Febreiro 2019

DEPORTE ESCOLAR.

Finais de Bádminton Curso 18-19

O vindeiro mércores 20 de febreiro terá lugar a Xornada Final  da competición escolar de Bádminton, das  categorías Benxamín (3º e 4º), alevín ( 5º e 6º) e Infantil (Repetidores de 6º), no Pavillón Municipal de Tomiño. A esta xornada asisten o alumnado clasificado nas xornadas anteriores. De non poder asistir a esta xornada, sería importante comunicalo á maior brevidade posible para darlle a posibilidade de asistir ao alumnado en reserva.  O autobús sairá ás 16:00h do colexio. A volta será aproximadamente ás 20:30h. Teredes que traer calzado para cambiar, equipación do colexio, se a tedes, e chándal do mesmo. Os/as nenos/as que vaiades a Tomiño directamente debedes que estar alí ás 16:30h. Se tedes algunha dúbida podedes chamar ao teléfono: 650602161.

Entrevista a Enrique Míguez e Manu Garrido

Con motivo do Proxecto Erasmus+.

No mes de decembro alumnado de 6º do noso colexio, tivo a oportunidade de entrevistar aos padexeiros Enrique Míguez, medalla de bronce nos Xogos Olímpicos dos Anxeles en 1982 e a Manu Garrido Campión do Mundo de Piragüismo.  Aquí vos deixamos o vídeo que forma parte das actividades a levar a cabo neste curso con motivo do Proxecto Erasmus+ " Promovendo un Estilo de Vida Saudable e Feliz".

Moitas gracias a Manu e a Quique, sempre dispostos a colaborar co alumnado do noso centro. Grazas pola aportación da vosa experiencia deportiva e humana.

Resultados da enquisa sobre

"Hábitos de Vida Saudables".

Dende o proxecto Erasmus+ do Ceip Nº2 de Tui "Promovendo un estilo de vida saudable e feliz", solicitamos a vosa colaboración anónima como mestres, alumn@s e pais/nais do  alumnado do centro.

Convidámosvos a cubrir a enquisa de xeito anónimo, aló polo mes de decembro. Xa temos os resultados da mesma. Grazas por dedicar ao proxecto Erasmus+ un anaquiño do voso tempo e reflexionar sobre a importancia que ten a actividade física nas vosas vidas. Aquí vos deixamos os resultados para que valoredes.

Vídeos deportivos Erasmus+

Vídeo Torrevieja Copbol 

DEPORTE ESCOLAR.

Bádminton Curso 18-19

O vindeiro martes 12 de febreiro, terá lugar a 2ª Xornada da competición escolar de Bádminton para  a Categoría Benxamín ( 3º e 6º) e Infantil (Repetidores de 6º). Dita xornada será no Pavillón do Ceip Randufe. O autobús sairá ás 16:00h do colexio. A volta será aproximadamente ás 19:15h. Tod@s @s participantes terán que traer calzado para cambiar, equipación do colexio, se  tiveran, e chándal do mesmo. @s nen@s que vaian a Randufe directamente, terán que estar alí ás 16:30h. Se lles xurde  algunha dúbida poden chamar ao teléfono: 650602161.

CLUBE BALONMÁN TUI

O equipo Alevín do Clube Balonmán de Tui comezou a xogar a  liga da temporada 18/19. O pasado 8 de febreiro de 2019, os nosos deportistas tiveron unha nova xornada contra o equipo de Salceda. Neste equipo xogan e desfrutan do balonmán Uxía, Silvia, Lía e Daniela.

 Os parciais foron: Salceda-C.B.Tui : 2-10/3-8/5-4/3-7

Moi bo partido, onde o equipo de Tui foi superior e gañou. 

Información facilitada pola familia de Uxía Soliño de 5ºA. Grazas

As medallas gañadas por Alex Lemos e María de 4ºB 

O alumno Alex Lemos, de 4ºB, e membro do Club Remo Tui, ven de acadar unha nova medalla. Alex que pertence á categoría Alevín ten unha grande proxección deportiva por diante, esperamos que siga colleitando éxitos no seu deporte favorito, e chegar a ser un gran deportista.

María, de 4ºB, ven de gañar unha medalla no Campionato de Campo a Través que tivo lugar no Rosal o pasado 18 de xaneiro. Unha gran atleta que obtivo un gran resultado.

Os dous quixeron compartir as súas medallas cos seus compañeiros.

Aprázase Campo a Través Provincial 18-19.

Azucareira  de Portas

Xoves 7 febreiro 2019

         A proba de Campo a Través Provincial prevista para o vindeiro xoves 31 de xaneiro aprázase para o xoves día 7 de febreiro de 2019, en horario de mañá. A proba de Campo a Través Provincial da presente Campaña Deportiva será nas Instalacións da Azucareira de Portas. Dita xornada está destinada os/as nenos/as de 3ºB do noso colexio que se clasificaron na proba que tivo lugar en Guillarei.  Todo o alumnado asistirá á proba en autobús, coas súas titoras e profesorado de apoio á mesma. @s nen@s asistirán a escola como calquera día, saíndo do centro en autobús ás 9:30h e regresando ao mesmo ás 13:00h. Tod@s @s participantes terán que traer  una mochila con calzado de reposto, equipación do colexio, se a tiveran, chándal do mesmo, roupa de cambio e merenda. Se algunha familia quixera asistir á proba, poderá facelo polos seus medios. Poden atopar máis información da proba na Web de Deporte no 2:    

http://www.edu.xunta.gal/centros/ceipnumero2tui/blogdeportescolar e para calquera dúbida poden chamar ao teléfono 650602161.

Rutas con Encanto. Faro de Budiño.

Deporte en Familia.

O pasado fin de semana Daniel Docampo, de 4ºA, e Javier Docampo, de 5 años A, foron a visitar o Faro de Budiño cos seus pais.

O Faro de Budiño é o punto máis alto da zona, e desde alí pode verse Porriño, Mos, Tui e Salceda de Caselas. Son un conxunto de rochas que sobresaen da montaña e úsanse para a escalada profesional, pero eles fixeron unha pequena ruta para subir a algunhas rochas que non supuxeran moito perigo. As vistas cun día despexado son preciosas.

Ao comezo da camiñata atopáronse cunha zona recreativa, mesas, asadeiros en pedra e un refuxio de montaña.

Gracias a unhas escaleiras chegaron á parte alta, pero a rocha maior non é accesible porque hai que trepar por ela.

Na parte baixa arrancan varias rutas de sendeirismo para poder pasar unha tarde divertida.

Moitísimas gracias a Dani e Javier Docampo e a súa familia por compartir unha ruta con encanto, para gozar en familia, como é a Ruta do Faro de Budiño. Animámosvos a desfrutar da mesma coas vosas familias.