O Centro é un colexio dependente da Consellería de Educación e Ordenación Universitaria. No presente curso 2023-2024 impartense os niveis de segundo ciclo de Educación Infantil, e primeiro, segundo, terceiro, cuarto, quinto e sexto de Primaria.

Os nenos e nenas de Educación Infantil están en dúas aulas (4 e 5 anos nunha e 3 anos noutra). Os cursos 1º, 2º, 3º e 4º están en aulas separadas mentres que 5º e 6º comparten aula.

O número de unidades creadas é seis, unha en E. Infantil e tres en Primaria coa modificación dunha unidade a maiores habilitada para Educación Infantil e unha máis para Educación Primaria.

Os postos de traballo catalogados no centro son sete, estando cubertos por 6 mestres con destino definitivo e unha con destino provisional (unha praza de E. Infantil, dúas de E.P., unha de E.F., unha de Inglés, unha de música e unha orientadora que itinera con dous centros). Os postos provisionais son os seguintes: unha praza de infantil e dúas de primaria. Ademais, no presente curso contamos cunha profesora de PT afín con AL a tempo completo.

O CEIP Varela Buxán de Cercio está situado nunha zona rural do concello de Lalín, comarca do Deza, e recibe alumnado de doce parroquias situadas entre Lalín e Vila de Cruces dispersas nun radio de dez quilómetros as máis afastadas. O centro ten xornada partida de 9h.30 a 16h.15 de luns a xoves e de 9h.30 a 12h.55 o venres.

Nesta zona a densidade de poboación é baixa, e segue decrecendo debido ao descenso da natalidade e ao abandono do campo para buscar traballo nas industrias próximas. A actividade económica predominante é eminentemente agrícola e gandeira, cunha importante aportación da muller nas labores do campo. O núcleo familiar é, en moitos casos, amplo, constituído por avós, pais, fillos e, nalgún caso, outro familiar. O nivel cultural da maior parte das familias limítase ao Certificado de Estudos ou ao Graduado Escolar.

A oferta cultural da zona é practicamente nula, limitándose, única e exclusivamente, a do centro, xa que a biblioteca, museos, exposicións, representacións teatrais e musicais máis próximas atópanse en Lalín, non podendo asistir con asiduidade pola falla de transporte. Aínda así, a Asociación Cultural “A Carballeira” de Cercio organiza durante o ano, coincidindo con varias festividades da comarca, distintos actos culturais como obras de teatro, conferencias e reunións veciñais.

O centro educativo ten conta o anterior á hora de elaborar os diferentes documentos do centro. Deste xeito, o Plan Dixital está relacionado con outros documentos, proxectos e plans. Destacan a Programación Xeral Anual, o Proxecto Educativo, o Plan de Biblioteca, o Plan de Plurilingüismo, o Plan TIC e o Plan Proxecta.

Dende fai uns anos as TIC están cobrando cada vez máis importancia no mundo no que vivimos. Esta tendencia viuse acentuada coa aparición da pandemia da Covid-19, que fixo visibles as necesidades tecnolóxicas existentes.

O Plan Dixital pretende reunir e unificar os obxectivos traballados nos centros educativos en materia tecnolóxica.

A continuación recóllese a normativa que xustifica e contextualiza o propio Plan Dixital.

• Art. 111 bis, Art. 121 e Art. 132 da Lei Orgánica 2/2006, de 3 de maio, de Educación.

• Disposición adicional quinta da Resolución do 17 de xuño de 2021 da Secretaría Xeral de Educación e Formación Profesional, pola que se ditan instrucións para o desenvolvemento das ensinanzas de EI, EP, ESO e bacharelato no curso académico 2021-2022.

• Resolución do 3 de setembro de 2021, da Secretaría xeral de Educación e Formación Profesional pola que se ditan instrucións para o deseño, elaboración e implementación do Plan Dixital nos centros docentes sostidos con fondos públicos da Comunidade Autónoma de Galicia para o curso 2021-2022.

A elaboración do Plan Dixital levouse a cabo polo Equipo de Dinamización do Plan Dixital (seguindo as pautas do equipo ADIX) sen prexuízo das aportacións doutros integrantes do claustro.

Previa á redacción do documento final, foi necesario levar a cabo unha análise do contexto socioeducativo do centro relacionada con cuestións tecnolóxicas. Para esta finalidade empregáronse tanto a enquisa SELFIE (participou o alumnado e o profesorado) como o Test sobre a Competencia Dixital Docente (dirixido ao profesorado).

Unha vez analizado o contexto fíxose necesario determinar as necesidades, que como centro, xorden neste eido. Para isto fíxose o DAFO (debilidades, ameazas, fortalezas e oportunidades), o cal recolle aqueles aspectos positivos e negativos que inflúen no noso centro.

Posteriormente, e a partir do propio DAFO, reflexionouse sobre os obxectivos que se pretenden conseguir como centro no ámbito das novas tecnoloxías. É dicir, estableceuse o Plan de Acción do Plan Dixital.

Por último e tendo en conta o anterior, tivo lugar a redacción do documento do Plan Dixital.

A frecuencia da avaliación final será como mínimo unha vez ao ano para a valoración do logro dos obxectivos e as propostas de mellora. Para isto recóllese a seguinte rúbrica na que o valor 1 corresponde coa valoración mínima e o 4 coa máxima.

1. O desenvolvemento do plan dixital responde á secuenciación e a temporalización previstas.  1   2   3   4

2. Analízanse e coméntanse co alumnado os aspectos máis significativos derivados do uso de recursos dixitais.  1   2   3   4

3. Fixación dunha estratexia metodolóxica dixital común para todo o centro.  1   2   3   4

4. Adecuación da secuencia de traballo co uso de recursos dixitais na aula.  1   2   3   4

5. Adecuación dos recursos dixitais utilizados.  1   2   3   4

6. Adecuación dos recursos dixitais para ao alumnado con NEAE.  1   2   3   4

7. Contribución do desenvolvemento do Plan Dixital aos outros Plans do centro.  1   2   3   4

O traballo realizado durante o presente curso 2023-2024 centrouse en poñer en práctica o Plan de Acción e continuar coa liña trazada o curso pasado.

Os obxectivos recollidos no Plan de Acción foron modificados tal e como se recolle no seguimento do 1º trimestre. Estes cambios producíronse na súa maior parte por dous motivos: a falta de equipamento e o cambio substancial que se produciu no claustro de profesorado.

Tendo en conta as reformulacións anteriores, os obxectivos fóronse conseguindo ao longo deste curso. Non obstante, é preciso indicar que xurdiron dificultades no camiño derivadas das ameazas e debilidades que no seu momento xa se recolleron no DAFO (excesiva burocracia que resta tempo, etc.).

Como consecuencia do anterior, no seguinte apartado recóllense as propostas de mellora para o vindeiro curso.

Tendo en conta a valoración xeral do presente curso; establécense as seguintes propostas de mellora para o vindeiro.

• Coñecer por parte do profesorado e do alumnado os riscos de Internet e fomentar o uso seguro do mesmo.
• Coñecer por parte do profesorado as distintas licenzas de uso.
• Asesorar ao profesorado na obtención do B1 dixital requerido para os vindeiros cursos pola Consellería de Educación.
• Asentar o uso de recursos TIC nas metodoloxías docentes.
• Continuar ca dinamización a páxina web e a aula virtual do centro.
• Insistir na falta de equipamento dixital (pizarras dixitais) para os cursos de quinto e sexto de primaria.

Para fomentar a difusión do Plan Dixital levaranse a cabo as seguintes accións: presentación ao claustro, aprobación por parte do Consello Escolar, publicación na páxina web (http://www.edu.xunta.gal/centros/ceipvarelabuxan/plan-dixital) e disposición para consulta no centro.

Dispoñible a consulta a través de educalidade.