1.1 Xustificación do Plan Dixital coa normativa vixente:
A Lei Orgánica 2/2006, do 3 de maio, de Educación, regula diferentes aspectos relacionados coa competencia dixital e a innovación educativa, así no artigo 121 establece que o proxecto educativo do centro recollerá, entre outros aspectos, a estratexia dixital do centro, de acordo co establecido no artigo 111 bis, no que se establece que “as Administracións educativas e os equipos directivos dos centros promoverán o uso das tecnoloxías da información e a comunicación (TIC) na aula como medio didáctico apropiado e valioso para levar a cabo as tarefas de ensino e aprendizaxe, utilizando os marcos de referencia da competencia dixital que orienten a formación inicial e permanente do profesorado e faciliten o desenvolvemento dunha cultura dixital nos centros e nas aulas.” O artigo 132 da devandita Lei establece como competencias dos directores e directoras, entre outras, “exercer a dirección pedagóxica, promover a innovación educativa e impulsar plans para a consecución dos fins do proxecto educativo do centro; e fomentar a cualificación e formación do equipo docente, así como a investigación, a experimentación e a innovación educativa no centro”. A disposición adicional quinta da Resolución do 17 de xuño de 2021, da Secretaría Xeral de Educación e Formación Profesional (DOG 30 de xuño), pola que se ditan instrucións para o desenvolvemento das ensinanzas de educación infantil, educación primaria, educación secundaria obrigatoria e bacharelato no curso académico 2021-2022, e na disposición adicional terceira da Resolución do 18 de xuño de 2021, da Secretaría Xeral de Educación e Formación Profesional, pola que se ditan instrucións para o desenvolvemento dos ciclos formativos de formación profesional do sistema educativo no curso 2021- 2022 sinalan que “os centros docentes elaborarán no curso 2021-2022 o seu Plan Dixital de acordo coas instrucións que se diten”. Os centros educativos forman parte dun mundo en cambio permanente e dunha sociedade e mercado laboral cada vez máis dixitalizado e por esa razón, os centros educativos deben dar respostas a esas necesidades e demandas da sociedade e mercado laboral para poder formar cidadáns do futuro coas competencias necesarias para desenvolverse nunha contorna dixitalizada. A Educación é un recurso crave para asegurar a igualdade social, a promoción das persoas e máis xenericamente a mellora das condicións de vida de comunidades e persoas. Así pois, a Estratexia Europa 2020 recoñece a necesidade dunha transformación dos sistemas de educación e formación que garanta a adquisición de competencias dixitais, que á súa vez permitan aproveitar as oportunidades. Por outra banda, as organizacións educativas teñen a necesidade de revisar as súas estratexias co obxectivo de mellorar a súa capacidade para promover a innovación e sacar o máximo partido das tecnoloxías da información e comunicación, e dos recursos educativos dixitais.
Mediante o presente plan, preténdese:
Recoñecer o Plan anual dixital como un recurso crave para a planificación da estratexia dixital dunha organización educativa.
Valorar as implicacións das organizacións escolares para desenvolver unha cultura dixital das mesmas.
1.2. Contextualización do PD no centro e contribución ao Proxecto Educativo.
O CPI Plurilingüe Alfonso VII é un centro público situado na vila de Caldas de Reis. A Consellería de Educación converteu no ano 1998 o C.E.I.P. “Alfonso VII” nun Centro Público Integrado. Recibe alumnos e alumnas do CRA de Caldas de do núcleo da poboación. A maioría da poboación activa dedícase a traballar no sector secundario: industria. O centro fórmase a partir de alumnado que provén de familias de contorno rural e do núcleo semiurbano do propio concello, cunha economía que se sustenta no traballo por conta allea, no que predominan as actividades industriais e de servizo e, en menor medida as de réxime agrario e autónomo. A maioría do alumnado reside en pequenas entidades de poboación que implican un desprazamento ao núcleo de Caldas para poder participar nas ofertas culturais, deportivas ou de ocio. Nos últimos anos estase incorporando ao centro alumnado inmigrante que adoitan ser familias con irmáns matriculados no centro, o que conleva un avance na comunicación con elas. Ademais, pode ocorrer da matriculación dalgún ou dalgunha alumno ou alumna ao longo do curso como caso ocasional.
1.3. Proceso de Elaboración.
O Equipo de Dinamización do Plan Dixital formouse no inicio do curso 2021-22. O traballo foise desenvolvendo acorde coas tarefas que se ían demandando dende a Aula Moodle do Adix Vilagarcía de Arousa, ao que a coordinadora, tiña acceso e a través do cal recollía a información, tarefas e prazos establecidos coa posterior transmisión aos membros do grupo.En canto houbo tarefas para realizar, o proceso foi establecer reunións de todo o equipo e delimitar as liñas xerais. A preparación do SELFIE, así como o calendario de aplicación foron definidos pola Coordinadora. O Test CDD chegounos a través de Fprofe. O equipo mantivo reunións periódicas nas que foron tratados os puntos relacionados coa elaboración do DAFO,o Plan de Acción e a redacción do Plan Dixital de Centro. O procedemento seguido para a elaboración do Plan Dixital constou das seguintes fases:
1ª FASE: análise da situación do centro. A análise da situación do centros realizouse a través das ferramentas para a diagnose de situación SELFIE e o Test de Competencia Dixital Docente.
2ª FASE: diagnose da situación de centro. A partir do Informe SELFIE, o centro xerou un informe sobre Debilidades, Ameazas, Fortalezas e Oportunidades (DAFO) que permite a análise de situación e a definición das liñas fundamentais do Plan Dixital en termos de obxectivos e actuacións. O Informe Individual do test CDD permite ao centro educativo avanzar nas competencias profesionais docentes relacionadas co ámbito dixital, permitindo planificar unha formación persoal que atenda ao nivel de partida de cada docente. Así mesmo, o informe de centro permitirá planificar a liña de formación a través dos PFPP nos vindeiros cursos académicos.
3ª FASE: elaboración do documento Plan Dixital de Centro.
Neste curso 23-24 continuamos coa idea inicial deste Plan elaborado no curso 21-22 e coam idea de rematar todos os obxectivos propostos.
