XUSTIFICACIÓN
O Plan Dixital de Centro recollerá as accións para mellorar a competencia dixital de todo o centro. Está claro que estamos nun momento no que a tecnoloxía é imparable, pero existen na actualidade moitos recursos, ferramentas e servizos que permiten mellorar a calidade educativa en todos os seus ámbitos. Non podemos dar as costas a esta realidade e desde os centros debemos abordar a tecnoloxía como un proceso máis global, o noso centro debe ser un axente de transformación e para iso necesitamos un plan de mellora. O marco europeo para as organizacións educativas dixitalmente competentes permítenos facer unha análise da realidade do noso centro e crear un plan de acción acorde cos resultados obtidos da mesma.
A lexislación que tivemos en conta para a elaboración do mesmo foi a seguinte:
• Art. 111 bis, Art. 121 e Art. 132 da LO 2/2006, de 3 de maio, de Educación
• Disposición adicional quinta da Resolución do 17 de xuño de 2021, da Secretaría Xeral de Educación e Formación Profesional, pola que se ditan instrucións para o desenvolvemento das ensinanzas de EI, EP, ESO e bacharelato no curso académico 2021-2022
• Resolución do 3 de setembro de 2021, da Secretaría xeral de Educación e Formación Profesional, pola que se ditan instrucións para o deseño, elaboración e implementación do Plan Dixital nos centros docentes sostidos con fondos públicos da Comunidade Autónoma de Galicia para o curso 2021-2022
CONTEXTUALIZACIÓN
O CEIP Xesús Golmar atende a un sector de poboación ubicado na zona centro de Galicia, a 68 km da capital provincial. O relevo do municipio está caracterizado polo val fértil do río Deza. Limitando co val, tamén conta con zonas montañosas, destacando os Montes de Testeiro e a Serra do Candán.
Son moitas as referencias da pegada prehistórica neste municipio: castros, topónimos, mámoas… e da pegada prerrománica: cerámica, machetes… Conta con Pazos como o de Liñares, Bendoiro, Cardexía…; capelas e igrexas con características arquitectónicas dos estilos románico, barroco e neoclásico e de épocas anteriores que remontan ao século X; cruceiros, petos de ánimas, pombais, fontes, lavadoiros e muíños que constitúen unha parte destacada da arquitectura popular.
Tamén discorre a ruta do camiño de inverno que vai cara Santiago.
A situación de Lalín como centro xeográfico galego, sitúao como punto de confluencia comercial importante.
O municipio conta con importantes empresas en todos os sectores. Lalín ten os polígonos industriais de Botos e Lalín 2000, con numerosas empresas instaladas neles e tendo proxectada a construción dun terceiro na zona de Catasós. Unha importante industria en Lalín é a téxtil. Hai varias empresas lalinenses de moda de gran importancia a nivel nacional.
O censo do INE do ano 2021 indica que 20.199 persoas residen neste municipio. Actualmente a densidade de poboación é de 61,78 habitantes por Km2. A poboación con nacionalidade estranxeira no Concello de Lalín representa case o 13,27% do total. Na actualidade, no centro, contamos con 35 alumnos e alumnas de 13 nacionalidades diferentes procedentes de catro continentes e con linguas diferentes. Esta realidade converte a Lalín nun espazo privilexiado de intercambio cultural, unha interculturalidade que nos enriquece a todos e a todas.
As familias ás que pertence o noso alumnado son de nivel socioeconómico medio, con vivenda en propiedade a maior parte, empregados, sobre todo, no sector servizos, na construción, no sector agrario, e no téxtil que emprega fundamentalmente á muller. Asiste alumnado das seguintes parroquias: Lalín, Donramiro, Goiás, Botos, Catasós, Filgueira, Sello, Vilanova, A Xesta, Doade, Xaxán, Maceira, Castro, Parada, Alperiz, A Veiga, Carballeda, Alvarellos e Alemparte. Contamos tamén cun número elevado de alumnado estranxeiro, debido a gran cantidade de inmigrantes.
CONTRIBUCIÓN AO PROXECTO DO CENTRO
A finalidade dun centro educativo é que o alumnado aprenda, se forme e desenvolva como individuo da sociedade na que vive. É un segredo a voces que a tecnoloxía forma parte na actualidade da sociedade na que vivimos en multitude de ámbitos, e de seguro, que no futuro do noso alumnado contará aínda con máis presenza. Polo que o PD de centro debe encaixar como elemento imprescindible no Proxecto Educativo de Centro, co Proxecto de Dirección e coa Programación Xeral Anual, estar en consonancia e complementarse cos mesmos.
O plan Dixital de Centro enténdese como un documento que debe favorecer e impulsar o uso dos medios dixitais tanto nos procesos de ensino aprendizaxe (formación do profesorado e do alumnado) como nos procesos de xestión do centro (formación do resto da comunidade educativa).
Neste senso van encamiñados os obxectivos formulados no noso Plan de acción así como as liñas de actuación deseñadas para acadalos.
PROCESO DE ELABORACIÓN
A elaboración deste Plan foi un proceso de traballo e reflexión en Equipo.
Por unha banda, o Equipo do Plan Dixital recibiu a información e formación dentro da liña solicitada polo centro no PFPP.
Esta formación e a mentorización do Equipo Adix guiou o proceso de elaboración do Plan.
Para a elaboración do mesmo, realizamos as reunións e xuntanzas correspondentes, adicamos sesións á formación (por videoconferencia), tamén houbo tempos de traballo individual para logo debater e chegar ás conclusións e decisións pertinentes.
En ocasións debatemos co resto do claustro e mesmo fixemos pescudas de aspectos e liñas de acción e formación que elaboramos posteriormente por consenso.
En definitiva, o proceso estivo en todo momento unido á reflexión, desde a situación de partida ata a situación de chegada, que desexamos para o noso centro.