1.1. Contextualización do Plan Dixital do centro.Contribución ao Proxecto Educativo do centro.
O dinamismo do Plan Dixital supón na práctica un diálogo cos demais documentos do centro, plans, programas e proxectos, como é o caso do Proxecto Educativo (PE), a Programación Xeral Anual (PXA), O Plan xeral de atención á diversidade (PXAD), o Plan de Integración das Tecnoloxías de Información e Comunicación (PTIC), o Plan de Acción Titorial (PAT), o Plan de Convivencia (PC), as Normas de Organización e Funcionamento do Centro (NOFC), ou o Plan de Igualdade (PI), Plan Lector – Biblioteca e de Dinamización e o Plan de educación emocional.
O Proxecto Educativo de centro con perspectiva dixital implica a toma de decisións tendo como base a seguridade nas TIC, a promoción da igualdade a través das canles dixitais, a comunicación positiva e asertiva, así como o deseño dunha organización participativa e democrática no manexo das ferramentas dixitais. Neste sentido, o PE recolle valores relacionados coa análise da información, o espírito crítico ou o uso da tecnoloxía de forma cooperativa. Constitúen valores e accións que se configuran e deseñan desde unha visión inclusiva, coa intención de garantir a atención á diversidade de todo o alumnado.
No caso da Programación Xeral Anual, o uso de ferramentas dixitais e móbiles constitúese como un aspecto relevante a ter en conta nas titorías. Neste sentido, o centro conta co programa E – Dixgal en 5º e 6º, que implica un cambio de mirada máis alá á hora de proxectar e poñer en práctica unha aprendizaxe competencial. Non só son importantes os procesos de procura e análise, senón tamén as formas nas que se produce a comunicación e o uso da información. Unha PXA con liñas dixitais radica en que o alumnado, de forma conxunta co profesorado sexa quen de incrementar a súa competencia dixital para deseñar, aplicar, comunicar e adquirir máis e mellores propostas didáctico – pedagóxicas.
O uso competencial das TIC redunda na posta en práctica dunha actuación organizada e planificada. Para alcanzar isto, o Plan de Integración das TIC atópase constituído por obxectivos determinantes como é o caso de “Elaborar o Plan dixital do centro no que se recolla a integración didáctica das TIC, o traballo colaborativo en rede a través de espazos virtuais e a educación dixital”. A súa elaboración constitúese como unha pedra angular na que teñen cabida todas as actuacións encamiñadas a organizar e planificar as actuacións do eido dixital. Ao mesmo tempo, o Plan Dixital tamén supón unha estratexia mediante a cal o profesorado pode identificar as necesidades e reorientar a proposta educativa en base ás propostas de mellora.
1.2. Breve xustificación do mesmo:
Artigo 30.1 do DECRETO 150/2022, do 8 de setembro, polo que se establece a ordenación e o currículo da educación infantil na Comunidade Autónoma de Galicia. Artigo 34.1 do DECRETO 155/2022, do 15 de setembro, polo que se establecen a ordenación e o currículo da educación primaria na Comunidade Autónoma de Galicia.
O que recollen ditos artigos é o seguinte: “Os centros docentes deberán incluír dentro do seu proxecto educativo e funcional a súa estratexia dixital a través dun plan dixital de centro, que se concibe como un instrumento para mellorar o desenvolvemento da competencia dixital da comunidade educativa, o uso das tecnoloxías dixitais no proceso de ensino e aprendizaxe e a transformación dos centros en organizacións educativas dixitalmente competentes, e que se concretará anualmente na programación xeral anual a través das correspondentes actuacións”
Nas normativa de desenvolvemento dos anteriores Decretos, concrétase a estrutura, que como mínimo debe contemplar o PD, no seguinte articulado:
Artigo 15 da ORDE do 30 de maio de 2023 pola que se desenvolve o Decreto 150/2022, do 8 de setembro, polo que se establece a ordenación e o currículo da educación infantil na Comunidade Autónoma de Galicia e se regula a avaliación nesa etapa educativa.
Artigo 14 da ORDE do 26 de maio de 2023 pola que se desenvolve o Decreto 155/2022, do 15 de setembro, polo que se establecen a ordenación e o currículo da educación primaria na Comunidade Autónoma de Galicia e se regula a avaliación nesa etapa educativa.
1.3. Proceso de elaboración
A constitución do equipo de Dinamización do Plan Dixital tivo como finalidade a de elaborar, de acordo coa Resolución do 3 de setembro de 2021, da Secretaría xeral de Educación e Formación Profesional, pola que se ditan instrucións para o deseño, elaboración e implementación do Plan Dixital , un Plan Dixital no curso 2023 – 2024 que responda ás necesidades formativas dixitais; manifestadas e expresadas polo equipo docente e alumnado.
Neste senso, o deseño e elaboración posterior do plan precisou, necesariamente, a determinación duns obxectivos formulados a partir das necesidades detectadas mediante unha análise DAFO (Debilidades, Ameazas, Fortalezas e Oportunidades) do noso centro educativo.
O equipo de elaboración do Plan Dixital, contando coa colaboración de todo o claustro, foi o encargado de aplicar accións de xestión, organización e orientación dos tempos e espazos dedicados á utilización das ferramentas de análise; Test Selfie e Test de Competencia Dixital Docente (TCDD).
Finalmente, tras diversos procesos de reflexión, análise e debate, e tras ter recompiladas as necesidades, o equipo de dinamización formulou os obxectivos Smart do Plan de Acción, constituíndose este como un compoñente vertebrador para a conformación do Plan Dixital.
