Cultura e Educación reúne a 200 docentes nas xornadas ‘A Ponte das Linguas’ co obxectivo de impulsar a transversalidade no ensino plurilingüe

A Consellería de Cultura, Educación e Ordenación Universitaria reúne – hoxe e mañá-  na Escola Galega de Administración Pública a 200 docentes nas xornadas ‘A Ponte das Linguas’, que buscan favorecer a transversalidade e o enfoque comunicativo global nas aprendizaxes lingüísticas,a través de todas as materias do currículo. O encontro, organizado polo Centro autonómico de Formación e Innovación (CAFI), busca dar a coñecer as diferentes iniciativas que se desenvolven nos centros educativos galegos en materia de potenciación da competencia plurilingüe e pluricultural.

O director xeral de Educación, Formación Profesional e Innovación Educativa, Manuel Corredoira; salientou na inauguración o éxito de convocatoria das xornadas – con 343 inscritos para as prazas dispoñibles-, o que dá conta do interese dos docentes en compartir experiencias arredor do ensino plurilingüe. O director xeral recordou que o piar fundamental para o bo funcionamento do Plan de Potenciación das Linguas Estranxeiras, posto en marcha pola Consellería, é precisamente o traballo colaborativo dos docentes, “procurando non só melloras significativas competenciais para eles mesmos e para o alumnado, e favorecendo o aprezo pola diversidade lingüística vinculada a todas as áreas de coñecemento”.

Neste sentido celebrou iniciativas como a destas xornadas e animou aos docentes a seguir traballando en colaboración nos centros educativos “en pos de proxectos comúns que favorezan todas as sinerxías potenciais que o noso alumnado pode desenvolver, nunha entorna motivadora, creativa e conectada co mundo actual”.

Experiencias e-Twinning

Tras o acto de inauguración, o programa continuou coa presentación do proxecto europeo e-Twinning ‘Comment est ton collège?’, da man de Céline Benmessaoud, profesora de educación secundaria de Lingua francesa no CPI Plurilingüe dos Dices (Rois). Esta iniciativa, que obtivo o terceiro premio nacional do Organismo Autónomo Programas Educativos Europeos (OAPEE) entre as 87 presentadas, desenvolveuse co Collège René Cassin  (l’Isle Jourdain, Francia), arredor da análise textos xornalísticos audiovisuais, tendo en conta as úas contornas e o intercambio cultural.

A xornada do venres complétase coa presentación da experiencia ‘Cóntoche un conto, cóntasme un conto’, por parte de Susana Fontán, mestra no colexio SEK (Pontevedra). O proxecto, que acadou o primeiro premio europeo do OAPEE ao mellor dos desenvolvidos en español, realizouse co italiano Circolo Didattico Giovani XXIII di Corigliano, arredor da tradición de contar contos e a súa relación coas súas propias culturas.

Obradoiros

O sábado será a quenda dos obradoiros simultáneos. Así participantes poderán escoller entre unha ampla oferta de actividades, como ‘Danzas do mundo’, no que Antonio Cabanas afondará nas danzas populares como ferramenta para a aprendizaxe da lingua vehicular; ou ‘O inglés a través da música’, no que o profesor Mark Wiesma fomentará unha experiencia de inmersión lingüística en inglés a través de xogos, movemento e ritmo. Por outra banda, Anxo Gómez, profesor de galego no CPI Vicente Otero Valcárcel (Carral) traballará cos asistentes ao obradoiro ‘a dobraxe nas aulas de lingua’ as diferentes posibilidades que a dobraxe ofrece na aula utilizando textos literarios.

En ‘Ponte nas Ondas, Santiago Veloso, profesor de Lingua galega do IES Terra de Turonio (Gondomar) compartirá os pormenores deste programa educativo realizado entre Galicia e Portugal co obxectivo de fomentar os lazos de unión entre os nenos e nenas de ambos os lados da fronteira, con riscos comúns e outros que os diferencian. Pola súa parte, Sonia Espiñeira, profesora na Escola Oficial de idiomas de Vigo, dará a coñecer o método ‘Aprendizaxe en estacións’, desenvolvido para a ensinanza do español como lingua estranxeira. Ademais, Araceli García Fuentes, mestra de inglés no CEIP Pérez Viondi, dará aos asistentes a posibilidade de participar nunha sesión baseada no método didáctico da ‘Total Physical Response’ (Resposta Física Total) como forma de ensino de linguas