Xustificación do Plan Dixital de Centro:
Nun primeiro nivel, atopámonos unha xustificación normativa:
- LO 2/2006 de 3 de maio, de Educación: No seu artigo 111 bis, dedicado ás Tecnoloxías da Información e da comunicación, explica, entre outros aspectos, que “As contornas virtuais de aprendizaxe que se empreguen nos centros docentes sostidos con fondos públicos facilitarán a aplicación de plans educativos específicos deseñados polos docentes para a consecución de obxectivos concretos do currículo, e deberán contribuír á extensión do concepto de aula en tempo e en espazo [...] Así mesmo promoverán os principios de accesibilidade universal e deseño para todas as persoas, tanto en formatos e contidos como en ferramentas e contornas virtuais de aprendizaxe.” Relacionado con este artigo, o artigo 121, dedicado o Proxecto Educativo, di que este recollerá a estratexia dixital do centro. Por último, o artigo 132 establece como competencia do director ou directora do centro “promover a innovación educativa e impulsar plans para a consecución dos fins do proxecto educativo de centro.”
- Resolución do 3 de setembro do 2021, da Secretaría xeral de Educación e Formación Profesional, pola que se ditan instrucións para o deseño, elaboración e implementación do Plan Dixital nos centros docentes sostidos con fondos públicos da Comunidade Autónoma de Galicia para o curso 2021 – 2022.
A maiores da xustificación normativa, o desenvolvemento dun Plan Dixital de Centro ten tamén unha xustificación pedagóxica e social:
- Nunha contorna en crecente dixitalización, cada vez son máis as actividades da vida cotiá que esixen competencia dixital, polo que será fundamental formar ó noso alumnado nestes aspectos.
- A maioría das oportunidades laborais que van ter as nenas e nenos que se están formando actualmente esixirán, en maior ou menor medida dependendo do sector, una boa formación dixital. Incluso a propia acción de buscar un traballo precisará de competencia dixital.
- Relacionada cos puntos anteriores, resulta fundamental a idea de que non poderemos falar de igualdade de oportunidades se non ofrecemos a todas as persoas unha formación en competencia dixital.
- Para poder facer fronte as necesidades enunciadas anteriormente é necesario redactar un Plan Dixital de Centro eficaz que nos axude a avaliar o punto de partida do noso centro e poder dar resposta ás nosas distintas carencias e necesidades.
Contextualizació do Plan Dixital no centro e contribución ao Proxecto Educativo:
O Plan Dixital de Centro pode contribuír ao desenvolvemento do noso Proxecto Educativo, así como á consecución dalgúns dos obxectivos establecidos, nos seguintes aspectos:
- O emprego habitual das TIC no proceso de ensino e aprendizaxe favorece unha aprendizaxe significativa e que o alumnado desenvolva a competencia de aprender a aprender.
- O emprego autónomo da tecnoloxía dota ao alumnado da capacidade necesaria para resolver situacións novas e experimentar o aprendido de diferentes xeitos.
- As TIC facilitan o afianzamento de metodoloxías baseadas na aprendizaxe cooperativa, polo que o seu desenvolvemento contribuirá, indirectamente, á creación dun clima de traballo solidario e de respecto ás diferencias persoais.
- O emprego das TIC facilita ao profesorado o desenvolvemento de metodoloxías DUA (Deseño Universal para a Aprendizaxe) e, polo tanto, mellora a atención á diversidade do alumnado.
- O dotación de recursos tecnolóxicos e informáticos ó centro contribúe a compensalas diferencias económicas e culturais do alumnado facilitando o seu acceso a recursos dos que no poden dispor no seu contexto familiar.
O Plan Dixital de Centro está especialmente relacionado coa participación nos Polos Creativos, tanto polo deseño das actividades propostas, como pola dotación de recursos que supón. Tamén é moi estreita a relación do Plan coa continuidade no programa E-DIXGAL, establecido en quinto e sexto de primaria. Polo que respecta aos cursos primeiro e terceiro de primaria; teñen programada unha sesión semanal de robótica que, esperamos, contribúa o desenvolvemento deste Plan.
Relacionada coas TIC, tamén está a materia de libre configuración de cuarto e sexto de primaria que, un curso máis, será Robótica.
De xeito máis indirecto, o Plan Dixital de Centro contribuirá o desenvolvemento e, especialmente, á difusión de outros programas do centro: CP Inclúe, Programa Xogade, PROA +, PLAMBE...
Proceso de elaboración do Plan Dixital de Centro:
Decidimos que o Equipo de Dinamización do Plan Dixital estivera formado polos mesmos membros que o equipo de Dinamización das TIC. A persoa coordinadora tamén é a mesma e forma parte do equipo directivo do centro, polo que a coordinación resultou sinxela neste sentido.
A formación necesaria para a elaboración do Plan recibímola a través dun dos itinerarios do noso Plan de Formación Permanente do Profesorado. O noso mentor, ademais das sesións de formación directa, estivo á nosa disposición tanto para a aclaración de dúbidas como para proporcionarnos a documentación necesaria. Seguindo a súa temporalización, o Equipo de Dinamización do Plan Dixital reuniuse para concretar as distintas fases do proxecto: o informe SELFIE, o test CDD, o análise DAFO, o plan de acción e a redacción final do documento.
