1. Contextualización do Plan Dixital e contribución ao Proxecto Educativo do Centro.
No que ás características socioeconómicas e culturais do centro se refiren, cabe engadir que a economía do concello está asentada nos tres sectores produtivos: o primario (pesca e marisqueo), o secundario (industria conserveira e depuradoras) o servizos (turismo onde hai gran cantidade de hoteis e augas termais, catamaráns, etc). Pódese subliñar que a economía do Grove xira arredor do mar e do turismo.
Nun contexto dixital globalizado, onde a competencia e alfabetización múltiples rexen o noso ritmo cotiá, as etapas educativas dos niveis obrigatorios deben seguir unha liña de compromiso social e profesional entre todos os entes da comunidade educativa, onde profesorado e alumnado camiñen nun mesmo sentido, apostando polo uso normalizado dos recursos dixitais e tecnolóxicos no seu quefacer diario e extraendo todas as posibilidades que estes nos ofrecen.
Seguindo os requirimentos legais e como parte integrante do Proxecto Educativo, este Plan Dixital segue liñas reguladoras para a tecnoloxía e os seus empregos nas distintas etapas educativas, así como para as familias e para o profesorado. Partindo dunha reflexión diagnóstica realista, en base a aspectos de mellora que queremos acadar no noso centro, pretendemos iniciar ao alumnado no traballo e afondamento da competencia dixital e o seu emprego.
É ben sabido que na actualidade, calquera centro educativo está na obriga de formar e preparar ao alumnado para enfrontarse a un mundo de cambios permanentes e incluírse nunha sociedade de mercado dixitalizado e globalizado, de aí a necesidade de traballar as alfabetizacións múltiples.
O uso da tecnoloxía nas diversas prácticas que se dan en calquera organización escolar, desde as relacionadas coas cuestións organizativas, ata as propias dos procesos de ensino e aprendizaxe é xa ineludible. Así pois, a Estratexia Europa 2020 recoñece a necesidade dunha transformación dos sistemas de educación e formación que garanta a adquisición de competencias dixitais, que á súa vez permitan aproveitar as oportunidades.
Por ende, as xestións educativas vense na obriga de revisar as súas estratexias co obxectivo de mellorar a súa capacidade para promover a innovación e sacar o máximo rendemento das tecnoloxías da información e comunicación, e dos recursos educativos dixitais e integralo e conectalo con todos os plans e proxectos que articulan e rexen a dinámica do centro.
Como integrante do PE (Proxecto Educativo) os seus obxectivos e as súas liñas de actuación teñen que ir encamiñadas consonte todos os demais plans e proxectos do centro, sendo ademais as ferramentas dixitais, un instrumento a favor do proceso de ensino e aprendizaxe. Así mesmo, o plan dixital e as súas concrecións anuais deben recollerse na PXA (programación xeral anual), reflexando as actuacións e accións programadas para o curso, detallando os nexos de unión cos demais plans e proxectos.
Unha das características contextuais que máis define a este centro educativo nos últimos cursos é a falta de permanencia do profesorado, a maioría cambia cada curso ou senón cada dous cursos, isto trae consigo como consecuencia que os proxectos e plans de centro poidan verse perxudicados no que a súa continuidade se refire.
Na actualidade, o centro é un centro plurilingüe, conta con Edixgal en 5º e 6º de educación primaria, participa no plan de mellora de bibliotecas escolares (PLAMBE), en biblioteca creativa, en Plan Proxecta, na rede de Voz Natura, en Club de Ciencias e en Polos Creativos.
Para enfrontarnos a esta circunstancia, optamos por marcar obxectivos realistas, factibles, alcanzables e básicos que se reflexan en apartados posteriores.
2. Xustificación normativa
A necesidade de que os centros educativos conten cun Plan Dixital detallado, parte das orientacións establecidas no Plan de Recuperación e Resiliencia da Unión Europea no marco do Plan de Acción de Educación Dixital (2021-2027). Seguindo esta liña, a Consellería persegue a transformación dixital dos centros educativos como organización a fin de que sexan dixitalmente competentes nos procesos de ensino-aprendizaxe de xestión e relación que require dun proceso de mellora das competencias dos membros da comunidade educativa, así o Plan Dixital do centro, que se regula na Resolución do 3 de setembro de 2021, ten como principios:
-A resposta á realidade social do uso xeneralizado das tecnoloxías de información e comunicación en múltiples aspectos da vida cotiá.
-O enfoque cara unha comprensión integral do impacto persoal e social da tecnoloxía.
-A transformación dixital que inclúa unha visión da competencia dixital máis moderna e ampla, acorde coas recomendacións europeas relativas ás competencias clave.
Por outra banda, seguindo o establecido nos Decretos autonómicos no que se recolle a obriga de inclusión do PD no Proxecto Educativo, cabe destacar os seguintes artigos:
Artigo 30.1 do DECRETO 150/2022, do 8 de setembro, polo que se establece a ordenación e o currículo da educación infantil na Comunidade Autónoma de Galicia. Artigo 34.1 do DECRETO 155/2022, do 15 de setembro, polo que se establecen a ordenación e o currículo da educación primaria na Comunidade Autónoma de Galicia
O que recolle dito artigos é o seguinte: “Os centros docentes deberán incluír dentro do seu proxecto educativo e funcional a súa estratexia dixital a través dun plan dixital de centro, que se concibe como un instrumento para mellorar o desenvolvemento da competencia dixital da comunidade educativa, o uso das tecnoloxías dixitais no proceso de ensino e aprendizaxe e a transformación dos centros en organizacións educativas dixitalmente competentes, e que se concretará anualmente na programación xeral anual a través das correspondentes actuacións”.
Na normativa de desenvolvemento dos anteriores Decretos, concrétase a estrutura, que como mínimo debe contemplar o PD, no artigo 15 da Orde do 30 de maio de 2023 e no artigo 14 da Orde do 26 de maio de 2023.
3. Proceso de elaboración
A elaboración do Plan Dixital iniciouse coa configuración dun equipo específico seguindo as liñas marcadas pola Liña 1 do PFPP relativo ao Plan Dixital e asesoría Adix Vilagarcía 2.
A liña de traballo constou de tres momentos:
-A recollida de información a través de SELFIE e test CDD.
-A reflexión de DAFO.
- Elaboración dun plan de acción.
