º da ESO como materia de libre configuración, cun balance moi positivo xa que se trata dunha materia interdisciplinar que permite traballar todas as competencias con actividades moi diversas.
Este ano a profesora responsable da materia, Aurora Romar, conta con un Scape room diseñado polo patrimonio de Narón e que en próximas datas estará a disposición da cidadanía a través do blog da Bibliotelleiras, na páxina web do instituto; así mesmo o alumnado traballará sobre o Camiño Inglés e a análise da súa mobilidade.
Xa o curso pasado o alumnado de 1º da ESO do centro levou a cabo un proxecto ligado á celebración do 8 de marzo, Día internacional da Muller, establecendo unha interesante comparativa entre o desprazamento das súas avoas e a mobilidade que pensan que os mozos e as mozas terán no futuro.

Un ano máis o departamento de inglés celebrou co seu alumnado St. Patrick’s Day o 17 de marzo, no que ven sendo xa unha tradición neste instituto.

Foi unha magnífica ocasión para mellorar a aprendizaxe do noso alumnado, trasladando metaforicamente as nosas clases a distintos lugares de Irlanda, a illa esmeralda (The Emerald Isle).

Por un día percorremos as rúas de Dublín e somerxémonos nas tradicións e cultura deste país celta que tanto nos gusta.

Houbo tempo para coñecer a figura do seu patrón, St. Patrick  e a súa traxectoria evanxelizadora, falamos de trevos e arpas, elfos, arcos da vella, moedas de ouro e lembramos tamén a figura de Oscar  Wilde, un dos máis recoñecidos escritores irlandeses.

Lembramos a viaxe do Titanic, trasatlántico construído nos estaleiros de Belfast, lembramos os anos duros da Gran Fame (The Great Famine) e a emigración masiva a Norteamérica no século XIX.

Houbo tempo para a artesanía, e coa colaboración da nosa auxiliar de conversa elaboramos pulseiras na cor irlandesa por excelencia: a cor verde.

Para redondear a xornada no departamento, respectando as medidas de protección derivadas do COVID-19, degustamos un delicioso Irish Cake, elaborado por Mercedes Rodríguez un ano máis.

Incluímos nesta entrada imaxes da xornada.

Rematamos este artigo cun dito irlandés no que lembramos a dureza dos momentos que se están a vivir en Ucrania:

May peace and plenty bless your world!

8 de MARZO: DÍA INTERNACIONAL DA MULLER

En 2022, a UNESCO une a súa voz á de toda a familia das Nacións Unidas ao celebrar este Día Internacional da Muller baixo o lema “Igualdade de xénero hoxe para un mañá sostible, recoñecendo a contribución de mulleres e nenas de todo o mundo que están a liderar a carga na adaptación, mitigación e resposta ao cambio climático, para construír un futuro máis sostible para todos.

"Este ano, no Día Internacional de a Muller, gustaríame aplaudir a esta nova xeración de mulleres novas pola valentía que mostran ao falar, servir de inspiración para as demais e mobilizar aos seus pares con miras a un futuro máis sostible." (Mensaxe da Directora Xeral da UNESCO, Audrey Azoulay, con motivo do Día Internacional da Muller. Fonte: UNESCO).

No día de hoxe celebrouse no IES As Telleiras a festividade do día. O profesorado do departamento de inglés levou a cabo distintas actividades combinando a educación en valores coa aprendizaxe lingüística, artística e poética.

Deixámosvos aquí unha mostra dos “Limericks” (epigramas) realizados en distintos grupos para conmemorar o Día Internacional da Muller.

Agradecemos enormemente o traballo do noso alumnado.

“Por un mundo donde seamos socialmente iguales, humanamente diferentes y totalmente libres”, Rosa Luxemburgo.

Chegou febreiro, ese mes tolo do que o refrán popular di: “Febreiriño curto, cos teus días vinte oito, se tiveses outros catro, non quedaba can nin gato”.
Pero febreiro tráenos tamén as festas de Entroido cos seus disfraces, o seus cocidos e as súas lambonadas como as orellas, os freixóns, as filloas, as flores...
É este tempo de vacacións na escola, de días de lecer que animan á troula pero tamén a gozar do fogar e da familia, de tardes quentiñas na casa mentres zoa fóra o vento e o frío é aínda protagonista da meteoroloxía.
Así que, aproveitando a ocasión, a Bibliotelleiras quere facer  algunhas suxestións lectoras que, de seguro, serán do voso agrado.
Velaquí as nosas propostas.

• LECTURAS PARA COÑECER MÁIS E MELLOR O NOSO ENTROIDO:

• LIBROS QUE ACHEGAN ESTA TRADICIÓN AOS MÁIS PEQUEN@S DA CASA:

• E TAMÉN A TRAVÉS DA MÚSICA:

•  IDEAS PARA MOZ@S E NON TAN MOZ@S: O ENTROIDO COMO EXCUSA PERFECTA PARA LER ESTES DÍAS: