Xustificación e contextualización normativa

• Art. 111 bis que fai referencia ás tecnoloxías da información e a comunicación, Art. 121 que indica que o proxecto educativo do centro ten que recoller a estratexia dixital do mesmo, e Art. 132 que outorga á dirección a tarefa de promover a innovación educativa da LO 2/2006, de 3 de maio, de Educación.
• Disposición adicional quinta da Resolución do 17 de xuño de 2021, da Secretaría Xeral de Educación e Formación Profesional, pola que se ditan instrucións para o desenvolvemento das ensinanzas de EI, EP, ESO e bacharelato no curso académico 2021-22 que insta aos centros a elaborar no curso 2021-22 o plan dixital de centro.
• Plan de Recuperación e Resiliencia da Unión Europea e no marco do Plan de Acción de Educación Dixital (2021-2027), liña que segue a Consellería de Cultura, Educación, Formación Profesional e Universidades para concretar a transformación dixital dos centros educativos de Galicia como organizacións a fin de que sexan dixitalmente competentes nos procesos de ensinoa-prendizaxe, de xestión e de relación o que require de un proceso de mellora das competencias dos membros da comunidade educativa que se deberá recoller nun Plan Dixital do Centro como organización.
• O Regulamento polo que se establece o Mecanismo de Recuperación e Resiliencia do Consello Europeo do 11 de febreiro de 2021 establece como un dos seus principais eixos a transformación dixital na procura da excelencia, a universalidade e a equidade na educación.
• Resolución do 3 de setembro de 2021, da Secretaría xeral de Educación e Formación Profesional, pola que se ditan instrucións para o deseño, elaboración e implementación do Plan Dixital nos centros docentes sostidos con fondos públicos da Comunidade Autónoma de Galicia para o curso 2021-2022. Esta resolución establece os principios, a temporalización, os instrumentos, a formación e a coordinación para a realización do Plan Dixital.

A contribución do Plan Dixital ao Proxecto Educativo da Escola Superior de Conservación e Restauración de Bens Culturais de Galicia reside na mellora nas competencias dixitais de alumnado e profesorado, na mellor xestión da comunicacion coa comunidade educativa e na mellora dos servizos e equipamento do centro.

Avaliación procesual: realizarase a finais do primeiro cuadrimestre. Valorarase o estado da execución das accións, os resultados e, se fora necesario, as posibles modificacións das accións e propostas de mellora. Concretarase nunha enquisa global de necesidades para toda a comunidade educativa, é dicir, profesorado, alumnado e PAS.

Avaliación final: realizarase ao remate do curso escolar. Os aspectos a considerar incluirán, entre outros, a valoración do logro dos obxectivos e as propostas de mellora, así como a planificación do Plan Dixital para o curso 2025-2026 no eido da formación do profesorado (en colaboración coa coordinación FPROFE).

A información principal relativa ó plan dixital estará dispoñible na páxina web do centro. As informacións máis detalladas, como os protocolos de uso e xestión dos equipamentos, empregarán a aula virtual moodle para a súa consulta, así como para a comunicación das aportacións e suxerencias que poidan xurdir por parte da comunidade educativa. En certos casos poderán empregarse as redes sociais da ESCRBCG para a difusión dos principais resultados e experiencias de éxito.

Haberá reunións específicas coa comunidade educativa para a comunicación e difusión do plan. Para o caso do profesorado, estas reunións serán principalmente canalizadas a través das reunións de claustro, aínda que tamén poderán realizarse reunións con departamentos específicos no caso de ser necesario, especialmente no referido ó uso da base de datos e certos equipamentos específicos. Para alumnado e PAS, a difusión do plan será obrigatoriamente a través dos consellos escolares pero, dependendo do desenvolvemento das enquisas, poderán programarse reunións opcionais específicas con estes grupos.