Contextualización do PD no centro e contribución ao Proxecto Educativo:
A estratexia dixital do centro quedará recollida no PEC, que se atopa nun proceso de elaboración, tal como recolle o proxecto de dirección presentado polo actual equipo directivo a finais do curso 20-21. Con ese obxectivo, o Plan Dixital formará parte dese proxecto educativo, unha vez sexa aprobado polo consello escolar, unha vez oído o claustro.
Este Plan Dixital contribúe a unha serie de programas de innovación educativa nos que participa o noso centro. Entre eles, o programa Stembach, dentro do Contrato-programa a modalidade CP-Innova e CP- Inclúe, o programa PROA+, o Plan Proxecta+ e o programa de innovación educativa Polos creativos. Ademais, o noso centro forma parte da Rede DixitalGal. Unha persoa docente do noso centro foi seleccionada como responsables ADIX (mentor dixital) e UACO. A maiores, o IES Val Miñor é centro EDIXGAL desde hai anos. Este Plan Dixital contribuirá aos obxectivos que exporemos na Programación Xeral Anual para o curso 23-24 a través de varias iniciativas, entre as que estará a posta en marcha e consolidación deste Plan, que implica actuacións en campos como o manexo de información dixital e outros.
Xustificación do PD en relación coa normativa vixente:
Este plan Dixital sigue o establecido na Resolución do 3 de setembro de 2021, da Secretaría xeral de Educación e Formación Profesional, pola que se ditan instrucións para o deseño, elaboración e implementación do Plan Dixital nos centros docentes sostidos con fondos públicos da Comunidade Autónoma de Galicia para o curso 2021-2022, así como no artigo 37.1. do DECRETO 156/2022, do 15 de setembro, polo que se establecen a ordenación e o currículo da educación secundaria obrigatoria na Comunidade Autónoma de Galicia, e o artigo 35.1 do DECRETO 157/2022, do 15 de setembro, polo que se establecen a ordenación e o currículo do bacharelato na Comunidade Autónoma de Galicia.
Proceso de elaboración:
O proceso de elaboración do plan dixital levouse a cabo mediante un grupo de traballo dentro do plan de formación permanente do profesorado en centros (PFPP: O Plan Dixital do Centro no IES Val Miñor”), integrado polo profesorado que forma parte do Equipo de Dinamización do Plan Dixital. Consistiu na elaboración dunha análise da situación do centro (DAFO) a partir do informe SELFIE e Test de Competencia Dixital Docente(TCDD) de centro. A partir da análise DAFO creouse o Plan de Acción que recolle a definición das liñas fundamentais do Plan Dixital en termos de obxectivos e actuacións.
