XUSTIFICACIÓN E NORMATIVA VIXENTE
Incardinación e contribución do PD ao Proxecto Educativo. Relación con outros Plans e proxectos do centro.
No noso caso, a contribución do Plan Dixital ao Proxecto Funcional e ao Plan Anual é esencial, concretándose nos seguintes aspectos:
- Mellorar a capacidade dixital de centro con repercusión no alumnado (Un dos obxectivos estratéxicos da Rede de Centros Integrados de Formación Profesional de Galicia).
- Mellorar a competencia dixital dos membros da comunidade educativa, incluído como obxectivo do Plan Anual.
Polo que atinxe á relación do Plan Dixital con outros Plans e proxectos, cabe destacar:
- PFPP coas liñas de xestión integral dixital do centro e dos recursos bibliográficos, e a propia adicada á elaboración do Plan Dixital.
- Presentación de cinco PFFP de base tecnolóxica como centro coordinador e catro PFPP como centro colaborador.
- PFFP premiado na convocatoria “Premios de Innovación na FP 2022”.
- Participación en “Galiciencia 2022” co proxecto “Aplicación para a optimización da análise de mostras por electroforese”.
Marco normativo
- Art. 111 bis, Art. 121 e Art. 132 da LO 2/2006, de 3 de maio, de Educación
- Disposición adicional terceira da Resolución do 18 de xuño de 2021, da Secretaría Xeral de Educación e Formación Profesional, pola que se ditan instrucións para o desenvolvemento dos ciclos formativos de FP do sistema educativo no curso 2021- 2022
- Resolución do 3 de setembro de 2021, da Secretaría xeral de Educación e Formación Profesional, pola que se ditan instrucións para o deseño, elaboración e implementación do Plan Dixital nos centros docentes sostidos con fondos públicos da Comunidade Autónoma de Galicia para o curso 2021-2022
CONTEXTUALIZACIÓN DO PLAN DIXITAL
Características socioeconómicas e culturais do contexto do centro
A área de influencia, de onde procede a maioría do alumnado do CIFP A Carballeira, abrangue a provincia de Ourense, sur da provincia de Lugo e norte e oeste da provincia de Pontevedra. No que atinxe ao ámbito económico os sectores preponderantes son, por esta orde, o sector servizos seguido do industrial, a construción e a agricultura.
O perfil do persoal contratado na área de influencia do CIFP A Carballeira, por nivel formativo, segundo o último informe do SEPE (2020), o 32,70 % dos contratados cursou Educación Secundaria Obrigatoria, o 13,61 % Bacharelato e equivalentes, o 18,95 % Formación profesional de grao medio ou superior. Os titulados universitarios supoñen o 11,39 %.
A distribución por sexo difire segundo os niveles formativos. Nos niveles máis elementais (Estudos primarios ou sen acreditar) o 57,35 % son homes e as mulleres, o 42,65 %. Entre os universitarios cambia a situación e son maioría as mulleres, o 68,82 % fronte ao 31,18 % de homes, máis de 37 puntos a favor de as mulleres.
Nos niveis de Formación Profesional as distancias entre homes e mulleres quedan atenuadas: 44,51 % de homes e 55,49 % de mulleres.
O sector servizos representa máis das tres cuartas partes da contratación nesta área de influencia. A evolución deste sector nos últimos anos foi de incremento a partir do 2015, aumentando un 12,74 %, un 10,53 % en 2016, un 4,01 % en 2017, un 8,57 % en 2018 e un 2,07 % en 2019.
Traxectoria no ámbito das novas tecnoloxías:
Desde o curso 1984/85 impártense no noso centro ensinanzas relacionadas coas novas tecnoloxías (iniciándose coa especialidade “Informática de Xestión” da Rama Administrativa).
Na actualidade, no CIFP A Carballeira impártese a totalidade de niveis de ensinanzas da Familia Profesional Informática:
- CB de Informática de Oficina
- CM Sistemas Microinformáticos e Redes
- CS Administración de Sistemas Informáticos en Rede
- CS Desenvolvemento de Aplicacións Web
- CS Desenvolvemento de Aplicacións Multiplataforma
- CE Desenvolvemento de Videoxogos e Realidade Virtual
Desde o curso 2021/2022 o centro pertence á Rede Galega de Educación Dixital (DixitalGal), e alberga a sede do grupo Adix_Ourense2.
Programas de innovación nos que participou e participa o CIFP A Carballeira- Marcos Valcárcel:
- Curso 2014/2015: Análise da presencia de metais en solos de viñedos e as posibles consecuencias na industria vitivinícola (Proxecto premiado).
- Curso 2015/2016: Vinculación de ciclos formativos da Familia Profesional de Química co entorno produtivo a través de prácticas de laboratorio (Proxecto premiado). Deseño dunha aplicación informática que simula un servizo de teleasistencia.
- Curso 2017/2018: Contextualización á realidade socioeconómica dos contidos de ciclos das Familias Profesionais de Química e Sanidade: unha aproximación experimental (Proxecto premiado).
- Curso 2018/2019: Técnicas analíticas aplicables ao sector alimentario (Proxecto premiado)
- Curso 2019/2020: Métodos analíticos de control medioambiental (Proxecto premiado).
- Curso 2020/2021: Proxecto seleccionado na convocatoria de Espazos de Tecnoloxía Aplicada 2021: Espazo tecnolóxico de Cultivo Celular.
- Curso 2021/2022: Simulación 3D: condución de ambulancias en realidade virtual (Proxecto premiado). Sistema de control horario optimizado para centros educativos. Modelado 3D do CIFP A Carballeira-Marcos Valcárcel e xeración de aplicacións de realidade virtual e aumentada para a comunidade educativa. Aplicación da impresión 3D ao desenvolvemento das actividades de control de calidade. Dixitalización e xestión de protocolos de evidencias sintomatolóxicas. Robótica colaborativa aplicada a procedementos de laboratorio biomédico. Virtualización de escritorios (VDI). Viaxa connosco sen te mover. PAS APP: Aplicación para axuda e adestramento para primeiros auxilios.
Contribución do PD ao Plan Anual do curso 2022/2023.
- Obxectivo estratéxico da Rede de CIFP’s “Mellorar a capacidade dixital de centro con repercusión no alumnado”.
- Obxectivo de centro “Mellorar a competencia dixital dos membros da comunidade educativa”
- Liña do PFPP, coa implementación do Plan Dixital
PROCESO DE ELABORACIÓN
O Plan Dixital iniciouse organizativamente a partir dunha liña do PFPP do curso 2021/2022
Partiuse das ferramentas SELFIE e do CDD que a comunidade educativa tiña á súa disposición para, posteriormente, o profesorado integrante da liña do PFPP e o equipo de dinamización, analizar a matriz DAFO e configurar colaborativamente o Plan de Acción.
