O conselleiro de Educación asiste aos actos de conmemoración do XXV aniversario do IES Xunqueira II, en Pontevedra
No acto estiveron presentes os directores, e numerosos estudantes do centros desde a súa inauguración no 1986
O instituto caracterizase polas súas actividades como a radio escolar ou a organización de viaxes ao estranxeiro
O conselleiro de Educación e Ordenación Universitaria, Xesús Vázquez Abad, asistiu hoxe pola mañá, en representación do presidente da Xunta, Alberto Núñez Feijóo, aos actos que conmemoran o XXV aniversario do IES Xunqueira II de Pontevedra, ao tempo que se dá comezo ao curso escolar na cidade do Lérez.
Durante a súa intervención na celebración o conselleiro destacou que “este centro durante os seus vinte e cinco anos de funcionamento atopou o xeito de converterse en algo máis que un lugar de estudo e aprendizaxe”, ao que engadiu que “sodes un centro feito por e para persoas que conforman unha comunidade educativa extraordinaria. Unha comunidade que traballa en equipo, que colabora e suma para que o alumnado chegue a ser unha cidadanía exemplar, decidida a conseguir un mundo máis humano e solidario”.
Ao longo do acto Vázquez Abad estivo coa directora do centro, María Cristina López Gago, así como do equipo directivo do instituto. Tamén asistiu o director xeral de Centros e Recursos Humanos, José Manuel Pinal, así o xefe territorial de Educación en Pontevedra, César Pérez Ares.
Xunto a todos eles tamén estiveron presentes os directores do centros desde a súa inauguración no 1986, ata agora, así como os representantes de nais, pais e estudantes no Consello Escolar desde a mesma data. Xunto a todos eles os mestres que se manteñen durante este cuarto de século como Luis Fernández Fernández e María Carmen González García e Olga López Míguez. Cómpre sinalar que este foi o cuarto instituto da cidade do Lérez.
Numerosas actividades
Durante o acto interveu un dos primeiros alumnos do IES Xunqueira II, José Pereira Fariña, actual decano da Facultade de Comunicación da USC; fixo un repaso da súa experiencia no centro, no que xa demostrou o seu interese pola información coa súa participación como estudante na radio escolar ao tempo que durante a súa época de estudante aproveitou as numerosas actividades que o centro ofertaba como viaxes e actividades varias.
Cómpre destacar que o centro, que chegou a contar con 1.005 estudantes se destaca pola grande oferta en actividades diversas, como deportes, política, música, e viaxes ao estranxeiro grazas aos intercambios realizados con estudantes de outros países ou por motivos culturais ou de celebración (con motivo do fin de curso) entre outras.
Na actualidade o instituto, conta con 388 estudantes de Secundaria e 162 de Bacharelato, continúa a desenvolver numerosas actividades de cara ao beneficio na formación dos estudantes e pertence ao Plan de Mellora de Bibliotecas Escolares desde o ano 2009, e leva percibidos 26.000 euros para dito espazo.