Autoavaliación SELFIE:

Seguindo as indicacións achegadas por parte da Consellería recollemos información do centro por medio do Selfie, aínda que os datos non puideron ser de gran utilidade, ao estar este aplicativo enfocado para as restantes etapas educativas, pero non para a Educación Infantil, que é a nosa.

Na elaboración do Selfie participou a meirande parte do profesorado definitivo do centro, e como punto a destacar, sinalar que a visio¿n que do centro por parte do profesorado como do equipo directivo foi similiar, polo cal comparten os mesmos puntos de vista ao respecto.

Desta análise evidenciamos algúns dos aspectos mencionados anteriormente: o profesorado considera que ten a posibilidade de empregar recursos tecnolóxicos para a súa labor docente, que teñen conexión estable a internet, empregan a rede para buscar recursos, comunícanse coas familias por medios tecnolóxicos... pero que o uso das TIC principalmente lévase a cabo sen implicar ao alumnado.

En canto ao test CDD, sucedeunos algo similar ao informe SELFIE, xa que novamente non estaba adaptado a¿ nosa etapa educativa, e polo tanto os resultados obtidos do mesmo non poden ser empregados para sacar conclusións fiables en canto á “Competencia Dixital do Profesorado”, que era o que se buscaba, xa que en moitas ocasións o obter un resultado baixo non dependeu tanto da falta de competencia do mestre, como da “intención pedagóxica” no seu traballo, ou a idoneidade do emprego deste tipo de temática en alumnado de educación infantil.

A modo de resumo sinalar que a meirande parte do profesorado tiña unha competencia dixital acorde ás necesidades coas que se atopaba no centro, e que na maior parte dos casos, e como se comentou, o non empregala co alumnado debeuse máis á falta de confianza no seu uso e os seus beneficios, que a unha falta de capacidade/competencia para facelo.

Para levar a cabo a análise DAFO final, empregouse asemade a información recollida durante os últimos anos por medio do equipo TIC de centro, así como a información que o equipo directivo tiña ao respecto, sendo coñecedores para poder desenvolver o seu proxecto de xeito eficiente, tanto da realidade do centro en canto a persoal como a infraestructuras, coma do resto da comunidade educativa e concello.

Unha vez analizado o DAFO podemos observar como o centro conta a nivel xeral co material necesario para levar a cabo as actividades diarias, tanto no que a material inventariable como conectividade se refire, así como que o profesorado ten a competencia dixital necesaria para desenvolver o seu traballo na aula adaptándose á realidade coa que se atopa.

Por outra banda, hai unha clara desvinculación do traballo TIC co alumnado na práctica habitual no centro, así como unha falta de actividades relacionadas con esta temática pola pouca importancia que se lle da, posiblemente pola falta de información e coñecemento das posibilidades que poida aportar.

En canto ao material, aínda que suficiente, en moitos casos está obsoleto, desoraganizado, ou é preciso facer unha posta a punto cada vez que se emprega, polo que en moitas ocasións non se pon en uso.

Por último, sinalar que aínda que queda claro que dende a Consellería non se aposta pola figura dos CRA neste aspecto, (tanto a nivel de plans, programas, lexislación...), e que existe unha cantidade inxente de traballo e posibilidades que deixan mermada a posiblidade do avance no ámbito tecnolóxico, pero por sorte no noso centro existe unha clara predisposición ao cambio e a innovación, e un interese xeral por aportar experiencias o máis ricas posibles ao noso alumnado, explorando novas formas de traballo e coñecemento.

No contexto da avaliación procesual a frecuencia da súa realización será como mínimo dunha vez ao trimestre. Os aspectos a valorar incluirán o estado da execución das accións, a análise e valoración dos resultados e, de ser o caso, as posibles modificacións das accións e propostas e mellora.

A actividade do equipo TIC do CRA Mestre Manuel Garcés durante este primeiro trimestre do curso 23-24 foi moi intensa, xa que levamos a cabo a maior parte das accións programadas para todo o curso. Así, realizamos as 3 formacións impartidas polo equipo para o resto do claustro que versaron sobre as funcións e aplicacións dos paneis dixitais recén instalados no centro. Con isto, contribuímos tamén á mellora da CDD do profesorado.

Por outra banda, dende o equipo TIC engadimos as tablets en préstamo ao material xa ofertado a todas as escolas unitarias. A resposta das escolas foi excelente, xa que solicitaron o préstamo de diferentes dispositivos 3 das 4 escolas marcadas como obxectivo para o curso.

En vista dos bos resultados, seguiremos traballando nesta liña durante os vindeiros trimestres.

No segundo trimestre do presente curso o aumento do préstamo dos dispositivos dixitais aumentou considerablemente (impresoras dixitais, makey-makey, tablets...), polo que o obxectivo establecido que estaba pendente de consecución para este curso quedaría acadado. Por outra banda, o equipo TIC segue a levar a cabo as tarefas de supervisión e soporte dos materiais das diferentes aulas do CRA, así como o asesoramento no uso das dos diferentes dispositivos ou aplicacións que se empregan no día a día.

Continuaremos nesta liña nos próximos meses.

O01PD Planificar e realizar sesións de formación TIC no centro relacionadas cos paneis interactivos. Acadado   

O02PD Actualizar e ampliar a competencia dixital do profesorado do centro. Acadado

O03PD Analizar, revisar e organizar os materiais físicos para desenvolver a competencia dixital e ofertar o seu emprego nas escolas pertencentes ao CRA. Acadado