O director xeral do Patrimonio Cultural anuncia que a próxima semana comezarán os traballos de retirada de vexetación da Muralla de Lugo

O director xeral do Patrimonio Cultural, José Manuel Rey Pichel, compareceu hoxe no Parlamento de Galicia para falar dos plans da Xunta de Galicia para o mantemento e conservación da muralla romana de Lugo. O director xeral anunciou que os traballos de limpeza e retirada de vexetación deste ben histórico comezarán a vindeira semana, labores incluídas dentro do Plan de Mantemento da Muralla 2011-2014, contratado pola Consellería de Cultura, Educación e Ordenación Universitaria e que conta cun orzamento total de 896.000 euros.

O responsable do Patrimonio Cultural afirmou que este Goberno é “plenamente consciente de que a Muralla é, ademais de testemuña do pasado de Galicia, un espazo de uso público e un ben senlleiro cunhas características que fan que requira dun proceso de mantemento moi específico, por ese motivo vimos de aprobar un Plan de Mantemento ata o ano 2014”. José Manuel Rey Pichel asegurou que o este Plan constitúe “un enorme paso adiante, xa que permitirá dar resposta inmediata ás problemáticas habituais derivadas das características construtivas e de uso da Muralla”.

O director xeral explicou que o Plan de Mantemento inclúe tarefas de posta en valor con carácter mensual, a reposición de cachotería en lenzos, a conservación do pavimento e a impermeabilización do adarve, a reparación da instalación eléctrica e a retirada de vexetación. Ademais, o contrato de mantemento tamén inclúe un acordo entre a empresa adxudicataria dos traballos e a Universidade de Santiago para a realización dun estudo e un calendario para a limpeza da vexetación.

Deste xeito, segundo a proposta dos expertos da USC e a posterior conformidade dos servizos técnicos da Dirección Xeral de Patrimonio Cultural, realizaranse o seguinte proceso: a retirada manual ou mecánica das plantas existentes nas paredes interior e exterior do monumento e adarve, que está previsto que comecen a semana próxima; o tratamento químico das paredes e do adarve a finais do mes de xullo ou principios de agosto, unha vez rematado o período de nidificación das aves e coas plantas novas rebrotadas; e o estudo da necesidade e oportunidade dun segundo tratamento no mes de outubro.

Neste sentido, Rey Pichel, respondendo á pregunta do deputado do Partido Popular, asegurou que “esta é a única metodoloxía e forma de actuar que consideramos científica, segura e apropiada para garantir a correcta e efectiva conservación do monumento; metodoloxía que, por outra parte, é a única recoñecida como idónea polos organismos internacionais e nacionais competentes en materia de conservación do patrimonio cultural”. Ademais, o novo plan de control da flora vascular ten en conta non só o control da vexetación durante o prazo de execución, senón tamén a realización dunha actualización do estudo, un seguimento continuado e o ensaio de novas formulacións fitocidas.

Finalmente, José Manuel Rey Pichel recordou que o investimento total na Muralla por parte da Consellería de Cultura e Educación entre os anos 2009 e 2012 é de máis de dous millóns de euros, “superando amplamente o realizado na anterior lexislatura, concretamente en preto de 500.000 euros máis”. Para o director xeral, esta cifras demostran “o compromiso da Xunta de Galicia con este ben Patrimonio Mundial e símbolo identitario dos lucenses”.