A elaboración deste Plan Dixital representa unha oportunidade de mellora para o noso centro, ao tempo que da cumprimento ao establecido na actual lexislación educativa.
A Lei Orgánica 3/2020, do 29 de decembro, pola que se Modifica a Lei Orgánica 2/2006, de 3 de maio, de Educación (LOMLOE) establece no seu artigo 111 bis que “as Administracións educativas e os equipos directivos dos centros promoverán o uso das Tecnoloxías da Información e da Comunicación (TIC) na aula”. Para acadar isto, as entornas virtuais que se empreguen nos centros deben estar deseñados polos propios docentes para prever a consecución dos obxectivos concretos do currículo ao tempo que se teñen en conta as características do alumnado, do tempo e espazos do centro. En definitiva, os docentes deben elaborar unha estratexia dixital adaptada ao centro.
Esta idea concretase no artigo 121 da LOMLOE, no cal ao abordar a importancia do Proxecto Educativo se establece que este “recollerá así mesmo a estratexia dixital do centro”. O feito de encadrar esta estratexia dixital dentro do Proxecto Educativo amosa a importancia que as Administracións educativas lle queren dar ao Plan Dixital e, por tanto, a relevancia que este documento debe ter no funcionamento do noso centro. Nesta liña pero xa no ámbito autonómico, a Resolución do 17 de xuño do 2021, da Secretaría Xeral de Educación e Formación Profesional, pola que se ditan instrucións para o desenvolvemento das ensinanzas no curso académico 2021/22, concreta aínda máis a base lexislativa deste documento cando establece na súa Disposición adicional quinta que “os centros docentes elaborarán no curso 2021/22 o seu Plan Dixital acordo coas instrucións que se diten”.
Finalmente, estas instrucións das que fala a resolución anterior foron publicadas a comezos do curso 2021 por medio da Resolución do 3 de setembro de 2021, da Secretaría Xeral de Educación e Formación Profesional, pola que se ditan instrucións para o deseño, elaboración e implementación do Plan Dixital. Estas instrucións son o compás que nos permitiu poder deseñar e elaborar o presente documento, facilitándonos unha guía para poder coñecer os obxectivos que debíamos acadar, cales eran os pasos que tiñamos que dar para acadalos, que docentes do centro debían implicarse na elaboración do documento, que papel tiña que cumprir o resto da comunidade educativa, etc.
Para elaborar este Plan Dixital tivéronse en conta os demais plans e proxectos do centro, de xeito que a súa elaboración servise de polo multiplicador doutros aspectos do centro escolar. Neste sentido, no Proxecto Educativo do centro ven recollido que se tentará potenciar as Tecnoloxías da Información e da Comunicación (TIC), permitindo ao alumnado adquirir as destrezas necesarias para acadar a Competencia Dixital. Ademais, a lexislación educativa establece que todos os centros deben impulsar as novas tecnoloxías, encamiñándose, así, cara unha educación 2.0 que permita dotar aos centros de recursos tecnolóxicos e ao profesorado desenvolver o proceso de ensino-aprendizaxe de maneira dixital.
Especial mención require, no noso caso, a relación deste Plan Dixital coa Programación Xeral do curso 23/24. Neste sentido, para o vindeiro curso, tal e como está recollido nese documento, vaise implementar o Plan E-Dixgal en 5º e 6º de Educación Primaria. Esta mellora no noso centro educativo foi froito da decisión consensuada e convencida de todo o claustro de profesores que considerou imprescindible implementar este plan para desenvolver as competencias dixitais e tecnolóxicas do noso alumnado.
Así, no vindeiro curso, a posta en marcha do Plan E-Dixgal nos derradeiros cursos da etapa xunto co desenvolvemento deste Plan Dixital vai permitir ao noso centro avanzar de xeito decisivo na adquisición de recursos dixitais e, sobre todo, no desenvolvemento de destrezas e competencias que lle permitan ao alumnado dominar as Tecnoloxías da Información e da Comunicación.
O noso centro educativo conta con menos de 8 unidades polo que atendendo á Resolución do 3 de setembro de 2021, da Secretaría Xeral de Educación e Formación Profesional, pola que se ditan instrucións para o deseño, elaboración e implementación do Plan Dixital, no noso centro non se debía establecer Equipo de Dinamización do Plan Dixital se non que un membro do equipo directivo ou persoa que el delegase debía de elaborar este plan.
A pesar do anterior, e tendo en conta que dende o CFORE se ofreceu aos centros un PFPP para desenvolver as destrezas necesarias para elaborar este Plan Dixital, no noso centro decidimos solicitar ese grupo de traballo do PFPP para que así todo o claustro do centro puidese participar na elaboración do mesmo, construíndo este novo documento do centro de xeito colaborativo e participativo e así enriquecelo coa participación de todos os docentes. Finalmente, todos os docentes do claustro inscribíronse para participar no grupo de traballo e, por tanto, este documento é o resultado das súas opinións e contribucións.
Concretamente, para elaboralo, aproveitáronse as horas de obrigada permanencia no centro, os mércores a tarde, de xeito que nese tempo, os docentes reuníamos na sala de profesorado para abordar aqueles aspectos que nos esixía o grupo de traballo do PFPP e así, pouco a pouco, elaborar os apartados que finalmente ten o noso Plan Dixital.
