Este luns 20 de maio, o alumnado de infantil e de 5° e 6° de primaria visitou Cabreiroá para coñecer de primeira man como é o proceso de tratamento e embotellado da famosa auga de Cabreiroá. Ademais tiveron a oportunidade de probala no seu estado máis puro e ... á maioría non lles agradou moito o sabor. É bastante diferente á que beben das botellas e como agasallo levaron unha botelliña da edición especial de Star Wars.

Tamén aproveitamos a visita para coñecer os arredores do manancial e desfrutar dunha xornada de xogos no parque.

Comeza o prazo para solicitar o fondo solidario de libros de texto e as axudas para adquirir libros de texto e material escolar.

Prazo de solicitude: do 21/5/2024 ao 21/6/2024.

- FONDO SOLIDARIO DE LIBROS DE TEXTO: pode solicitalo o alumnado de 3º, 4º, 5º e 6º de primaria.

- AXUDAS PARA ADQUIRIR LIBROS DE TEXTO: pode solicitalas o alumnado de 1º e 2º de primaria.

- AXUDAS PARA ADQUIRIR MATERIAL ESCOLAR: pode solicitalas todo o alumnado de primaria. 

CONTÍA DAS AXUDAS

A contía das axudas para adquirir libros de texto (alumnado de 1º e 2º EP) será:

1º. Renda per cápita familiar igual ou inferior a 6.000 €: 240€.

2º. Renda per cápita familiar superior a 6.000 € e igual ou inferior a 10.000 €: 160€.

A contía das axudas para adquirir material escolar (toda primaria) será:

1º. Renda per cápita familiar igual ou inferior a 6.000 €: 75€.

2º. Renda per cápita familiar superior a 6.000 € e igual ou inferior a 10.000 €: 60€.

DOCUMENTACIÓN

     - Anexo I e Anexo II 

     - Aplicación Fondolibros

FORMAS DE PRESENTACIÓN

Ademais da presentación de forma presencial no centro, poderase realizar a solicitude na sede electrónica da Xunta de Galicia, accedendo ao procedemento ED330B, que enlaza coa aplicación Fondolibros. Unha vez que estean cubertos todos os datos, poderase gardar e obter o número de solicitude. Despois, dispoñen de varias formas de presentación da documentación:

- No centro:  neste caso imprimirase a solicitude e o anexo II e presentarase no centro (debidamente asinados).

- Na Sede Electrónica da Xunta de Galicia.

Máis información   https://www.edu.xunta.gal/fondolibros/ 

O alumnado de 5º e 6º de primaria viaxou ata Madrid xunto aos compis dos colexios de Castrelo do Val e de Oímbra. Ao longo destes días visitaron o Safari Madrid, o estadio Santiago Bernabéu e o parque Warner. 

Podedes ver no seguinte vídeo o ben que o pasaron e o moito que desfrutaron coa experiencia!!!!

O alumnado de infantil e de 1º, 2º e 3º de primaria foi o encargado, nesta ocasión, de experimentar coa construción utilizando depresores de madeira.

Os nenos e nenas de infantil construíron elementos simples coma os cadrados e os triángulos e tamén deixaron voar a súa imaxinación para crear outras formas e figuras diferentes.

O alumnado de 1º, 2º e 3º tamén construíu celosías, que son estruturas reticulares compostas por elementos entrelazados que forman patróns xeométricos. Son importantes na construción de pontes porque proporcionan resistencia e estabilidade ao distribuír cargas de maneira eficiente.

Encantoulles a actividade e agora queren seguir xogando coa construción sempre que poden!

Por fin temos a nova lona co logo do cole instalada no patio cuberto grazas a Arte Dixital Losada. O logo foi elixido a través dun concurso de deseño no que participou o alumnado de 5°e 6° de primaria, sendo gañador o deseño elaborado por Roi, Aysha e Sara. Unha vez escollido o deseño, chegou o momento de dixitalizalo da man de Noelia Pazos. O resultado non nos pode gustar máis! Xa temos outro recuncho fermoso no cole.

Hoxe fixemos entrega a Sara, Roi e Aysha dun pequeno agasallo que constaba de diploma, taza co logo do cole e material escolar por resultar gañador o seu deseño. Parabéns pola súa fantástica creación!

Na tarde de onte tivemos a segunda formación de Polos Creativos no cole dentro da liña dixital do PFPP. Contamos novamente coa presenza de Brais que, nesta ocasión, nos ensinou nocións básicas de deseño 3D co programa Tinkercad, programa relativamente sinxelo para que o alumnado tamén sexa capaz de realizar deseños que logo pode enviar á impresora 3D para facer por exemplo, chaveiros cos seus nomes.

Para rematar a formación, deunos información sobre apps de Intelixencia Artificial e explicounos como traballar o pensamento computacional co alumnado na aula.

Nova xornada de formación de Polos Creativos no CFR de Ourense. Na primeira parte da tarde, estivemos co plotter de corte aprendendo a facer deseños con vinilo adhesivo e téxtil, entre outros materiais que se poden cortar. A segunda parte estivo centrada na cortadora láser e nalgunhas das súas funcións máis básicas como é o corte e o gravado de fieltro, cartón, madeira... Continuamos aprendendo para levar os coñecementos ao cole e poder experimentar co noso alumnado.

O 19 de abril toda Primaria foi a Santiago de Compostela para desfrutar da visita á Catedral, ao Panteón Real e arredores e tamén á Cidade da Cultura de Galicia na que se organiza InnovArt. O alumnado puido coñecer o potencial das ensinanzas artísticas, de idiomas e deportivas que se ofrecen en Galicia, xa que se contaba con material expositivo e actividades interactivas de: arte dramática, artes plásticas e deseño, conservación e restauración de bens culturais, danza, ensinanzas deportivas, idiomas e música.

Desfrutaron de concertos e espectáculos escénicos en directo, elaboraron unha lámpada, fixeron ilustracións con tinta china e practicaron algún deporte como o baloncesto, ademais de coñecer nocións básicas de navegación.

Premede na imaxe para ver o vídeo!

O alumnado de 5º e 6º de primaria experimentou cunha nova actividade dos Polos Creativos utilizando pezas de madeira Kapla e conectores elaborados no cole coa impresora 3D.

Neste caso formaron dous grupos de traballo para construír dous tipos diferentes de pontes: triangular e cadrada. Partiron primeiramente da práctica dunha unión (nó simple) ata chegar a montar estruturas con triángulos ou cadrados formando celosías, as cales logo tiveron que unir con pezas transversais.

Foron capaces de montalas utilizando soamente unha imaxe como guía e a súa capacidade para resolver todos os problemas que se lles ían plantexando no transcurso do reto. 

Xa son todos uns expertos e expertas na materia!!!!!! 

Na tarde deste luns tivemos a primeira formación de Polos Creativos no cole dentro da liña dixital do PFPP. Contamos coa presenza de Brais, mestre de Primaria e coordinador de Polos Creativos no CEIP Plurilingüe Amaro Refojo de Verín que nos ensinou nocións básicas para traballar co robot True True. Tamén experimentamos e programamos con axuda das tablets un mBot para que realizara diferentes movementos combinados con luces e sons.

Estamos desexando poñer en prácticas estes coñecementos co noso alumnado.