· Datos básicos do centro

O CMUS Profesional Manuel Quiroga é un centro sostido con fondos públicos dependente da Consellería de Cultura, Educación e Universidade que imparte ensinanzas de Réxime Especial de Música correspondentes ao Grao Elemental e Grao Profesional. Está situado na cidade de Pontevedra, Rúa Virxinia Pereira Renda, nº4. Actualmente, no curso 2023/24, conta cunha matrícula de 518 alumnos e un cadro docente de 66 profesores. A páxina web do centro é https://www.conservatoriomanuelquiroga.gal e o correo electrónico cmus.pontevedra@edu.xunta.gal.

· Contextualización do Plan Dixital no centro. Contribución ao Proxecto Educativo do Centro

O CMUS Profesional Manuel Quiroga está situado no barrio pontevedrés de A Parda, un barrio cada vez máis importante polo gran número de prestacións coas que conta (un centro de saúde, unha escola infantil, un colexio, supermercados, bancos, etc.).

O alumnado do conservatorio pertence maioritariamente aos municipios da comarca de Pontevedra. O alumnado, con idades que van dende os oito anos ata a adolescencia, presenta características e necesidades moi variadas.

Considérase de vital importancia contar cun Plan Dixital no centro, tendo en conta a evolución que as Novas Tecnoloxías están a ter no ámbito educativo en xeral, tanto para o alumnado como para o profesorado. Trataremos que as actividades do centro estean en todo momento interrelacionadas coas Novas Tecnoloxías e, por suposto, de que o noso profesorado poida contar coa formación dixital necesaria para facer fronte a todos aqueles aspectos da súa labor docente.

· Lexislación

A nivel normativo, este Plan Dixital baséase en:

• Art. 111 bis, Art. 121 e Art. 132 da LO 2/2006, de 3 de maio, de Educación

• Resolución do 3 de setembro de 2021, da Secretaría xeral de Educación e Formación Profesional, pola que se ditan instrucións para o deseño, elaboración e implementación do Plan Dixital nos centros docentes sostidos con fondos públicos da Comunidade Autónoma de Galicia para o curso 2021-2022.

· Proceso de elaboración

A elaboración do Plan Dixital para o curso 2023/24 tivo como referente a experiencia do curso 2022/23, da cal se realizou un seguimento e avaliación final.

O Equipo do Plan Dixital reuniuse a finais o curso pasado e ao inicio do curso actual para a elaboración do Plan Dixital 2023/24, ademais de asistir a sesións informativas e recibir o asesoramento/seguimento do mentor asignado ao centro.

Seguimento continuo, ao longo de curso, do grao de cumprimento dos obxectivos do Plan Dixital para avaliar o plan e introducir posibles modificacións ou propostas de mellora (avaliación procesual). A través de cuestionarios ao profesorado, índice de participación nas actividades de formación e análise a través dos diferentes órganos de goberno do centro. Avaliación do grao de execución das accións, análise e valoración de resultados.

Cada departamento poderá recoller na Memoria do curso as súas reflexións e/ou propostas de mellora.

A formación en Competencia Dixital Docente (CDD) foi un dos obxectivos clave do Plan Dixital no curso 2023/24. As accións dirixidas ao profesorado valóranse como satisfactorias segundo o feedback recibido, así como o interese e a participación do mesmo na actividade de formación en paneis dixitais interactivos organizada dentro do Plan de Formación Permanente do Profesorado do centro en colaboración co CFR de Pontevedra.

Conclúese que a tecnoloxía educativa tivo un impacto positivo na aula xa que especialmente nas materias grupais teórico-prácticas, pero tamén nas individuais, empregáronse medios, aplicacións e recursos educativos dixitais no proceso de ensinanza-aprendizaxe. Polo tanto, valórase como satisfactoria a incidencia da tecnoloxía na aula, o que contribúe ao desenvolvemento da competencia dixital do alumnado.

O obxectivo relacionado co Inventario foi acadado parcialmente. Actualmente, o centro conta cun inventario por aulas que se actualiza cada ano. Prevese que para o curso que vén se poida facer un seguimento do mesmo unha vez estea activa a aplicación Inventario en Educalidade.

Para o curso 2024/25 proponse unha continuidade das accións desenvoltas este ano:

• accións orientadas á mellora da competencia dixital do profesorado e do alumnado, incidindo no ámbito dos recursos educativos dixitais
• desenvolvemento de melloras nos espazos dixitais do centro, co obxectivo de seguir dinamizando a información e ampliar as prestacións 

A comunicación e difusión do Plan Dixital realízase a través da páxina web do centro.