Datos básicos do centro
Nome: IES O Couto
Dirección: Rúa Rampa de Sas S/N, Ourense
Páxina web: http://www.edu.xunta.gal/centros/iescouto/
Correo electrónico: ies.couto@edu.xunta.gal
Ensino: ESO e bacharelato
Total alumnado: 543
Total profesorado: 55
Contextualización do Plan Dixital no centro. Contribución ao Proxecto Educativo do Centro
O IES O Couto é un instituto de barrio da cidade de Ourense. Trátase dun barrio populoso, de arredor de trinta mil habitantes, e na mesma área educativa existe un centro de ensino concertado e un centro de educación permanente de adultos. O perfil socioeconómico máis común dos pais e nais do noso alumnado correspóndese a traballadores por conta allea, aínda que tamén existen porcentaxes relevantes de funcionarios e pequenos empresarios. Parece de interese destacar que o barrio do Couto é un dos que de maneira preferente acolle desde hai anos poboación inmigrante que chega á cidade de Ourense, e iso ten o seu reflexo na nosa comunidade educativa, en que convive alumnado con pais de distintas procedencias, tanto comunitarias como extracomunitarias.
Nun centro das nosas características, o Plan Dixital ten que dar acollida a todas as realidades presentes na nosa comunidade educativa. A eficacia do Plan Dixital medirase tamén, entre outros indicadores de logro, á hora de establecer en que medida mellorou o noso traballo de aula e a inserción escolar do alumnado máis desfavorecido, así como no que tivo de mellora da nosa actividade docente e de xestión de documentos docentes e relativos á administración escolar. O IES O Couto participa en distintos plans e proxectos de mellora educativa (PROA, Proxecta, seminarios e grupos de traballo do CFR…). De todos eles, se cadra son o Club de ciencias e os Polos creativos dos máis acaídos no que fai aos contidos do PD. Agardamos, e ese é un dos nosos indicadores de logro máis relevantes, que o labor que desenvolvamos desde o grupo do Plan Dixital teña unha traslación, cando menos parcial, ao Proxecto Educativo de centro así como ao resto dos documentos e prácticas docentes polas que se ordenan as actividades no seo da nosa comunidade educativa, no entendemento que o que aquí se elabore non pode quedar circunscrito ao ámbito exclusivo dos integrantes do grupo elaborador e ten que ter algún tipo de aplicación para o conxunto da comunidade educativa.
Breve xustificación do mesmo
-
Art. 111 bis, Art. 121 e Art. 132 da LO 2/2006, de 3 de maio, de Educación
-
Resolución do 3 de setembro de 2021, da Secretaría xeral de Educación e Formación Profesional, pola que se ditan instrucións para o deseño, elaboración e implementación do Plan Dixital nos centros docentes sostidos con fondos públicos da Comunidade Autónoma de Galicia
Proceso de elaboración
Para a elaboración do plan dixital o centro solicitou un PFPP Análise da competencia dixital do centro e elaboración do plan dixital, fíxose un grupo de traballo para discutir ideas en pequeno grupo levalas ante o resto do claustro e alí recoller ideas para o grupo de traballo. Dese xeito recollemos a opinión da maioría das persoas do claustro para elaborar de maneira fundamentada o noso plan, ao tempo que conseguimos implementar un proceso que abrangue un maior número de membros da comunidade educativa, circunstancias ambas que entendemos que contribuirán a mellorar o resultado final do traballo.
