O presidente da Xunta, Alfonso Rueda, informou de que o Consello deu hoxe o visto e prace a “unha nova oferta de emprego público pola que se convocan 1.664 prazas no ensino galego para este 2025”. Isto supón que Galicia “esgota a taxa de reposición marcada desde o Goberno central” xa que no proceso deste verán haberá 120 postos por cada 100 baixas, conforme ao 120 % máximo permitido pola normativa estatal.

Así se desprende do informe analizado hoxe no Consello da Xunta sobre a próxima Oferta Pública de Emprego que a Consellería de Educación, Ciencia, Universidades e FP vai aprobar nas próximas semanas, logo de abordala previamente coas organizacións sindicais, e que eleva a 20.252 as prazas convocadas polo Goberno galego desde 2009 para renovar o cadro de persoal docente de Galicia.

Tal e como explicou Rueda, do total de prazas que se convocarán para este 2025, “o 86 % serán de acceso libre”, un total de 1.434. Ademais, “haberá 230 de promoción interna”, das cales 10 serán para o corpo de inspectores de educación e as 220 restantes para que mestres que forman parte xa do sistema poidan acceder ao un posto como profesores de Secundaria, isto é, para pasar do corpo A2 ao A1.

Este novo proceso de oposicións enmárcase nun contexto de baixada continuada da matrícula. Polo tanto, permitirá que Galicia siga mellorando o seu rateo de alumnos por profesor, que, tal e como destacou o presidente da Xunta, “xa é a terceira mellor de España, con 9,9 fronte á media estatal de 11,3”.

Máis profesores ca nunca

Ademais, Rueda destacou que a nova oferta pública de emprego contextualízase “no curso escolar no que o sistema educativo galego conta con máis docentes da historia” malia á baixada de alumnos e constitúe unha aposta polo profesorado galego, pola mellora das súas condicións e da carreira profesional docente.

Supón, ademais, un novo pulo para seguir mellorando o sistema educativo galego, cuxa calidade e resultados están avalados por informes internacionais coma o PISA.