A Consellería de Cultura, Educación e Ordenación Universitaria ratificou hoxe a súa vontade de convocar oposicións este ano unha vez se dean as condicións de seguridade xurídica necesarias. Por isto, e co fin de avanzar na tramitación interna da convocatoria e así ter todo preparado para cando se desbloquee a situación a nivel nacional, o departamento educativo da Xunta de Galicia presentou diante da mesa sectorial do ensino non universitario unha proposta de convocatoria de oposicións con 1.043 novas prazas, o que demostra a aposta clara da Consellería pola estabilidade laboral do profesorado galego.

Tras avanzar a principios de febreiro que se convocarían prazas en 25 especialidades, hoxe propúxose unha Oferta de Emprego Público (OPE) en Educación para este 2017 composta por 540 para profesores de ensino Secundario, 80 para profesores técnicos de formación profesional, 400 para mestres en todas as especialidades e 23 para profesores de música e artes escénicas.

O director xeral de Centros e Recursos Humanos, José Manuel Pinal, explicou que a Consellería continúa traballando no ámbito da súa competencia, pero a incerteza que está causando o actual bloqueo aos Presupostos Xerais do Estado impide que se poida sacar a convocatoria nestes momentos. Neste sentido, subliñou que todo o proceso interno no ámbito autonómico está preparado, pero supeditado a que o Estado aporte a seguridade xurídica necesaria.

En canto aos prazos, afirmou que unha vez se despexe a situación a nivel nacional sacarase a convocatoria, para poder celebrar as oposicións, ao igual que outros anos, xusto despois de que finalicen as clases. Cómpre lembrar que as oposicións afectan ao traballo dos opositores e da propia Administración, e polo tanto teñen que convocarse e desenvolverse nas máximas condicións de seguridade xurídica. A distribución de prazas queda así:

Por outro lado, na mesa sectorial tamén se deu o visto e prace á orde pola que se convoca o concurso de méritos para a selección e o nomeamento da dirección dos centros docentes públicos, que se mantén invariable con respecto á aprobada o ano pasado.