Máis de cen estudantes conclúen os cursos de verán de lingua galega promovidos por Cultura e Educación nas universidades da Coruña e de Santiago de Compostela
O secretario xeral de Política Lingüística, Valentín García, clausurou hoxe en Compostela a XXV edición do Curso de verán de lingua e cultura galegas organizado conxuntamente pola RAG e polo ILG, en colaboración coa consellería que dirixe Xesús Vázquez Abad
Tamén finalizou hoxe na Coruña o V Curso de verán de lingua e cultura galegas para persoas estranxeiras, desenvolvido na UDC
A Consellería de Cultura, Educación e Ordenación Universitaria, representada no seu secretario xeral de Política Lingüística, Valentín García, clausurou hoxe no salón de actos da Facultade de Filosofía da Universidade de Santiago de Compostela (USC) a XXV edición dos Cursos de verán de lingua e cultura galegas para estranxeiros e españois de fóra de Galicia, promovidos pola Real Academia Galega (RAG) e mais pola USC (a través do Instituto da Lingua Galega, ILG), en colaboración co departamento dirixido por Xesús Vázquez Abad. Mercé a esta iniciativa conxunta, 86 estudantes procedentes de 22 países de Europa, América e Asia chegaron a Galicia a primeiros de mes para coñeceren a lingua e a cultura galegas.
No acto participaron, amais do secretario xeral, o reitor da universidade compostelá, Juan Casares Long; o tesoureiro da RAG, Manuel González González; a directora do ILG, Rosario Álvarez Blanco; o director dos cursos, Francisco Fernández Rei e, en representación do alumnado, a estudante de nivel superior Marina Snetkova.
Embaixadores da lingua e da cultura galegas
García Gómez felicitou o alumnado polo traballo realizado durante as catro semanas de desenvolvemento dos cursos e agradeceulles o seu interese pola lingua e pola cultura galegas. O secretario xeral rematou a súa intervención animándoos a continuar afondando no coñecemento do idioma propio de Galicia e a contribuír así coa proxección internacional da lingua desde os seus países de orixe, como embaixadores da lingua e da cultura galegas.
Remata tamén o V Curso de verán de lingua galega na UDC
Parellamente, tivo lugar na Facultade de Filoloxía da Universidade da Coruña (USC) o acto de clausura do V Curso de Verán de lingua e cultura galegas para persoas estranxeiras, que contou nesta ocasión com 23 alumnos e alumnas procedentes de 11 países de Europa (Croacia, Polonia, Portugal, Alemaña, Rusia, República Checa, Italia e doutras comunidades autónomas de España), América (EUA e Brasil) e África (Nixeria).
Estreita colaboración institucional para garantir a oferta de cursos de verán
A consellería dirixida por Xesús Vázquez Abad vén organizando cursos de verán de lingua e cultura galegas para persoas estranxeiras en colaboración coa RAG e co ILG (USC) e mais coa UDC. Este ano, 109 alumnos e alumnas procedentes de catro continentes (Europa, América, Asia e África) e de 24 estados diferentes chegaron no mes de xullo a Galicia para mergullarse na lingua e na cultura do país.