Ceip Xosé Luís Taboada

Hoxe fixemos entrega destes imáns creados polo noso alumnado o venres pasado, xornada lectiva inspirada no magosto. Por iso, estes obxectos fan referencia a esta celebración e máis tamén ao outono (follas, landras, cogomelos, gorros, etc.). Así, á vez que incorporamos a tecnoloxía do lapis 3d, grazas ao cal se deseñaron estas pezas, aproveitamos para traballar vocabulario en galego.

Agardamos que dende hoxe formen parte dos fogares do noso alumnado. Algunhas das ideas que xurdiron foron a colocación dos mesmos en superficies metálicas como a neveira.

Parabéns artistas!

     Onte recibimos na clase a visita duns estudantes do Grao de Educación Infantil (Lucía e Rodrigo) que viñeron a realizar unha actividade enfocada na hixiene buco-dental:

     Primeiro fixéronnos unha presentación acompañados do seu amigo, o Ratiño Pérez, onde nos explicaron a importancia e consellos para manter unha axeitada hixiene e saúde nos nosos dentes.

     A continuación puxeron en práctica varias actividades connosco:

• Cepillar os dentes: os nenos e nenas da imaxe teñen os dentes sucios despois de comer. Explicáronnos como cepillalos para que queden relucintes.

• Experimeto para aprender para que serve o enxaugue dental: na auga do prato botamos canela, que representa as bacterias e restos de comida que provocan as caries e, tocando co dedo cun pouquiño de xabón, vemos como actúa o enxaugue limpando as nosas bocas.

• Fío dental: ensináronnos para que serve o fío dental e practicamos a quitar restos de comida (plastilina) das dentaduras (fichas de construción), usando o fío dental (limpapipas).

• Por último, axudáronnos a facer unha representación da nosa dentadura con plastilina. 

Que ben o pasamos e canto aprendemos con Lucía e Rodrigo! Moitas grazas!!!!

Memorizar as táboas de multiplicar adoita ser unha tarefa certamente ardua... pero todos e todas sabemos que é un contido imprescindible! E igual de imprescindible é exercitar a memoria a curto e longo prazo! Pero iso tamén pode resultar pouco interesante ou algo complicado... Propoñemos as seguintes actividades para traballar isto nun dous por un.

Na primeira fotografía o neno ten un tempo para memorizar  as operacións cos resultados. Logo, tendo á vista un cronómetro, terá que ser quen de repetir os resultados no menor tempo posible. O cronómetro cesará no seu conteo temporal no momento no que o alumno accione o pulsador. Establecer un límite temporal axúdanos a capturar a atención e a mantela activa, sen distraccións, no obxectivo proposto.

Na segunda imaxe, o neno vai seleccionando (mediante pezas circulares translúcidas de cores) o resultado da operación que oralmente se lle vai indicando. Outra dinámica é que a docente seleccione os resultados para que sexa a crianza a que indique verbalmente a operación. Por exemplo: se a mestra selecciona o 56, o cativo indicará 7x8 como operación cuxo resultado dá o número elixido.

Para traballar a posición dos órganos articulatorios (beizos, lingua, padal...), cuestión imprescindible para mellorar a pronuncia do fonema /d/, empregamos como aliada a mesa de luz. Nela proxectamos o articulema (imaxe que nos indica como debemos colocar os órganos bucofonatorios) para, logo, imitar a posición e movementos dos mesmos (para iso tamén acudimos ao espello de aula). Apoiamos este exercicio coa imitación de onomatopeas, tal e como se pode ver tamén na mesa de luz (o son dun mosquito ou dun timbre). 

En suma, as cancións do fonema tamén son unha excelente vía para traballar a conciencia fonémica e favorecer a automatización articulatoria. Estas son escoitadas e visualizadas na tableta, mentras se observa o seu articulema na mesa de luz. Cando é necesario pausamos o vídeo para mellorar a pronuncia daquelas palabras que non saíron ben á primeira.