O conselleiro de Educación, Ciencia, Universidades e FP, Román Rodríguez, acompañado polo delegado territorial da Xunta en Ourense, Manuel Pardo, visitou hoxe a Feira Educativa. Espazo de Innovación e Colaboración Educativa, unha cita de nova creación impulsada pola Xunta, a Deputación de Ourense e Expourense. No seu percorrido polo evento, o titular do departamento de ensino do Goberno galego felicitou a centros, docentes e alumnos pola calidade das iniciativas presentadas.

Neste sentido, o conselleiro destacou que este tipo de eventos contribúen a dar visibilidade “ao excelente traballo que os centros están a facer en materia de innovación en todas as etapas”. “Son unha magnífica ferramenta para a orientación vocacional da rapazada, que coñece nestas feiras a ampla oferta educativa que ten á súa disposición e que tipo de habilidades se traballan en cada tipo de ensinanzas”, puntualizou.

A feira busca fomentar o intercambio de experiencias, a aprendizaxe colaborativa e o fortalecemento das relacións entre os diferentes niveis educativos. Nesta primeira edición da feira participan unha ducia de centros educativos, ademais do Centro Galego da Innovación da Formación Profesional Eduardo Barreiros, o Centro de Formación e Recursos do Profesorado de Ourense e o Centro Residencial Docente. 

No que atinxe aos colexios institutos, preséntanse iniciativas que traballan coa ópera como vehículo de aprendizaxe, coa radio escolar, a robótica ou ferramentas 3D, ademais de afondar en programas de mediación escolar, interdisciplinares, o STEMbach ou os Clubs de lectura. Contan co seu propio espazo os colexios CEIP O Couto e Plurilingüe Amadeo Rodríguez Barroso (ambos en Ourense), Roberto Blanco Torres (A Peroxa) e Xoaquín Lourenzo Xocas (Bande) e os institutos IES Blanco Amor (Ourense), Ferro Couselo (Ourense), O Ribeiro (Ribadavia) e Xesús Taboada Chivite (Verín).

A FP tamén está presente na feira, con espazos nos que se celebran degustacións e demostracións de actividades de microscopía, actividades deportivas, emerxencias sanitarias, realidade virtual ou imaxe e son. Corren a cargo dos centros integrados CIFP A Carballeira-Marcos Valcárcel, A Farixa e Portovello, os tres de Ourense, e o CIFP Vilamarín.

Galicia Educa

A cita ourensá enmárcase no novo calendario de feiras Galicia Educa, impulsado pola Xunta para dar visibilidade a estes eventos como ferramenta para mellorar a orientación formativa e vocacional do alumnado, e ao mesmo tempo, amosar o bo traballo que desenvolven os centros escolares.

Galicia Educa inclúe feiras a nivel autonómico, provincial, comarcal e local. Seis delas, entre elas esta feira de Ourense, son de nova creación este ano.