O director xeral de Educación, Formación Profesional e Innovación Educativa, Manuel Corredoira, fixo hoxe entrega dos diplomas de participación na visita de estudos ‘Plurilingualism in the Galician Educational System’, no marco da que 9 docentes de 7 países da Unión Europea visitaron esta semana centros plurilingües de Galicia para coñecer o desenvolvemento do plan Galego de Potenciación das Linguas Estranxeiras, que eles consideran un referente tanto a nivel nacional como europeo.

A actividade está integrada no programa ‘Lifelong Learnig Programme’, coordinado polo European Centre for the Development of Vocational Training (CEDEFOP), e ten como obxectivo contribuír ao desenvolvemento de política de cooperación en materia de aprendizaxe permanente en Europa.