Presentamos aos minimediadores do cole de Vite:
Se entre dúas persoas que se relacionan xorde un conflito, podes contar connosco!
QUE FACEMOS: exercemos de asesores ante os problemas de relación e disputas entre os compañeiros e compañeiras. Ademais, facemos por crear un ambiente máis agradable no centro, patrullando nos recreos cos nosos chalecos para ser visibles, atentos a desavíos entre nenos e nenas que os teñan enfadados, tristes, illados ou cun malestar visible.
QUEN SOMOS: alumnos e alumnas de 6º e 5º de primaria, que exercemos de mediadores de xeito voluntario e confidencial, xa que os responsables de resolver o conflito son as partes implicadas, pois teñen que querer atopar solución. Nós axudamos a que tomen as súas propias decisións, dándolles unha oportunidade de reunirse.
COMO FACEMOS: Non temos autoridade para impoñer decisións nin dar solucións, facemos de condutores facilitando que as persoas confrontadas se poñan cara a cara e empregamos estratexias especiais de comunicación: escoitar, preguntar, negociar e axudar ás partes a elaborar as súas propias solucións ao malestar que teñen. Neste proceso buscamos que os participantes pasen de verse como adversarios, a sentirse socios que asinan un compromiso para resolver o conflito que os mantén enfrontados.
OBXECTIVO DA MEDIACIÓN NA ESCOLA: a finalidade non é chegar a un acordo nin resolver conflitos. O realmente importante é que as partes se poidan comunicar, aclaren os seus puntos de vista e sexan capaces de entender como se sente a outra persoa fronte a súa actitude ou conduta. É dicir, mediar non significa que as dúas persoas que están enfrontadas teñan que acabar pensando o mesmo; o importante é que ambas partes se acaben entendendo mutuamente, inda que non compartan os mesmos puntos de vista… puro respecto.
PROCESO ou fases da mediación:
- Recibimos ás persoas mediadas, saudamos e dirixímonos á aula de mediación, logo indicamos onde se pode sentar cada persoa.
- Establecemos unha relación cordial, con preguntas abertas, banais e cotiás, sen que se sintan atacadas. Mantemos en todo momento posición adecuada, e falamos da Mediación, dicimos en que consiste coas nosas palabras e preguntamos si o entenden.
- Dicimos as normas que ten a Mediación, e asegurámonos de que as comprenden e aceptan.
- Unha vez feito todo isto, pasamos á seguinte fase, que podemos chamar CÓNTAME, onde utilizando as ferramentas da mediación para saber cousas do problema que os enfronta e buscaremos xuntos o camiño para que poidan chegar ao entendemento, ou a sentirse mellor.
Hai factores que poden contaminar o proceso de mediación, como as expectativas ou crenzas do mediador sobre determinados compañeiros e compañeiras, así como a simpatía que se pode sentir cara un compañeiro ou compañeira fronte a outro. Neste caso buscaremos un mediador neutral, pois en lugar de interceder faría uso de máis poder do que lle corresponde, buscando a solución do conflito e iso, corresponde ás persoas implicadas.
LEMBRA: Os minimediadores estamos para a axudar ás persoas que están en conflito a resolver a súa disputa, nas ocasións en que se senten atacas e non ven posible o diálogo sen entrar en reproches. Somos esa terceira persoa imparcial, que entrará en acción sempre que as partes queiran, premisa indispensable.
O noso lema: PÁRATE A PENSAR, IMOS A MEDIAR.
Preme na imaxe para ve-lo vídeo:
Adxunto | Tamaño |
---|---|
Vídeo Mediadores 23-24.mp4 | 11.86 MB |