E alguén acariñou suavemente
A póla dun carballo centenario
E fíxose a Luz... A Luz da memoria...
A luz dos nosos devanceiros
E, paso a paso, principiaban a estrada,
O camiño, a escola.
Os primeiros pasos, o comezo, o principio.
Abroia a Vida no Teatro do Mundo
O mellor faro no mar da Vida
O mellor faro para impedir que os pobos tropecen
É UNHA ESCOLA
E todos, todos os nenos avistaron o faro.
E todos, todos acudiron á escola.
Escolas feitas coa suor e coas bágoas dos nosos emigrantes.
E logo... E logo, Xuntanza, Festa rachada, Romaría.
OS PEREIRIÑOS
A Carballeira de Pousada vístese de gala
Cos seus mellores atuendos
Ponse coqueta unha vez máis
Para recibir ao mellor do noso futuro:
Os nosos pereiriños...
Nenos de Olives, Curantes, Lamas, Pardemarín, Rubín,
Callobre, Berres, Agar, Orazo, Remesar, San Pedro e
Santo Tomé de Ancorados, Riobó...
NENOS DO CEIP DO FOXO
Nenos da Estrada. Nenos da estrada da Vida
Nenos que serán homes e mulleres dun abrente.
Nenos ateigados de sorrisos e bondade,
Que portarán nos seus beizos bicos de leite e pan.
Pois claro... Claro que virán máis. Moitos máis.
Virán milleiros deles
Milleiros de nenos de todas as cores e nacións.
Milleiros...
E entón, sen dármonos conta, ocuparán todos os
Recunchos do (Uni)verso portando nas súas mans:
Luz, Paz, Xustiza e Dignidade
QUE ASÍ SEXA