Caldas de Reis está situada na provincia de Pontevedra, na ribeira do río Umia. Forma parte da comarca do Umia xunto cos concellos de Cuntis, Moraña, Catoira, Valga e Portas. Caldas de Reis é a súa capital e tamén o concello con máis poboación, o cal está conformado por 9 parroquias. A estrada N-525 atravesa a vila e únea coa capital da provincia, Pontevedra, e con Santiago de Compostela. A vila de Caldas de Reis é unha importante estación termal. Os edificios destes balnearios forman parte da mellor arquitectura da zona, ademais da Igrexa de Santa María. Actualmente no concello existen 4 escolas de Educación Infantil: EEI de Carracedo, EEI de Godos, EEI de Saiar e EEI de Santo André de Cesar. Estas escolas, situadas en zonas rurais pero con características de ámbitos urbanos, conforman un núcleo de traballo de amplo espectro, que aumentan as vantaxes de ambos medios, reflexándose nun coñecemento dos distintos elementos que conflúen nesta situación: relación directa coa natureza e maior autonomía, así como acceso a todo tipo de fontes de información e cultura (cines, museos, bibliotecas...) pola proximidade a varios núcleos poboacionais de referencia (o propio centro de Caldas de Reis, Vilagarcía de Arousa, Santiago de Compostela,..). Con relación á actividade económica, esta foise diversificando nos últimos anos, pasando do inicial predominio agrícola a un meirande peso do sector servizos, preto dun 40%, e industrial, 30%. Caldas de Reis posúe un importante turismo termal, e ademais, o Camiño Portugués a Santiago de Compostela atravesa a zona vella da vila e pasa pola EEI de Carracedo. Cabe mencionar que é a 3ª vila na lista de municipios máis industriais do entorno de Pontevedra, detrás de Poio e Marín. Isto débese principalmente a súa privilexiada posición xeográfica, no eixe de comunicacións entre Vigo e A Coruña, con ferrocarril e portos pretos. A agricultura está versada principalmente sobre cereais, millo e patacas, mentres que a gandería radica no sector vacún e porcino. O nivel socioeconómico dos nenos que acoden ás diferentes escolas unitarias do concello, é semellante, cun nivel medio. Evidentemente, a crise na que estamos inmersos causou o seu efecto, con familias con algún dos seus membros no paro, vivindo dalgún subsidio e incluso dependendo da axuda doutros parentes. Pax 4 de 14 A unidade familiar está formada principalmente polos proxenitores e fillos, existindo xeralmente algún ascendente (avó/avoa) convivindo con eles, ou ben a proximidade entre vivendas das diferentes unidades promove unha relación moi estreita entre ambos. Esta relación cos avós vexe reflectida tamén na vida escolar do alumnado, enriquecendo as relacións interpersoais. O concello de Caldas promove a cultura desde diferentes ámbitos que fan da súa poboación un viveiro de semente intelectual e cultural. Desde a biblioteca municipal lévanse a cabo visitas e obradoiros para potenciar o uso da mesma, así como sesións de contacontos, dirixidos a todas as idades. Existen diferentes centros sociais dispersos polas diferentes parroquias que organizan cursos diversos, desde baile, deporte, manualidades e cociña. A música ten o seu referente no festival Cultura Quente levado a cabo pola propia Consellería de Cultura. Toda esta actividade repercute na vida da poboación caldense que ten acceso, desde idades temperás, a todas as variantes culturais. Tendo en conta todo iso, elaboramos unha Programación Xeral Anual que se adapta as necesidades do centro e de toda a comunidade educativa e por tanto, un Plan Dixital que se implementará tendo en conta as características do CRA e que nos permitirá mellorar en todo o relacionado coa competencia dixital.
