Cultura e Educación celebra o éxito do concerto de Gregory Porter, que esgotou todas as entradas na Cidade da Cultura
Considerado pola crítica como a mellor voz do jazz actual, Porter actuou esta noite no Museo Centro Gaiás ante un auditorio de 500 persoas
Cunha actuación que os asistentes recordarán durante moito tempo, o cantante americano interpretou temas do seu último disco Liquid Spirit e algún dos seus éxitos anteriores
Porter estivo ao fronte dun cuarteto formado polo saxofonista Yosuke Sato, Chip Crawford ao piano, Aaron James ao contrabaixo e Emanuel Harrold á batería
A Consellería de Cultura, Educación e Ordenación Universitaria celebra o éxito do concerto desta noite de Gregory Porter no Museo Centro Gaiás, despois de que a estrela americana do jazz esgotara todas as entradas para unha actuación de gran calidade coa que se pechou o ciclo Pel de Galiña. Música que emociona. Gregory Porter, considerado pola crítica como a mellor voz do jazz actual, actuou ante un auditorio de 500 persoas, despois de que na billeteira se venderan as últimas entradas. O cantante americano ofreceu un concerto intenso e vibrante no que foi debullando os temas do seu último disco Liquid Spirit, que veu a luz este mes de setembro, sen esquecerse do álbum que o lanzou ao éxito: Be good.
O concerto comezou cun ritmo delicado de soul, continuou con diferentes temas de jazz ata facerlle a súa particular homenaxe ao gospel –Porter confesou que as súas inquedanzas musicais comezaron na igrexa. Porter estivo á fronte dun cuarteto formado polo saxofonista Yosuke Sato, Chip Crawford ao piano, Aaron James ao contrabaixo e Emanuel Harrold á batería para ofrecer un estilo e unha visión do mundo propia a través de temas dunha enorme intensidade emocional.
Cultura e Educación salienta a boa collida que tivo entre o público a actuación dunha das figuras máis destacadas no panorama do jazz actual e destacou o esforzo da Cidade da Cultura por aglutinar no ciclo Pel de galiña a voces únicas e dunha altísima calidade.
Mestura perfecta de jazz e soul
Influenciado por una mestura da sensibilidade de Nat King Cole, a profundidade de Joe Williams e o soul de Donny Hathaway, Porter Gregory logra un son persoal que o fai único, cunha voz que se pode acariñar, abrazar ou enfrontar.
Porter iniciou a súa carreira musical en pequenos clubs de San Diego e deuse a coñecer sobre escenarios de Broadway co musical Ain’t Nothing But the Blues para logo facer do mundo o seu fogar musical e lanzar a súa carreira no 2010 con Water, polo que conseguiría unha nominación aos Grammy na categoría de mellor álbum de jazz vogal, e ao que seguiría Be Good no 2012.
Música que emociona
Coa actuación de Gregory Porter, Cultura e Educación ponlle fin ás cinco noites abertas á fusión, aos ritmos suxerentes, ás voces poderosas e cálidas e aos sons únicos. Cinco actuacións que deron corpo ao ciclo Pel de galiña e que arrancou en maio coa grande actuación de Noa xunto ao cuarteto napolitano Solis String Quartet e á que seguiu Silvia Pérez Cruz e Javier Colina Trío, a pianista venezolana Gabriela Montero e Uxía.
Todos eles conformaron un cartel marcado pola diversidade de estilos pero unido por un denominado común: ofrecer música que emociona. Con este ciclo, a consellería de Cultura, Educación e Ordenación Universitaria continúa afondando na configuración dunha programación para o Gaiás aberta a todos os públicos e ás máis diferentes disciplinas artísticas. Un programa cultural que non sería posible sen as aportacións da Fundación privada Gaiás, que financia as actividades que teñen lugar na Cidade da Cultura.
Tema: