Contextualización do Plan Dixital no centro. Contribución ao Proxecto Educativo do Centro.
A economía de Bueu mira fundamentalmente ao mar, que intenta compaxinar cunha discreta actividade agropecuaria, turismo de temporada e outras actividades de administración e servizos en xeral. A pesca artesanal, o marisqueo a flote e os cultivos mariños en batea integran as principais actividades.
As actividades relacionadas co mar coexisten coa actividade agrícola (policultivo e minifundismo), coa gandería e a explotación forestal. As actividades pesqueiras solápanse, á vez, coa industria e os servizos. No concello, aséntanse diversas empresas ligadas ao sector do automóbil, ao sector madeireiro, da construción, algunha granxa gandeira, instalacións vitivinícolas e outros, que dan ocupación a unha parte da poboación activa.
A vila de Bueu acolle tres centros de Primaria, un centro da ESO, un concertado con primaria e secundaria e un de ESO, Postobrigatoria e adultos.
A finalidade do centro educativo é que o alumnado aprenda, se forme e se desenvolva como individuo da sociedade na que vive. En consecuencia, a propia organización do centro vai mellorando a través da súa práctica e da reflexión sobre ela, así como das relacións que establece coa súa contorna.
O Proxecto Educativo de Centro é o documento institucional que establece o marco e obxectivos xerais nos que se vai a desenvolver a acción educativa. É precisamente neste documento no que o Plan Dixital de Centro encaixa no seu nivel máis amplo, de tal xeito que ambos documentos están en total consonancia e o segundo completa ó primeiro. Entre os obxectivos que se atopan recollidos explicitamente no Proxecto Educativo de Centro, ós que contribúe directamente o Plan Dixital, atópanse:
- Fomentar o uso nas distintas áreas dos medios audiovisuais e informáticos, potenciando o uso das novas tecnoloxías.
- Obter e seleccionar información utilizando as diferentes fontes nas que esta se atopa, tratala de forma autónoma e crítica, e transmitila de maneira organizada e intelixible.
- Utilizar estratexias de identificación e resolución de problemas nos diversos campos de coñecemento e de experiencia, mediante procedementos intuitivos e de razoamento lóxico, contrastándoas e reflexionando sobre o proceso seguido.
- Coñecer e valorar o desenvolvemento científico e tecnolóxico, as súas aplicacións e a incidencia no medio físico e social.
- Utilizar con solvencia e responsabilidade as TICs.
- O uso responsable e funcional dos medios informáticos.
Breve xustuficación.
Tal e como se recolle na Lei Orgánica 3/2020, do 29 de decembro, pola que se modifica a Lei Orgánica 2/2006, do 3 de maio, de Educación, o uso xeneralizado das tecnoloxías de información e comunicación en múltiples aspectos da vida cotiá acelerou cambios profundos na comprensión da realidade e na maneira de comprometerse e participar nela, nas capacidades para construír a propia personalidade e aprender ao longo da vida, na cultura e na convivencia democráticas, entre outros. Este cambio de enfoque require dunha comprensión integral do impacto persoal e social da tecnoloxía, de como este impacto é diferente nas mulleres e os homes e unha reflexión ética acerca da relación entre tecnoloxías, persoas, economía e medioambiente, que se desenvolva tanto na competencia dixital do alumnado como na competencia dixital docente. En consecuencia, faise necesario que o sistema educativo dea resposta a esta realidade social e inclúa un enfoque da competencia dixital máis moderno e amplo, acorde coas recomendacións europeas relativas ás competencias clave para a aprendizaxe permanente.
A Lei tamén insiste na necesidade de ter en conta o cambio dixital que se está producindo nas nosas sociedades e que forzosamente afecta á actividade educativa. Polo tanto, o desenvolvemento da Competencia Dixital é clave para que, tanto o profesorado como o alumnado, poidan desenvolverse nos novos escenarios, de maneira que o alumnado poida desenvolver as habilidades e competencias do século XXI, e o profesorado poida mellorar e modernizar os procesos de ensino-aprendizaxe. É por iso, que todas as accións educativas que leven a cabo nos centros necesitan que se garantan tres piares básicos que conforman un trinomio indivisible: pedagoxía, tecnoloxía e espazos inspiradores, onde cada elemento só ten sentido pola súa conxunción co resto.
O uso das tecnoloxías dixitais por parte do alumnado require unha adecuada formación en cidadanía dixital para conseguir un bo uso e goce das mesmas, garantindo, por unha banda, un desenvolvemento pleno, seguro, saudable e responsable e por outro, a protección de datos persoais e os dereitos dixitais propios e alleos. Estes aspectos craves para o desenvolvemento integral do alumnado deben ser tamén obxectivos do plan dixital de centro.
Proceso de elaboración.
Para a elaboración do presente plan dixital seguíronse as directrices dos equipos ADIX e empregáronse as ferramentas postas a disposición dos centros: SELFIE e TCDD. A partires do informe SELFIE e dos resultados do TCDD elabórase un análise DAFO que permite reflexionar sobre a situación da comunidade educativa e elaborar o Plan Dixital en termos de obxectivos e actuacións.
Os obxectivos formúlanse partindo da situación do centro, coa vontade de avanzar. Os obxectivos establécense para un período determinado (preferiblemente o curso, no marco dun plan plurianual) e en colaboración cos órganos de coordinación pedagóxica do centro. Os obxectivos son específicos, realistas e avaliables e un obxectivo fundamental do plan é sempre abordar a fenda dixital existente.
Na concreción das actuacións tense en conta os axentes implicados, os procedementos previstos, os recursos necesarios e os indicadores de logro. As actuacións agrúpanse ó redor dos elementos do Marco Europeo de Organizacións Dixitalmente Competentes.
A planificación temporal marca os fitos necesarios para alcanzar progresivamente os obxectivos de dixitalización do centro.
O plan contempla indicadores de logro para realizar anualmente unha avaliación do progreso do Plan Dixital.
Infraestructura, equipamento e servizos dixitais.
Anexo I
