CEIP de Seixalbo

Durante o mes de marzo o equipo de E. Infantil levou a cabo unha actividade coa Asociación AVIMOS coa que nos puxo en contacto a mamá de Aldara e Xián grazas ao labor que desempeña no Centro de recursos zooxenético de Galicia. Ante o bo acollemento que tivo decidiron extendela ao resto do alumnado de Primaria que poideron gozar en maior ou menos medida do proceso de incubación dos ovos prestados ao centro pola Asociación AVIMOS. 

Informamos ás familias usuarias do comedor que a Consellería vai establecer unha serie de axudas de carácter directo ás familias do alumnado beneficiario de bolsas de comedor, durante a situación de suspensión do servizo de comedor por motivo do COVID-19 (Orde 27 de marzo de 2020).

O Real decreto-lei 7/2020, do 12 de marzo, polo que se adoptan medidas urxentes para responder ao impacto económico do COVID-19 establece no seu artigo 8 un dereito básico de alimentación de nenos e nenas en situación de vulnerabilidade que se atopen afectados polo peche, ou suspensión, de centros educativos que se concreta nun dereito a axudas económicas ou a prestación directa de distribución de alimentos. Engade que serán beneficiarias as familias con alumnado de educación infantil, educación primaria e educación secundaria obrigatoria a quen as Comunidades Autónomas teñan concedido bolsas ou axudas para o comedor escolar durante o presente curso académico.

A  Consellería vai establecer unhas axudas económicas de 2,5€/día para o alumando gratuíto e de 1,5€/día para o alumnado que actualmente paga 1€ por cada día que fai uso deste servizo. O alumnado que paga 2,5€ ou 4,5€ NON pode acceder a estas axudas. Só poderá acceder o alumnado que figuraba como usuario do comedor a día 31 de xaneiro de 2020.

Esta orde compensará os días lectivos correspondentes aos primeiros 14 días naturais de suspensión das clases, que comezaron o día 16 de marzo e que fan un total de 9 días lectivos. A maiores inclúense tamén os 15 días de prórroga que rematan o día 12 de abril. De esta prórroga se contabilizan un total de 5 días lectivos. No caso de haber outra prórroga do estado de alarma calcúlanse os 14 días lectivos ata o 1 de maio de 2020.

Para realizar a solicitude as familias do alumnado gratuito ou que pagan 1€ deben presentar esta solicitude obrigatoriamente por medios electrónicos empregando un formulario dispoñible na Sede Electrónica (https://sede.xunta.gal/), a partir da publicación no DOG da Orde que regula as axudas. Poderanse empregar diferentes mecanismos de identificación e sinatura, así como a Chave 365. A solicitude será única por familia e incluirá a totalidade das fillas e fillos que sexan comensais gratuitos ou paguen 1€.

Aquelas familias que xustificadamente acrediten dificultade para realizar a solicitude, poderán solicitar axuda ao centro, ben mediante chamada telefónica ou por correo electrónico:

• Teléfono: 988 23 70 00 (en horario de 10:00 a 13:00 horas, dende o día 30 de marzo ata o 3 de abril)
• Correo Electrónico: ceip.seixalbo@edu.xunta.es

No caso de solicitar axuda ao centro deberán aportar a seguinte información:

• DNI ou NIE da persoa representante legal do alumnado (indicar o número, NON enviar copia)
• Nome do titor /titora ou representante legal, así como nome, apelidos e curso do fillo ou filla
• Número de conta bancaria onde desexen recibir esta axuda (repasar ben os díxitos da conta bancaria para que non falte ningún número).
• No correo soamente se escribirán os datos que se solicitan. NON enviar copia ou escaneos nin do DNI nin de Libretas de Aforro.

O prazo establecido para a presentación das solicitudes rematará o día 6 de abril, lembrando que o equipo directivo só estará no centro ata o día 3 de abril.

O equipo directivo.

Seixalbo, a 29 de marzo de 2020.

Logo de ser recibidas unhas instruccións por parte da Consellería sobre as medidas a adoptar en relación á avaliación do 2º trimestre, indicar que:

•  O CEIP Plurilingüe de Seixalbo fará, nos próximos días, a avaliación dos contidos traballados ata o día 12 de marzo (data de interrupción das clases presenciais).
•  Tendo en conta que estas cualificacións danse nunhas circunstancias excepcionais, terase en conta tamén aqueles criterios de cualificación específicos establecidos tanto polos titores como polo profesorado especialista, en relación ao traballo de aula e aproveitamento das clases, libretas, traballos...
• Unha vez realizada a avaliación, e con data 3 de Abril, serán enviados a través do servizo AbalarMovil, as notificacións das cualificacións. É por iso que aquelas familias que aínda non teñen instalada dita aplicación no seu dispositivo electrónico a vaian descargando a través de AppStore/Google Play.

           Instruccións no seguinte enlace https://www.edu.xunta.es/espazoAbalar/nova/abalarmobil

                                                            Saúdos e apertas para tod@s.    Xuntos conseguirémolo.

                                                                                                                                                                                                                                     O equipo directivo.

Nestes días tan diferentes o profesorado do CEIP Plurilingüe de SEIXALBO tamén queremos poñer o noso gran de area para animar e ter un recordo para os nos@s nenos e nenas.

O cole está baleiro, o cole está moi triste sen vós, os profes botámosvos de menos...

Aquí vos lanzamos unha mensaxe de ánimo para dicirvos que estamos xuntos nisto, que sodes e somos fortes e que pronto todo pasará e volveremos a ENCHER DE VIDA O NOSO COLE.

Apertas, apertas e... APERTAS!!!

Lembramos a TODAS as familias que poden poñerse en contacto co Departamento de Orientación para calquer tipo de consulta a través do noso correo electrónico orientaseixalbo@gmail.com

Daremos resposta ás vosas cuestións coa maior brevidade posible.

Lembrade identificarvos co nome do alumn@ e o curso.

En caso de que desexedes ser atendidos telefónicamente debedes especificalo no correo e facilitar o número de teléfono no que queredes recibir a chamada.

                                                                                                                     6 APERTAS

                                                                                              Ana, Belén, Elena, Fátima, Olalla e Rosa

O 21 de marzo tivemos unha celebración diferente, unha celebración dende as nosas casas.

A continuación podedes ver un vídeo que que é un pequeno resumo.

Un vídeo feito con moitísimo cariño, tanto cariño como o que lle temos á nosa alumna. Este día e este traballiño vai adicado a ela como non podía ser doutra forma.

Con ela e dela aprendemos dende o primeiro momento que a coñecemos, dende o inicio deste curso.

GRAZAS por contaxiarnos a túa ledicia, o teu entusiasmo, a túa insistencia nos teus gustos...  De ti aprendemos a ser felices con todas e cada unha das cousas que acontecen. 

Ben é certo que detrás túa está unha gran familia á que estamos moi moi agradecidas. Grazas por dar sentido ás palabras amor e compromiso. NORABOA con maiúsculas!!!

Tan DIFERENTES como IGUAIS

... es que los demás... NO LOS LLEVAN BIEN

(Maldita Nerea)

Seguiremos medrando xunt@s!!!

Moitas grazas a tod@s por animarvos a participar

Hoxe 22 de marzo celébrase o Día Mundial da auga, un ben natural esencial para a vida e que non sempre valoramos. Nestes días que estamos a vivir somos máis conscientes da súa importancia pois continuamente nos recordan a necesidade de lavar ben as mans con auga e xabón como medida preventiva contra o coronavirus. Ademáis, onte 21 de marzo coincidindo coa chegada da primavera celebrouse  o Día da Árbore, para recordarnos a importancia de protexelas e coidalas. Dende o CEIP de Seixalbo non podiamos pasar por alto estas datas  ligadas ao noso proxecto de centro "Salvemos o globo". Así pois deixámosvos algunha proposta para que compartades en familia. 

Mañá 21 de Marzo é o DÍA MUNDIAL da SÍNDROME de DOWN e non podemos deixar de reivindicar o respecto pola diversidade e a inclusión, esenciais en tempos difíciles.

Down Galicia e tamén Down Ourense xa nos comunicaron que teñen cancelados os seus actos conmemorativos en responsabilidade coa emerxencia sanitaria así como para evitar situacións de risco nun grupo especialmente sensible ao coronavirus como son as persoas con Síndrome de Down.

 Do mesmo xeito invítasenos a participar neste 21M "atípico" levando calcetíns desparellos NA CASA #CalcetinesDesparejados e #DíaMundialSindromeDown

QUE VOS PARECE?

 Pois nos animámosvos e damos un paso máis; sabedes que a mellor medicina para combater o Coronavirus é QUEDAR NA CASA pero... NON TODOS PODEMOS QUEDAR NA CASA!!! Hai moitos profesionais que saen a diario a loitar, a facer un gran esforzo por e para tod@s nós: persoal sanitario, persoal que traballa nos supermercados, sector transporte, persoal de limpeza, forzas de seguridade, persoal de asistencia a maiores e dependentes... e un longuísimo etc 

 Pois, por que non facemos a nosa particular reivindicación do NOSO COLE DE SEIXALBO?

1. Mañá 21M levemos calcetíns desparellos por todas e cada unha das persoas con Sindrome de Down

2. Fagamos un debuxo da temática que prefirades (igual xa o fixestes estes días) : inclusión, diversidade, o famoso arco da vella... e poñámoslle algunha mensaxe ou "hastag" (TAN DIFERENTES COMA IGUAIS, EU QUEDO NA CASA, TODO VAI SAÍR BEN, DÍA MUNDIAL DA SINDROME DE DOWN...) ademáis de dar as grazas a tod@s @s profesionais que saen a loitar. Nese debuxo incluiredes o nome do noso cole.

3. Saquemos unha foto na que aparezamos cos calcetíns NA NOSA CASA (poden non saír as nosas caras) e na que ademáis "se queredes" saia o voso debuxo.

OPCIONAL: envialo ao noso correo orientaseixalbo@gmail.com. 

No correo debedes poñer os seguintes datos: Nome e apelidos, curso e MOI IMPORTANTE autorización das vosas famlias para publicalo (nesta ocasión e seguindo a lei de protección de datos, non vale a autorización que temos no colexio xa que son fotos sacadas no ámbito familiar)

Aquí tedes un exemplo de autorización que servirá tamén se decidides participar en máis actividades que se organicen dende o centro durante o período da corentena. Aclarar que non ten por que ser esta mesma autorización, podedes escribila a man se vos é máis cómodo. Deben aparecer todos os datos e debe ESTAR ASINADA.

As fotos recibidas iranse publicando pouco a pouco na web e finalmente faremos un vídeo para a nosa canle de YOUTUBE e así darlle máis visibilidade.

AHHHHH!!!! e lembrade que o voso debuxo podedes pegalo nas ventás para facelo máis visible e ao mesmo tempo para animar aos/ás vosos/as veciñ@s

ANIMAMOS A TODA A COMUNIDADE EDUCATIVA A PARTICIPAR!!!!!!!

TODO VAI SAÍR BEN!!!!!

 Finalmente dar as grazas á nosa coordinadora de TICS pola elaboración do anuncio que podedes ver a continuación, un anuncio que intenta anirmarnos a tod@s a participar nesta actividade; unha actividade que nos fai moitííííiísima ILUSIÓN

Seguindo coas recomendacións enviadas dende a Xunta para os vindeiros 14 días de suspensión da actividade escolar acordamos o uso desta PÁXINA WEB para informarvos das tarefas e actividades propostas para os diferentes cursos e materias que estarán dispoñibles nun dos menús no lateral dereito.

Serán actividades xenéricas relacionadas cos contidos curriculares pero non terán carácter avaliable.

Tendo en conta que a maioría dos materiais (libros, libretas...) se atopan no centro e coa finalidade de facilitar o desenrolo das mesmas trátase de actividades que poden realizar en calquera soporte (folios, libretas varias...) sen necesidade de imprimilas.

Pregamos que as visualicedes periodicamente, xa que poden ser actualizadas ao longo dos días. 

Agradecemos a vosa colaboración para a realización das mesmas.

ATENCIÓN

A expensas de ter instruccións da Inspección Educativa informamos que mañá 13 de marzo o centro permanecerá aberto, aínda que non é obrigatoria a asistencia a clase do alumnado. A partir  do vindeiro

luns 16 de marzo, o centro permanecerá pechado por un período

de 14 días. Calquera tipo de notificación que haxa será comuniada a través da páxina web do centro.

Todos co noso alumnado de 6º!!!

Comezan os venres de MERENDAS SOLIDARIAS!!!

Durante varias semanas a actividade no cole foi frenética. Había que ter todo preparado para o gran día do desfile de entroido, este ano, o venres 21 de febreiro. Desde o cartel anunciando a celebración. pasando pola creación de disfraces e complementos, os bailes, a pancarta etc... Foron moitas as persoas que fixeron posible este día, persoal docente e non docente, familias, nenos e nenas, veciños e veciñas... Ata o día se puxo da nosa parte e acompañounos cun magnifico e brillante sol durante toda a xornada.

O proxecto deste ano "Salvemos o globo" foi o punto de partida á hora de pensar nos deseños dos disfraces dos diferentes cursos. Así, en Infantil dedidiron ser heroes e heroinas dispostos a salvar o Planeta como o Capitán Verdemán, o personaxe dese conto que tanto lles gustou aos nenos e nenas. En primeiro optaron polas enerxía renovables e o seus disfraces de muíños non pasaron desapercibidos. En 2º de primaria escolleron os colectores azul e amarelo para levar postos dun xeito moi orixinal con todos os detalles. En 3º quixeron poñerse na pel dun mundo enfermo e vestíronse como tal, con termómetro e vendaxes incluídas. En 4º escolleron os coches eléctricos como alternatva aos de combustibles para reducir a emisión de gases. Os nenos e nenas de 5º lucían coquetas pancartas deixando claro que o cole de Seixalbo aposta pola reciclaxe e xa os maiores de cole desprazáronse cara aos polos onde o desxeo xa é un feito e puxéronse na pel de osos e pingüíns ante semellante realidade. O resultado foi moi colorido e o desfile non deixou indiferente a ninguén. Xa na praza maior os diferentes cursos bailaron para o deleite de todo o público, que ademais este ano tiñan a súa disposición un posto de doces e receitas variadas do entroido co que podían colaborar para a excursión de final de curso dos rapaces e rapazas de 6º. Unha charanga acompañounos durante o desfile poñendo a nota alegre da xornada. Moitas grazas ás perosas que o fixeron posible!! Aquí vos quedan vídeos e fotos do entroido deste ano.

Durante varias semanas, todos os alumnos do cole realizaron unha interesante actividade enmarcada dentro do Proxecta "En tratos co lixo". Despois dunha breve explicación de presentación dos diferentes colectores e do que se deposita en cada un deles, realizaron un entretido xogo para ver se eran quen de clasificar correctamente os diferentes residuos que xeramos diariamente. Aínda que parece sinxelo déronse conta de que todos cometemos agún erro á hora de facelo e de que temos que tomar consciencia diso para mellorar os nosos comportamentos medioambientais. Aquí vos queda o vídeo da actividade.

Achégase o gran día do desfile do Entroido polas rúas de Seixalbo e as familias do alumnado de 6º teñen preparado un recuncho con moitas sorpresas, un recuncho destinado a recadar diñeiro para a excursión de fin de curso do alumnado que finaliza a etapa de Educación Primaria.

Sen lugar a dúbida UNHA GRAN INICIATIVA!!! 

Aproveitamos para lembrar que o alumnado debe ir SEMPRE co seu grupo de referencia e os/as seus/súas mestres/as. Os alumnos/as non poden levar diñeiro porque NON poden achegarse a mercar.

Só queda unha semana para que saiamos  lucir polo pobo os deseños dos nosos disfraces deste ano. O tema escollido está relacionado co coidado do medio ambiente. Non podía ser doutra forma, pois enmárcase dentro do noso proxecto "Salvemos o globo", así como no PROXECTA "Escolas verdes". Aquí vos deixamos o cartel anunciador do desfile con toda a información.

O luns 20 de xaneiro deu comezo no noso centro o plan REFÓRZA-T.

O programa impártese en grupos reducidos (máx. 15 alumn@s) fóra do horario lectivo. Os destinatarios son alumn@s de  3º, 4º, 5º e 6º de EP propost@s polo centro  e autorizados polas súas familias para asistir

O xoves 23 de xaneiro todas as familias dos alumn@s asistentes foron convocadas a unha reunión no salón de actos do centro para tratar varios puntos relativos ao programa: obxectivos que pretendemos, compromisos, metodoloxía...; así como para tratar de resolver todas as dúbidas que se plantexaron. 

Para levalo a cabo foinos asignada unha docente, a cal impartirá o programa no seguinte horario:

- Luns e xoves: alumnado de 3º e 4º de EP en horario de 15:45 h. a 17:45 h

- Mércores e venres: alumnado de 5º e 6º de EP en horario de 15:45 h. a 17:45 h

O ALUMNADO POSTERIORMENTE É TRANSPORTADO AOS SEUS DOMICILIOS EN TRANSPORTE AUTORIZADO O CAL CONTA CON ACOMPAÑANTE.

O reforzo escolar ten como obxectivo prestar unha atención máis personalizada e individualizada que lles permita mellorar o seu rendemento escolar e acadar unha maior motivación cara a súa aprendizaxe.

Hoxe 30 de xaneiro celebramos o Día Escolar da Paz e non violencia cunha homenaxe a persoa de Wangari Maathai, primeira muller africana en recibir o Premio Nobel da Paz en 2004, pola súa contribución ao desenrolo sostible, a democracia e a Paz, fundando o Movemento "Cinturón Verde". Duante estas semanas profundizamos na súa historia lendo ou vendo o conto "Wangari e as árbores da Paz". A partir dese conto, os nenos e nenas de 2º A e B e os/as de de 4º B fixeron as súas propias ilustracións. Os compañeiros/as de sexto A e B fixeron a narración e con todo ese material elaborouse o video do conto que podedes ver máis abaixo. Nel tamén aparecen outros traballos que realizaron as demais clases. Hoxe reunímonos todos no salón de actos para o seu visionado. Despois do mesmo, cada neno/a para dar continuidade á iniciativa de Wangari, "plantou" unha árbore cunha mensaxe nun mural coa imaxe de Wangari colocado na entrada á biblioteca. Aquí vos deixamos fotos e vídeos do día de hoxe.

Paralelamente a esta actividade, os alumnos de sexto, xunto cos seus titores presentaron un novo vídeo de sensibilización, enmarcado no Proxecta. Buscaron imaxes nas que se reflexan os efectos das guerras no medio ambiente, pois case sempre á hora de facer balance das mesmas contabilízanse vítimas persoais, sendo o noso planeta a vítima olvidada. Aquí vos queda tamén o vídeo do seu traballo.

A comunicación bimodal é un sistema alternativo e aumentativo da comunicación na cal se asocian dúas modalidades: signada e falada.

A comunicación é bimodal cando simultáneamente se emprega a fala xunto aos signos, é dicir, a modalidade oral-auditiva xunto á modalidade visual-xestual.

O pasado mes de novembro  tivemos a sorte de achegar aos nosos alumnos á comunicación BIMODAL da man de Sonia e Fany da asociación DOWN OURENSE. Foi unha sesión nas que tamén se levaron a cabo dinámicas para favorecer a interacción do grupo así como o coñecemento mutuo.

Foi un pracer traballar con Sonia e Fany. Seguro que repetiremos!!!

VER FOTOS E VIDEOS NO SEGUINTE ENLACE https://photos.app.goo.gl/gF7ewYm3ZfuH2yM16

O noso centro solicitou charlas informativas dirixidas ao alumnado de 5º e 6º seguindo o Plan Director para a convivencia e a mellora da seguridade nos centros educativos e nos seus contornos.

As charlas foron impartidas por parte de membros das Forzas e Corpos de Seguridade do Estado. 

 A sesión sobre "riscos das novas tecnoloxías" levouse a cabo o 20 de novembro e a de "acoso escolar" o pasado 21 de xaneiro.

O pasado 17 de decembro dous membros da Asociación Xuvenil Amencer pasaron a recoller os nosos Xoguetes para que puderan chegar a tempo aos seus destinos. 

Dende o centro queremos dar as gracias a TODA A COMUNIDADE EDUCATIVA polas súas aportacións. TODAS as aportacións se fixeron seguindo as recomendacións de PAPA NOEL e o resultado foi espectacular como ven podemos apreciar nas imaxes.

Tamén expresar o noso agrademento á ASOCIACIÓN XUVENIL AMENCER pola súa gran labor. 

Contade co noso centro para colaborar en máis campañas e/ou iniciativas. MOITAS GRACIAS!

Reducir o uso de plásticos non é tan difícil e todos podemos aportar o noso gran de area. Por iso os alumnos de 4º A e 4º B lánzannos esta mensaxe tan clara e directa para que eliminemos os plásticos das merendas que traemos ao cole e os substituamos por outros envases de máis dun uso. Prestade moita atención ao vídeo e o máis importante...

TOMADE NOTA!!